(ସତ୍ଯପାଠ ବ୍ୟୁରୋ) ଭୁବନେଶ୍ୱର : ମହାରାଷ୍ଟ୍ର ଶାସନ କ୍ଷମତାରେ ଥିବା ମହାବିକାଶ ଅଗାଡି ସରକାର ମଧ୍ୟରେ ପୁଣି ଥରେ ମତଭେଦ ଦେଖାଦେଇଛି। ମହାରାଷ୍ଟ୍ର କଂଗ୍ରେସ ସଭାପତି ନାନା ପାଟୋଲେ ଉଦ୍ଧବ ସରକାରଙ୍କ ବିରୋଧରେ ସାଙ୍ଘାତିକ ଅଭିଯୋଗ ଆଣିଛନ୍ତି। ଉଲ୍ଲେଖଯୋଗ୍ୟ ଯେ ମହା ବିକାଶ ଅଗାଡୀ ସରକାରରେ କଂଗ୍ରେସ, ଶିବସେନା ଏବଂ ଏନସିପି ଏକାଠି ସରକାର ଗଠନ କରିଛନ୍ତି।
ପୁଣେର ଲୋନାଭାଲାରେ କଂଗ୍ରେସ ଜିଲ୍ଲା କମିଟି ବୈଠକରେ ନାନା ପାଟୋଲ କହିଛନ୍ତି ଯେ ମୁଖ୍ୟମନ୍ତ୍ରୀ ଓ ଗୃହମନ୍ତ୍ରୀଙ୍କ ପଦବୀ ଶିବସେନା ଏବଂ ଏନସିପି ହାତରେ ରହିଛି । ସେମାନେ ସବୁକିଛି ବିଷୟରେ ରିପୋର୍ଟ ପାଆନ୍ତି। କିଏ କେଉଁଠି ବିରୋଧ କରୁଛି, ସେମାନେ ଆବଶ୍ୟକ କରୁଥିବା ସମସ୍ତ ସୂଚନା ସେମାନଙ୍କ ନିକଟରେ ପହଞ୍ଚିବାରେ ଲାଗିଛି । ମୁଁ ଜାଣେ ମୁଁ କଣ କରୁଛି। ସିଏମ୍ ଏବଂ ଡେପୁଟି ସିଏମ୍ ମୋ ଉପରେ ନଜର ରଖିଛନ୍ତି। ମୋର କାର୍ଯ୍ୟକଳାପ ପ୍ରତ୍ୟେକ ଦିନ ସକାଳ ୯ ଟାରେ ସିଏମ୍ ଏବଂ ଡେପୁଟି ସିଏମ୍ କୁ ଗୁପ୍ତଚର ବିଭାଗ ଦ୍ୱାରା ଜଣାଯାଇଥାଏ। ମୁଁ କେଉଁ ପ୍ରୋଗ୍ରାମକୁ ଯାଉଛି, କେଉଁ ପ୍ରୋଗ୍ରାମରେ ବିଳମ୍ବରେ ପହଞ୍ଚୁଛି ଏବଂ କେଉଁ ପ୍ରୋଗ୍ରାମ କ୍ୟାନସଲ କରୁଛି , ଏହା ବିଷୟରେ ସମସ୍ତ ସୂଚନା CM କୁ ଦିଆଯାଇଛି ।
ଏହା ବ୍ୟତୀତ ସେ କହିଛନ୍ତି ଯେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ମୋ ସହ ସାକ୍ଷାତ କରି କହିଛନ୍ତି- ‘ମହାରାଷ୍ଟ୍ର ହେଉଛି କଂଗ୍ରେସର ଗଡ ଏହାକୁ ପୁଣି ଥରେ ଫେରାଇ ଆଣିବାକୁ ପଡିବ।’ ପାଟୋଲ କଂଗ୍ରେସ କର୍ମୀଙ୍କୁ କହିଛନ୍ତି, ପୁଣେରେ ପାଳିତ ମନ୍ତ୍ରୀମାନେ ଆମ କଥା ଶୁଣନ୍ତି ନାହିଁ। ଆମେ ଏଥିପାଇଁ ଅଭିଯୋଗ କରିବା ଉଚିତ୍ ନୁହେଁ, କିନ୍ତୁ ଏଥିରୁ ପ୍ରେରଣା ନିଅ ଏବଂ ଆମର ଉଦ୍ୟମ ଜାରି ରଖ। ତେଣୁ ଦିନେ ନା ଦିନେ ଏହି ଚେୟାର ଆମର ହେବ । “ଭୟ କର ନାହିଁ, କାମ କରି ଚାଲ। “
ସେ ଆହୁରି ମଧ୍ୟ କହିଛନ୍ତି ଯେ, ” ମୁଁ ଯେତେବେଳେ ପୁଣେକୁ ଆସେ, ଦାଦା (ଅଜିତ ପାୱାର) ଙ୍କ ପେଟ ଯନ୍ତ୍ରଣା ହୁଏ। ” ଏହି ବୈଠକରେ ମହାରାଷ୍ଟ୍ର କଂଗ୍ରେସ ସଭାପତି କହିଛନ୍ତି ଯେ ମୋତେ ପଚରାଯାଇଥିଲା ମୋର ରାଜନୈତିକ ଗୁରୁ କିଏ, ତା’ପରେ ମୁଁ ପ୍ରଫୁଲ୍ଲ ପଟେଲ କହିଲି। ସମସ୍ତେ ଆଶ୍ଚର୍ଯ୍ୟ ହୋଇଗଲେ ଯେ ମୋର ତାଙ୍କ ସହିତ ଶତ୍ରୁତା ଅଛି, ତେବେ ଗୁରୁ କିପରି କହୁଛି। ମୁଁ କହିଲି ଯେ ମୁଁ କରିଥିବା ସମସ୍ତ କାର୍ଯ୍ୟରେ ସେ ବାଧା ସୃଷ୍ଟି କରି ମୋତେ ସଂଙ୍ଘର୍ଷ କରିବା ଶିଖାଇଥିଲେ।
ନାନା ପାଟୋଲେ କହିଛନ୍ତି ଯେ ତୃଣମୂଳ ସ୍ତରରେ କଂଗ୍ରେସ ଅଧିକ ଶକ୍ତିଶାଳୀ ହେଉଛି ଓ ଉଭୟ ଏନସିପି-ଶିବସେନା ଏହାକୁ ଡରୁଛନ୍ତି। ଜୁନ୍ ମାସରେ ନାନା ପାଟୋଲେ ମହାମେଣ୍ଟରେ ମତଭେଦ ସଙ୍କେତ ଦେଇଥିଲେ। ସେ କହିଥିଲେ ଯେ ଏହା ଏକ ଅସ୍ଥାୟୀ ମେଣ୍ଟ। ବିଜେପିକୁ ରୋକିବା ପାଇଁ ଆମେ ୨୦୧୯ରେ ପାଞ୍ଚ ବର୍ଷ ପାଇଁ ମହା ବିକାଶ ଅଗାଡି ଗଠନ କରିଛୁ। ତେଣୁ ଏହା ଏକ ସ୍ଥାୟୀ ମେଣ୍ଟ ନୁହେଁ।
ସୂଚନାଯୋଗ୍ୟ ଯେ, ୨୦୧୯ ବିଧାନସଭା ନିର୍ବାଚନ ପରେ ଭାରତୀୟ ଜନତା ଦଳ ସରକାର ଗଠନ ନକରିବାକୁ ଏନସିପି ମୁଖ୍ୟ ଶରଦ ପାୱାରଙ୍କ ଉଦ୍ୟମ ଯୋଗୁଁ ଆଦର୍ଶଗତ ଭିନ୍ନ କଂଗ୍ରେସ ଓ ଶିବସେନା ଏକାଠି ହୋଇଥିଲେ। କିନ୍ତୁ ଗତ ସପ୍ତାହରେ ଗଠବନ୍ଧନରେ ମତଭେଦ ବୃଦ୍ଧି ପାଇଥିଲା। ନିକଟରେ ମୁଖ୍ୟମନ୍ତ୍ରୀ ଉଦ୍ଧବ ଠାକରେ ପ୍ରଧାନମନ୍ତ୍ରୀ ମୋଦିଙ୍କୁ ଭେଟିଥିଲେ। ଯେଉଁ କାରଣରୁ ବିଜେପି ଶିବସେନା ସମ୍ପର୍କକୁ ନେଇ କଳ୍ପନାଜଳ୍ପନା ଆରମ୍ଭ ହୋଇଥିଲା।
