ମୁମ୍ବାଇ: ଆଜି ବିହାର ମନ୍ତ୍ରିମଣ୍ଡଳର ସଂପ୍ରସାରଣ ହୋଇଛି । ଅପରାହ୍ନରେ ନୂତନ ମନ୍ତ୍ରୀମାନଙ୍କ ମଧ୍ୟରେ ବିଭାଗ ବଣ୍ଟନ କରିଛନ୍ତି ମୁଖ୍ୟମନ୍ତ୍ରୀ ନୀତୀଶ କୁମାର। ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ସବୁଠାରୁ ଗୁରୁତ୍ୱପୂର୍ଣ୍ଣ ଗୃହ ବିଭାଗକୁ ନିଜ ନିକଟରେ ବଜାୟ ରଖି ରାଜ୍ୟ ପୁଲିସ ଉପରେ ନିଜର ସିଧାସଳଖ ନିୟନ୍ତ୍ରଣ ରଖିଛନ୍ତି। ମୁଖ୍ୟମନ୍ତ୍ରୀ ନୀତୀଶ କୁମାର ଏଥିସହ ତାଙ୍କ ନିକଟରେ ସାଧାରଣ ପ୍ରଶାସନ, କ୍ୟାବିନେଟ ସଚିବାଳୟ, ନିର୍ବାଚନ ଏବଂ ଅନ୍ୟ କାହାକୁ ବଣ୍ଟନ ହୋଇ ନଥିବା ବିଭାଗଗୁଡ଼ିକୁ ମଧ୍ୟ ନିଜ ନିକଟରେ ରଖିଛନ୍ତି ବୋଲି ଏକ ସରକାରୀ ବିଜ୍ଞପ୍ତିରେ କୁହାଯାଇଛି।
ମୋଟ ୩୧ଜଣ ବିଧାୟକ ଶପଥ ଗ୍ରହଣ କରିଥିବା ବେଳେ ଆଜି ସେମାନଙ୍କୁ ବିଭାଗ ବଣ୍ଟନ କରିଛନ୍ତି ନୀତୀଶ। ତେବେ ନୀତୀଶ କ୍ୟାବିନେଟରେ ମନ୍ତ୍ରୀ ହୋଇଥିବା ୩୧ଜଣଙ୍କ ମଧ୍ୟରୁ ଏପରି ଅନେକ ନେତା ଅଛନ୍ତି ଯେଉଁମାନଙ୍କ ବିରୋଧରେ ଅନେକ ଅପରାଧିକ ମାମଲା ରହିଛି। ତେଜସ୍ୱୀ ଯାଦବ, ଲେଶୀ ସିଂ, ତେଜ ପ୍ରତାପ ଯାଦବଙ୍କ ସମେତ ୧୦ଜଣ ମନ୍ତ୍ରୀଙ୍କ ବିରୋଧରେ ଅନେକ ଅପରାଧିକ ମାମଲା ରହିଥିବା ସତ୍ତ୍ବେ ସେମାନଙ୍କୁ ମନ୍ତ୍ରୀ କରିଛନ୍ତି ନୀତୀଶ।
ତେବେ ଉପ ମୁଖ୍ୟମନ୍ତ୍ରୀ ତେଜସ୍ୱୀ ପ୍ରସାଦ ଯାଦବଙ୍କୁ ସ୍ୱାସ୍ଥ୍ୟ, ସଡ଼କ ନିର୍ମାଣ, ସହରୀ ଗୃହ ନିର୍ମାଣ ଏବଂ ବିକାଶ ଏବଂ ଗ୍ରାମୀଣ କାର୍ଯ୍ୟ ଭଳି ପ୍ରମୁଖ ବିଭାଗ ମିଳିଛି। ଯାଦବଙ୍କ ବଡ ଭାଇ ତେଜ ପ୍ରତାପ ଯାଦବଙ୍କୁ ପରିବେଶ, ବନୀକରଣ ଏବଂ ଜଳବାୟୁ ପରିବର୍ତ୍ତନ ଦିଆଯାଇଛି। ମୁଖ୍ୟମନ୍ତ୍ରୀ ଏବଂ ଉପମୁଖ୍ୟମନ୍ତ୍ରୀଙ୍କ ବ୍ୟତୀତ କେବଳ ବିଜୟ କୁମାର ଚୌଧୁରୀ (ଅର୍ଥ, ବାଣିଜ୍ୟିକ ଟିକସ ଏବଂ ସଂସଦୀୟ ବ୍ୟାପାର) ଏବଂ ବିଜେନ୍ଦ୍ର ଯାଦବ (ଶକ୍ତି ଏବଂ ଯୋଜନା ଏବଂ ବିକାଶ) ଏକରୁ ଅଧିକ ବିଭାଗ ପାଇଛନ୍ତି।
