ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ୨୦୨୩ ଫେବ୍ରୁଆରୀରୁ ଭାରତର ପ୍ରଥମ ସ୍ବଦେଶୀ ମାନବବାହୀ ମହାକାଶ ଅଭିଯାନ ‘ଗଗନଯାନ’ର ସିରିଜ୍ ପରୀକ୍ଷଣ ଆରମ୍ଭ କରିବ ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ (ଇସ୍ରୋ)। ଫେବୃଆରୀରେ ଗଗନଯାନ ମିଶନର ପ୍ରଥମ ପରୀକ୍ଷଣ ହେବ । ଏନେଇ ଗୁରୁବାର ଗବେଷଣା ସଂସ୍ଥାନର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି ।
ସ୍ପେସ୍ ଏଜେନ୍ସି କ୍ରୁ ମଡ୍ୟୁଲ୍ ପରୀକ୍ଷା କରିବା ପାଇଁ ହେଭି-ଲିଫ୍ଟ ଚିନୁକ୍ ହେଲିକପ୍ଟର ଏବଂ ସି-୧୭ ଗ୍ଲୋବମାଷ୍ଟର ପରିବହନ ବିମାନ ନିୟୋଜିତ କରିବାକୁ ଯୋଜନା କରିଛି, ଯାହା ଗଗନଯାନ ମାନବ ମହାକାଶ ଉଡ଼ାଣ ମିଶନର ତିନି ଦିନ ପାଇଁ ମହାକାଶଚାରୀଙ୍କୁ କକ୍ଷପଥରେ ନେବ ବୋଲି ଇସ୍ରୋର ମାନବ ସ୍ପେସ୍ ଫ୍ଲାଇଟ୍ ସେଣ୍ଟର ନିର୍ଦ୍ଦେଶକ ଆର୍ ଉମାମହେଶ୍ବରନ୍ କହିଛନ୍ତି ।
ଇଣ୍ଡିଆ ସ୍ପେସ୍ କଂଗ୍ରେସକୁ ସମ୍ବୋଧିତ କରି ସେ କହିଛନ୍ତି ଯେ, ଇସ୍ରୋର ବୈଜ୍ଞାନିକମାନେ ପରିବେଶ ନିୟନ୍ତ୍ରଣ ପ୍ରଣାଳୀର ଡିଜାଇନ୍ ସମାପ୍ତ କରିଛନ୍ତି, ଯାହା ପୃଥିବୀ ପରିକ୍ରମା କରିବା ସମୟରେ କ୍ରୁ ସର୍ଭିସ୍ ମଡ୍ୟୁଲରେ ମହାକାଶଚାରୀଙ୍କ ପାଇଁ ପରିବେଶର ଅବସ୍ଥା ନିଶ୍ଚିତ କରିବ । ଆସନ୍ତା ବର୍ଷ ଡିସେମ୍ବରରେ ମାନବ ବିହୀନ ମହାକାଶ ଉଡ଼ାଣ କରିବା ପୂର୍ବରୁ ଇସ୍ରୋ ଦ୍ବାରା ଅତି କମରେ ୧୭ଟି ଭିନ୍ନ ପରୀକ୍ଷା ଯୋଜନା କରାଯାଇଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨୦୧୮ ସ୍ବାଧୀନତା ଦିବସ ଅଭିଭାଷଣରେ ଗଗନଯାନ ମିଶନ ନେଇ ଘୋଷଣା କରିଥିଲେ, ଯାହା ୨୦୨୨ ମସିହାରେ ହାସଲ କରିବାର ଲକ୍ଷ୍ୟ ରହିଥିଲା । ମାତ୍ର କୋଭିଡ ମହାମାରୀ କାରଣରୁ ମିଶନରେ ବିଳମ୍ବ ଘଟିଥିଲେ ମଧ୍ୟ ପ୍ରଥମ ଭାରତୀୟ ମହାକାଶଚାରୀମାନେ ୨୦୨୪ ଶେଷ କିମ୍ବା ୨୦୨୫ ପ୍ରାରମ୍ଭ ସୁଦ୍ଧା ମହାକାଶରେ ଅବତରଣ କରିବାର ସମ୍ଭାବନା ରହିଛି । ଏହି ଅଭିଯାନରେ ୪ ଜଣ ମହାକାଶଚାରୀଙ୍କୁ ୭ ଦିନ ପାଇଁ ମହାକାଶକୁ ପଠାଯିବ । ଏଥିପାଇଁ ମନୋନୀତ ମହାକାଶଚାରୀଙ୍କ ତାଲିମ୍ ପ୍ରକ୍ରିୟା ମଧ୍ୟ ଶେଷ ହୋଇଛି ।
ଏନେଇ ଉମାମହେଶ୍ୱରନ୍ କହିଛନ୍ତି ଯେ, କ୍ରୁ ମଡ୍ୟୁଲ୍ ଏବଂ ପରିବେଶ ନିୟନ୍ତ୍ରଣ ପ୍ରଣାଳୀର ପରିକଳ୍ପନା କରିବା ଏକ ଆହ୍ବାନ ଥିଲା । କାରଣ ଯେତେବେଳେ ସ୍ପେସ୍ କ୍ୟାପସୁଲ ବାହାରେ ତାପମାତ୍ରା ୨୦୦୦ ଡିଗ୍ରୀ ସେଲସିୟସରେ ପହଞ୍ଚିପାରେ, ସେତେବେଳେ ପୁନଃପ୍ରବେଶ ପର୍ଯ୍ୟାୟରେ ମହାକାଶଚାରୀମାନେ ଆରାମଦାୟକ ଅନୁଭବ କରିବା ଉଚିତ । ସାଟକମ୍ ଇଣ୍ଡଷ୍ଟ୍ରି ଆସୋସିଏସନ୍ ଦ୍ବାରା ଆୟୋଜିତ ଏହି କାର୍ଯ୍ୟକ୍ରମରେ ସେ କହିଛନ୍ତି ଯେ, କ୍ରୁ ମଡ୍ୟୁଲ୍, ଯେଉଁଠାରେ ମହାକାଶଚାରୀମାନେ ବସି ଉଡ଼ିବା ଉଚିତ୍, ତାହା ସମ୍ପୂର୍ଣ୍ଣ ହୋଇଛି ଏବଂ ନିର୍ମାଣ କାର୍ଯ୍ୟ ଚାଲିଛି । ଛଅ ମାସ ମଧ୍ୟରେ ଆମେ କ୍ରୁ ମଡ୍ୟୁଲ୍ ପାଇବୁ ବୋଲି ସେ ସୂଚନା ଦେଇଛନ୍ତି ।
