ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଖାକି ବର୍ଦିରେ ପାର୍ଲରରେ ବସି ମହିଳାଙ୍କ ହାତରୁ ମସାଜ କରାଇଲେ ପୁଲିସ ବାବୁ। ହେଲେ ମସାଜ କରାଇବା ପୁଲିସ ବାବୁଙ୍କୁ ପଡ଼ିଲା ମହଙ୍ଗା ଆଉ ସସ୍ପେଣ୍ଡ ମଧ୍ୟ ହେଲେ। ଉତ୍ତରପ୍ରଦେଶର ପ୍ରୟାଗରାଜରୁ ସାମ୍ନାକୁ ଆସିଛି କିଛି ଏଭଳି ଘଟଣା, ଯାହାର ଭିଡିଓ ଏବେ ସୋଶାଲ ମିଡିଆରେ ଭାଇରାଲ ହେବାରେ ଲାଗିଛି।ଉତ୍ତରପ୍ରଦେଶର ସିଭିଲ ଲାଇନ୍ ସ୍ଥିତ ଏକ ୟୁନିସେକ୍ସ ପାର୍ଲରରେ ସୁଭାଷ ଚେକ୍ ପୋଷ୍ଟରରେ ନିୟୋଜିତ ଥିବା ଇନ୍ସପେକ୍ଟର ରାକେଶ ଚନ୍ଦ୍ର ଶର୍ମା ଏକ ଚେୟାରରେ ବସିଛନ୍ତି। ଜଣେ ମହିଳା ତାଙ୍କୁ ମାଲିସ୍ କରୁଛନ୍ତି। ପାର୍ଲରରେ ବସି ମସାଜ ଖାଉଥିବା ପୁଲିସ ବାବୁଙ୍କ ଏହି ଭିଡିଓକୁ କେହି ଜଣେ ବ୍ୟକ୍ତି ସୋଶାଲ ମିଡିଆରେ ସେୟାର କରିବା ପରେ ହଇଚଇ ସୃଷ୍ଟି ହୋଇଛି।
କୁହାଯାଉଛି, ଏହି ଭିଡିଓଟି ଏକ ସପ୍ତାହ ପୂର୍ବର। ଭିଡିଓ ଭାଇରାଲ ହେବା ପରେ ଘଟଣାର ତଦନ୍ତ କରାଯାଇଥିଲା। ଶୁକ୍ରବାର ବିଳମ୍ବିତ ରାତିରେ ତଦନ୍ତ ରିପୋର୍ଟ ଆସିବା ପରେ ଇନ୍ସପେକ୍ଟର ରାକେଶ ଚନ୍ଦ୍ର ଶର୍ମାଙ୍କୁ ନିଲମ୍ବନ କରାଯାଇଛି। ତେବେ ନିଲମ୍ବନର କାରଣ କ’ଣ, ତାହା ସ୍ପଷ୍ଟ ଭାବେ କିଛି ଜଣାଇନାହିଁ ପୁଲିସ।
ଉଲ୍ଲେଖଯୋଗ୍ୟ ଯେ, ଗତ ଦୁଇ ଦିନ ପୂର୍ବେ ସିଭିଲ୍ ଲାଇନ୍ସରେ ଏକ ମସାଜ ପାର୍ଲର୍ରେ ମହିଳା କର୍ମଚାରୀଙ୍କୁ ଦୁର୍ବ୍ୟବହାର କରିବା ଅଭିଯୋଗରେ ଜଣେ ପୁଲିସ ଅଫିସର୍ଙ୍କୁ ଗିରଫ କରାଯାଇଥିଲା। ପୁଲିସ ବାବୁ ଜଣକ ମସାଜ ପାର୍ଲରକୁ ଆସି ମହିଳାଙ୍କ ସହ ଅସଦାଚରଣ କରିବା ସହ ପାଟିତୁଣ୍ଡ କରିଥିଲେ, ଯାହାର ଭିଡିଓ ସୋଶାଲ ମିଡିଆରେ ଭାଇରାଲ ହୋଇଥିଲା।
