ଭୁବନେଶ୍ୱର(ସତ୍ୟପାଠ ବ୍ୟୁରୋ): ସୋସିଆଲ ମିଡିଆର ଗୁଜବ, ଅନ୍ଧବିଶ୍ୱାସ ଓ ଆଇନକୁ ହାତକୁ ନେବାର ପ୍ରବୃତ୍ତି ପୁଣି ଥରେ ରାୟଗଡ଼ା ଜିଲ୍ଲାକୁ ଲଜ୍ଜିତ କରିଛି। କଲ୍ୟାଣସିଂହପୁର ଅଞ୍ଚଳରେ ପିଲାଚୋର ସନ୍ଦେହରେ ଦୁଇଜଣ ସାମାଜିକ ବିକାଶ କର୍ମୀଙ୍କୁ ନିର୍ମମ ଭାବେ ମାଡ଼ ମାରିବା ସହ ଜଣେ ମହିଳାଙ୍କୁ ସର୍ବସମ୍ମୁଖରେ ଅପମାନିତ କରାଯାଇଥିବା ଘଟଣା ରାଜ୍ୟର ଆଇନ-ଶୃଙ୍ଖଳା ବ୍ୟବସ୍ଥା ଉପରେ ଗମ୍ଭୀର ପ୍ରଶ୍ନ ଉଠାଇଛି।

ଘଟଣାରେ ପୋଲିସ ବର୍ତ୍ତମାନ ସୁଦ୍ଧା ୧୬ ଜଣଙ୍କୁ ଗିରଫ କରିଥିଲେ ମଧ୍ୟ, ପ୍ରାୟ ୪୦ରୁ ୫୦ ଜଣ ଲୋକ ଏହି ଆକ୍ରମଣରେ ସାମିଲ ଥିବା ତଦନ୍ତରୁ ଜଣାପଡ଼ିଛି। ତେଣୁ କେବଳ ଗିରଫ ନୁହେଁ, ଏଭଳି ଘଟଣା ବାରମ୍ବାର କାହିଁକି ଘଟୁଛି ତାହା ନେଇ ଚର୍ଚ୍ଚା ଜୋର ଧରିଛି।

* କ୍ଷେତ୍ର ପରିଦର୍ଶନରୁ ଫେରୁଥିଲେ

ଦିଲ୍ଲୀର ଆଜାଦପୁର ଅଞ୍ଚଳର ବାସିନ୍ଦା ସୁମନ ଝା ଓ ଗୁଜରାଟର ସୁରଟ ନିବାସୀ ଅର୍ପିତ ସୁତାରିଆ ‘SBI Fellowship’ ଅଧୀନରେ ‘ଗ୍ରାମ ବିକାଶ’ ନାମକ ସଂସ୍ଥା ସହ କାର୍ଯ୍ୟ କରୁଛନ୍ତି। କନ୍ଧମାଳ ଜିଲ୍ଲା ଦାରିଙ୍ଗବାଡ଼ିରୁ କଳାହାଣ୍ଡିର ଥୁଆମୂଳ ରାମପୁର ଅଞ୍ଚଳ ପରିଦର୍ଶନ କରି ଫେରୁଥିବା ବେଳେ ସେମାନେ କଲ୍ୟାଣସିଂହପୁର ଅଞ୍ଚଳରେ ରାସ୍ତା ହରାଇ ଯାଇଥିଲେ।

ଗ୍ରାମବାସୀଙ୍କୁ ରାସ୍ତା ପଚାରିବା ସହ ରଜ ଅବସରରେ ପିଲାମାନଙ୍କୁ ବିସ୍କୁଟ ବଣ୍ଟନ କରିଥିଲେ। ହେଲେ ଏହି ସାଧାରଣ ଘଟଣାକୁ କେନ୍ଦ୍ର କରି କିଛି ଲୋକଙ୍କ ମନରେ ପିଲାଚୋର ସନ୍ଦେହ ସୃଷ୍ଟି ହୋଇଥିଲା। ପରେ ଭିଡ଼ ଉତ୍ତ୍ୟକ୍ତ ହୋଇ ଉଭୟଙ୍କୁ ଘେରି ନେଇଥିଲା।

* “ଆମେ ପିଲାଚୋର ନୁହେଁ” କହିଲେ ବି ଶୁଣିଲେ ନାହିଁ

ପୀଡ଼ିତା ସୁମନ ଝାଙ୍କ କହିବା ଅନୁଯାୟୀ, ସେ ବାରମ୍ବାର ନିଜର ପରିଚୟପତ୍ର ଦେଖାଇଥିଲେ ଓ ସେମାନେ ସାମାଜିକ କାର୍ଯ୍ୟ ପାଇଁ ଆସିଥିବା କହିଥିଲେ। କିନ୍ତୁ ଉତ୍ତ୍ୟକ୍ତ ଭିଡ଼ କୌଣସି କଥା ଶୁଣିନଥିଲା। ବରଂ ତାଙ୍କୁ ମାଡ଼ ମାରିବା, ଚୁଟି ଟାଣିବା ଓ ପୋଷାକ ଚିରିବା ଭଳି ଅମାନବୀୟ କାଣ୍ଡ ଘଟିଥିଲା।

ଜଣେ ମହିଳାଙ୍କୁ ସର୍ବସମ୍ମୁଖରେ ଅପମାନିତ କରାଯାଇଥିବା ଅଭିଯୋଗ ଘଟଣାକୁ ଆହୁରି ସମ୍ବେଦନଶୀଳ କରିଛି। ଏହା କେବଳ ଏକ ଆକ୍ରମଣ ନୁହେଁ, ବରଂ ଜଣେ ମହିଳାଙ୍କ ମର୍ଯ୍ୟାଦା ଉପରେ ସିଧାସଳଖ ଆକ୍ରମଣ ବୋଲି ସାମାଜିକ କର୍ମୀମାନେ କହିଛନ୍ତି।

* ପୁଣି ଫେଲ୍‌ ହେଲା କି ଆଇନ-ଶୃଙ୍ଖଳା ବ୍ୟବସ୍ଥା?

ସବୁଠାରୁ ବଡ଼ ପ୍ରଶ୍ନ ହେଉଛି, ଏତେ ବର୍ଷ ଧରି ପିଲାଚୋର ଗୁଜବକୁ ନେଇ ଦେଶର ବିଭିନ୍ନ ସ୍ଥାନରେ ଭିଡ଼ ହିଂସା ଘଟୁଥିବା ସତ୍ତ୍ୱେ ଲୋକଙ୍କ ମଧ୍ୟରେ ସଚେତନତା କାହିଁକି ସୃଷ୍ଟି ହୋଇନାହିଁ? ଗ୍ରାମାଞ୍ଚଳରେ ପୋଲିସର ସଚେତନତା ଅଭିଯାନ କେତେ ପ୍ରଭାବଶାଳୀ? ଗୁଜବ ରୋକିବା ଓ ଭିଡ଼କୁ ନିୟନ୍ତ୍ରଣ କରିବାରେ ସ୍ଥାନୀୟ ପ୍ରଶାସନ କାହିଁକି ବିଫଳ ହେଲା?

ଘଟଣା ପରେ ଡାକ୍ତରଖାନାରେ ମଧ୍ୟ ଉତ୍ତେଜନା ଦେଖାଦେଇଥିଲା। ଏହା ପ୍ରମାଣ କରୁଛି ଯେ ଆଇନ ପ୍ରତି ଭୟ ଓ ପ୍ରଶାସନ ପ୍ରତି ସମ୍ମାନ ଅନେକ ସ୍ଥାନରେ କ୍ରମଶଃ କମିବାରେ ଲାଗିଛି।

* ୪ ମାମଲା, ସିସିଟିଭି ଆଧାରରେ ଚିହ୍ନଟ

କଲ୍ୟାଣସିଂହପୁର ପୋଲିସ ଘଟଣାରେ ୪ଟି ପୃଥକ ମାମଲା ରୁଜୁ କରିଛି। ରାୟଗଡ଼ା ଏସପି ରାଜ ପ୍ରସାଦଙ୍କ ସୂଚନା ଅନୁଯାୟୀ, ସିସିଟିଭି ଫୁଟେଜ ଆଧାରରେ ଅନ୍ୟ ଅଭିଯୁକ୍ତଙ୍କୁ ଚିହ୍ନଟ କରାଯାଉଛି। ତଦନ୍ତ ଅଗ୍ରଗତି ସହ ଆହୁରି ଗିରଫ ହେବାର ସମ୍ଭାବନା ରହିଛି।

ରାୟଗଡ଼ାର ଏହି ଘଟଣା କେବଳ ଦୁଇ ଜଣ ସାମାଜିକ କର୍ମୀଙ୍କ ଉପରେ ଆକ୍ରମଣ ନୁହେଁ। ଏହା ଆଇନର ଶାସନକୁ ଚ୍ୟାଲେଞ୍ଜ କରୁଥିବା ଏକ ବିପଜ୍ଜନକ ମନୋଭାବର ପ୍ରତିଫଳନ। ଯଦି ଗୁଜବ ଆଧାରରେ ଲୋକମାନେ ନ୍ୟାୟାଧୀଶ ଓ ଜଲ୍ଲାଦ ହୋଇଯିବେ, ତେବେ ଗଣତନ୍ତ୍ର ଓ ଆଇନର ଅର୍ଥ କଣ ରହିବ? ଦୋଷୀଙ୍କ ଗିରଫ ସହିତ ସରକାର ଓ ପୋଲିସକୁ ଏଭଳି ଭିଡ଼ ହିଂସା ରୋକିବା ପାଇଁ ସ୍ଥାୟୀ ଓ କଠୋର ପଦକ୍ଷେପ ନେବାକୁ ପଡ଼ିବ।