ନୂଆଦିଲ୍ଲୀ, (ସତ୍ୟପାଠବ୍ୟୁରୋ) : ୨୦୨୬ ମସିହାର ସାହିତ୍ୟ ନୋବେଲ୍ ପୁରସ୍କାର ପାଇଁ କାନାଡାର ବିଶିଷ୍ଟ ଲେଖିକା ଓ କବି ଆନ୍ କାର୍ସନଙ୍କ ନାମ ଘୋଷଣା କରାଯାଇଛି । ଗୁରୁବାର ସ୍ୱିଡିଶ୍ ଏକାଡେମୀ ପକ୍ଷରୁ ତାଙ୍କୁ ଚଳିତବର୍ଷର ସାହିତ୍ୟ ନୋବେଲ୍ ବିଜେତା ଭାବେ ଚୟନ କରାଯାଇଛି । ସାହିତ୍ୟରେ ନୂଆ ଶୈଳୀ ଓ ସୃଜନଶୀଳ ପରୀକ୍ଷା ପାଇଁ ଆନ୍ କାର୍ସନ୍ ବେଶ୍ ପରିଚିତ । ପ୍ରାଚୀନ ଗ୍ରୀକ୍ ସାହିତ୍ୟ ଓ ପରମ୍ପରାକୁ ଆଧୁନିକ ଜୀବନ ସହ ଯୋଡ଼ି ସେ ଲେଖାଲେଖି କରିଆସୁଛନ୍ତି । କବିତା, ଗଦ୍ୟ, ନିବନ୍ଧ ଓ ନାଟକର ବିଭିନ୍ନ ଶୈଳୀକୁ ମିଶାଇ ଆଧୁନିକ ସାହିତ୍ୟରେ ନୂଆ ରୂପ ସୃଷ୍ଟି କରିବା ତାଙ୍କ ରଚନାର ବିଶେଷତ୍ୱ । ସ୍ୱିଡିଶ୍ ଏକାଡେମୀ ତାଙ୍କର ସାହସିକ ଓ ଅଭିନବ ସାହିତ୍ୟ ସୃଷ୍ଟିକୁ ସ୍ୱୀକୃତି ଦେଇଛି । ପ୍ରାଚୀନ ସାହିତ୍ୟ ପରମ୍ପରା ସହ ନୂଆ ଢଙ୍ଗରେ ସମ୍ପର୍କ ସ୍ଥାପନ କରି ଆଧୁନିକ ସାହିତ୍ୟ ପାଇଁ ନୂତନ ରୂପ ସୃଷ୍ଟି କରିଥିବାରୁ ତାଙ୍କୁ ଏହି ସମ୍ମାନ ପାଇଁ ଚୟନ କରାଯାଇଛି । ଆନ୍ କାର୍ସନଙ୍କ ଜନ୍ମ ୧୯୫୦ ମସିହାରେ କାନାଡାରେ ହୋଇଥିଲା । ସେ ଜଣେ କବି, ନିବନ୍ଧକାର, ଅନୁବାଦିକା ଓ ପ୍ରାଚୀନ ଗ୍ରୀକ୍ ସାହିତ୍ୟର ଗବେଷିକା । ତାଙ୍କର ପ୍ରସିଦ୍ଧ ପୁସ୍ତକ ମଧ୍ୟରେ ଅଟୋ ବାୟୋଗ୍ରାଫୀ ଅଫ ରେଡ୍୍, ଦ ବିୟୁଟି ଅଫ ଦ ହସବ୍ୟାଣ୍ଡ, ଏବଂ ନୋକ୍ସ ରହିଛି । ୨୦୦୧ରେ ଦ ବିୟୁଟି ଅଫ ଦ ହସବ୍ୟାଣ୍ଡ ପାଇଁ ସେ ଟି.ଏସ୍. ଏଲିଅଟ୍ ପୁରସ୍କାର ମଧ୍ୟ ପାଇଥିଲେ । ଚଳିତବର୍ଷ ନୋବେଲ୍ ପୁରସ୍କାରର ଅର୍ଥରାଶି ରହିଛି ୧ କୋଟି ୨୦ ଲକ୍ଷ ସ୍ୱିଡିଶ୍ କ୍ରୋନା । ଡିସେମ୍ବର ୧୦ ତାରିଖରେ ଷ୍ଟକହୋମରେ ଆୟୋଜିତ ସମାରୋହରେ ତାଙ୍କୁ ଆନୁଷ୍ଠାନିକ ଭାବେ ପୁରସ୍କାର ପ୍ରଦାନ କରାଯିବ ।
