ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଛାତ୍ରୀ ନିଖୋଜ ହେବାର ଦଶ ମାସ ପରେ ଘରକୁ ଆସିଲା ବେନାମୀ ଚିଠି। ଆଉ ଏହି ଚିଠି ଖୋଲିଲା ଝିଅ ନିଖୋଜ ହେବାର ରହସ୍ୟ। ମାଟି ତଳୁ ଉଦ୍ଧାର ହେଲା ନିଖୋଜ ଛାତ୍ରୀଙ୍କ କଙ୍କାଳ। ଆଜି ଏହି ଘଟଣା ସାମ୍ନାକୁ ଆସିବା ପରେ ଏବେ ସାରା ରାଜ୍ୟରେ ଏହା ଚର୍ଚ୍ଚାର ବିଷୟ ପାଲଟିଛି। ଏହି ମାମଲାରେ ନୂଆପଡ଼ା ସଦର ଥାନା ପୁଲିସ୍ ଏହି ମାମଲାରେ ୬ ଜଣଙ୍କୁ ଅଟକ ରଖି ପଚରାଉଚରା କରୁଛି। ହେଲେ ହତ୍ୟାର କାରଣ ଜଣାପଡ଼ି ନାହିଁ।
ସୂଚନା ଅନୁସାରେ, ନୂଆପଡା ସଦର ଥାନା ଅନ୍ତର୍ଗତ ରତିପାଲି ଗାଁର ଧନିରାମ ନାଏକଙ୍କ ଝିଅ ହିତେଶ୍ୱେରୀ କଲେଜରେ ପଢ଼ୁଥିଲେ। ଗତ ୨୦୨୨ ଜାନୁଆରୀ ୩ ତାରିଖ ରାତିରେ ସେ କେଉଁ ଆଡ଼େ ଚାଲି ଯାଇଥିଲେ। ପରିବାର ଲୋକ ବହୁ ଖୋଜାଖୋଜି କରିଥିଲେ ମଧ୍ୟ ତାଙ୍କର ପତ୍ତା ପାଇନଥିଲେ। ପରେ ଏନେଇ ନୂଆପଡା ସଦର ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି ପୁଲିସ ମାମଲା ରୁଜୁ କରି ଚୁପ୍ ବସିଥିଲା।
ତେବେ ହିତେଶ୍ୱେରୀ ନିଖୋଜ ହେବାର ୧୦ ମାସ ପରେ ଡାକରେ ଘରକୁ ଏକ ବେନାମୀ ଚିଠି ଆସିଲା। ସେହି ଚିଠିରେ ରହିଥିଲା ବିସ୍ଫୋରକ ତଥ୍ୟ। ହିତେଶ୍ୱେରୀକୁ ହତ୍ୟା କରାଯାଇଥିବା ଚିଠିରେ ଉଲ୍ଲେଖ ରହିଛି। ପରିବାର ଲୋକେ ସେହି ଚିଠିକୁ ଧରି ଥାନାରେ ପହଞ୍ଚି ଥିଲେ। ପୁଲିସ ଚିଠିକୁ ଜବତ କରି ତଦନ୍ତ ଆରମ୍ଭ କରିଥିଲେ। ଅପମୃତ୍ୟୁ ମାମଲାକୁ ହତ୍ୟା ମାମଲାରେ ରୂପାନ୍ତରିତ କରିଥିଲା। ଚିଠିରେ ଲେଖାଯାଇଥିବା ଯୁବକଙ୍କ ପାଖରେ ପୁଲିସ୍ ପହଞ୍ଚିଥିଲା। ସେମାନଙ୍କୁ ଘନ ଘନ ଜେରା କରିଥିଲା। ଜେରା ବେଳେ ୬ ଅଭିଯୁକ୍ତ ନିଜ ଦୋଷ ସ୍ୱୀକାର କରିଥିଲେ। ଏହା ପରେ ପୁଲିସ୍ ୬ ଅଭିଯୁକ୍ତଙ୍କୁ ଧରି ରତିପାଲି ଗାଁରେ ପହଞ୍ଚିଥିଲା। ଆଉ ଧାନ ବିଲରେ ପୋତା ଯାଇଥିବା ହିତେଶ୍ୱେରୀଙ୍କ ନରକଙ୍କାଳ ଉଦ୍ଧାର କରିଥିଲା। ଏହାପରେ ଏହି ଘଟଣାରେ ୬ ଜଣଙ୍କୁ ନେଇ ଘଟଣାର ସିନ୍ ରିକ୍ରିଏସନ କରିଥିଲା ପୁଲିସ୍। ତେବେ କେଉଁ କାରଣର ଏପରି କାଣ୍ଡ ଘଟାଇଲେ, ତାହା ବର୍ତ୍ତମାନ ସୁଦ୍ଧା ଜଣାପଡ଼ି ନାହିଁ।
ସେପଟେ ହତ୍ୟାକାରୀଙ୍କୁ ଫାଶି ଦେବାକୁ ପରିବାର ଲୋକ ଦାବି କରିଛନ୍ତି। ତଦନ୍ତ ଚାଲୁ ଥିବାରୁ ପୁଲିସ କୌଣସି ମତାମତ ଦେବାକୁ ମନା କରିଛି। ତେବେ ୧୦ ମାସ ତଳେ ହତ୍ୟାକାଣ୍ଡ ଘଟିଥିବା ବେଳେ ଏତେଦିନ ଯାଏଁ କ’ଣ କରୁଥିଲା ପୁଲିସ୍? ପୁଲିସ୍ ତଦନ୍ତ କରୁଥିଲା ନା ମାମଲା ରୁଜୁ କରି ଚୁପ୍ ବସିଥିଲା। ଅନ୍ୟପକ୍ଷରେ ପରିବାର ଲୋକଙ୍କ ପାଖକୁ ଆସିଥିବା ବେନାମୀ ଚିଠି ପଠାଇଲା କିଏ? ସିଏ କାହିଁକି ନିଜ ନାଁ ଗୁପ୍ତ ରଖିବାକୁ ଚାହୁଁଥିଲେ? କ’ଣ ତାଙ୍କର ପୁଲିସ ଉପରେ ଭରସା ନାହିଁ କି? ୧୦ ମାସ ପରେ ମୃତଦେହ ମିଳିବା ପରେ ପୁଲିସ ଏମିତି ନାନା ପ୍ରଶ୍ନବାଚୀ ଭିତରେ ଛନ୍ଦି ହୋଇ ପଡ଼ିଛି।
