ନୂଆଦିଲ୍ଲୀ (ସତ୍ୟପାଠବ୍ୟୁରୋ) : ନିରବଚ୍ଛିନ୍ନ ଭାବେ ୨୫ ବର୍ଷର ଜନସେବା ପୂରଣ କରିବା ଅବସରରେ ”ବିକଶିତ ଭାରତ ସଂକଳ୍ପ ସଭା”ରେ ନିଜର ଜୀବନ ଯାତ୍ରା ସମ୍ପର୍କରେ ସ୍ମୃତିଚାରଣ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜକୁ ଆଜି ବି ଜଣେ ଛାତ୍ର ବୋଲି କହିଛନ୍ତି। ବୁଧବାର ନୂଆଦିଲ୍ଲୀସ୍ଥିତ ଇନ୍ଦିରା ଗାନ୍ଧୀ ଇନଡୋର ଷ୍ଟାଡିୟମରେ ଆୟୋଜିତ ଭବ୍ୟ ସମାରୋହରେ ଦେଶବାସୀଙ୍କୁ ‘ୱି କ୍ୟାନ୍ ଡୁ ଇଟ୍’ (ଆମେ ଏହା କରିପାରିବା) ର ନୂତନ ନାରା ଦେଇ ୨୦୪୭ ସୁଦ୍ଧା ବିକଶିତ ଭାରତ, ଓଲମ୍ପିକ୍ସ ଆୟୋଜନ ଏବଂ ମହାକାଶରେ ଅଭିଯାନ ପରି ତିନୋଟି ବଡ଼ ଲକ୍ଷ୍ୟ ହାସଲ କରିବାକୁ ଆହ୍ୱାନ ଦେଇଛନ୍ତି।
୨୦୦୧ ଅକ୍ଟୋବରରେ ଗୁଜରାଟର ମୁଖ୍ୟମନ୍ତ୍ରୀ ଭାବେ କାର୍ଯ୍ୟଭାର ସମ୍ଭାଳିବା ପରଠାରୁ ୨୦୧୪ ମେ”ରୁ ଦେଶର ପ୍ରଧାନମନ୍ତ୍ରୀ ଭାବେ କାର୍ଯ୍ୟରତ ମୋଦୀ ନିଜ ବଡ଼ନଗର ସ୍କୁଲ ଦିନର ସ୍ମୃତି ମନେପକାଇ କହିଛନ୍ତି ଯେ, ସେ ସବୁବେଳେ ପ୍ରଥମେ ଶ୍ରେଣୀଗୃହରେ ପହଞ୍ଚୁଥିଲେ ଏବଂ ସେହି ଶିଖିବାର ଆଗ୍ରହ ଆଜି ବି ତାଙ୍କ ଭିତରେ ଜୀବିତ ରହିଛି। ଗଣତନ୍ତ୍ରର ଶକ୍ତି ବୁଝାଇବାରେ ତାଙ୍କର ବିରୋଧୀ ଓ ସମାଲୋଚକମାନେ ତାଙ୍କୁ ନିଜ ଭିତରେ ଆତ୍ମସମୀକ୍ଷା କରିବାରେ ବଡ଼ ସାହାଯ୍ୟ କରିଛନ୍ତି। ଦେଶବାସୀଙ୍କୁ ‘ଭଗବାନ୍’ ବୋଲି ଅଭିହିତ କରି ସେ କହିଛନ୍ତି ଯେ ଜନସାଧାରଣଙ୍କ ଅପାର ବିଶ୍ୱାସ ଯୋଗୁଁ ସେ ଆଜି ଏହି ସ୍ଥାନରେ ପହଞ୍ଚିଛନ୍ତି ଏବଂ ଦେଶବାସୀଙ୍କର ତାଙ୍କ ଉପରେ ସବୁଠାରୁ ବଡ଼ ଅଧିକାର ରହିଛି।
ଏହି ଅବସରରେ ଗୁଜରାଟର ବଡ଼ନଗରସ୍ଥିତ ହଟକେଶ୍ୱର ମହାଦେବ ମନ୍ଦିର ଏବଂ ଉତ୍ତର ପ୍ରଦେଶର ବାରାଣସୀସ୍ଥିତ କାଶୀ ବିଶ୍ୱନାଥ ଧାମଠାରେ ସେବା ଯାତ୍ରାର ଉଦଯାପନୀ ଉତ୍ସବ ଅନୁଷ୍ଠିତ ହୋଇଯାଇଛି। ବାରାଣସୀରେ ବିଜେପି ସଭାପତି ନିତିନ ନବୀନ, ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ଅସମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଏବଂ ବିଜେୱାଇଏମ୍ ସଭାପତି ହେମାଙ୍ଗ ଯୋଶୀ ପ୍ରମୁଖ ଉପସ୍ଥିତ ଥିବା ବେଳେ ବଡ଼ନଗରରେ କେନ୍ଦ୍ରମନ୍ତ୍ରୀ ଶିବରାଜ ସିଂହ ଚୌହାନ, ଗୁଜରାଟ ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ, ସୁଭେନ୍ଦୁ ଅଧିକାରୀ ଏବଂ ଭିଡି ଶର୍ମା ସେବା ଯାତ୍ରୀମାନଙ୍କୁ ସମ୍ବୋଧିତ କରିଛନ୍ତି।
