ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ତାମିଲନାଡୁର କନ୍ୟାକୁମାରୀଠାରୁ ଆରମ୍ଭ ହୋଇଥିବା କଂଗ୍ରେସର ‘ଭାରତ ଯୋଡ଼ୋ ଯାତ୍ରା’ ଏବେ ତେଲେଙ୍ଗାନାରେ ପହଞ୍ଚିଛି। ରାହୁଲ ଗାନ୍ଧୀଙ୍କ ନେତୃତ୍ଵରେ ଆଜି ହାଇଦ୍ରାବାଦ ସହରରୁ ଏହି ଯାତ୍ରା ଆରମ୍ଭ ହୋଇଥିଲା। ତେବେ କଂଗ୍ରେସ ଦଳର ‘ଭାରତ ଯୋଡ଼ୋ ଯାତ୍ରା’ ପ୍ରତି ସମର୍ଥନ ଜଣାଇ ବିଶିଷ୍ଟ ବଲିଉଡ୍ ଅଭିନେତ୍ରୀ ପୂଜା ଭଟ୍ଟ ଆଜି ସକାଳେ ସ୍ବଳ୍ପ ସମୟ ପାଇଁ କଂଗ୍ରେସ ନେତା ରାହୁଲ୍ ଗାନ୍ଧୀଙ୍କ ସହିତ ଏହି ଯାତ୍ରାରେ ଯୋଗ ଦେଇଥିଲେ।
ପ୍ରାପ୍ତ ସୂଚନା ଅନୁସାରେ, ଆଜି ସକାଳେ ପଦଯାତ୍ରା ହାଇଦ୍ରାବାଦ ସହର ଦେଇ ଯିବା ବେଳେ ଅଭିନେତ୍ରୀ ପୂଜା ଭଟ୍ଟ ରାହୁଲ୍ ଗାନ୍ଧୀ ଓ ଅନ୍ୟାନ୍ୟ କଂଗ୍ରେସ ନେତାଙ୍କ ସଙ୍ଗରେ କିଛି ବାଟ ପର୍ଯ୍ୟନ୍ତ ଚାଲିବା ପରେ ଫେରି ଆସିଥିଲେ।
ଅନ୍ୟପଟେ ଆଜି ୫୬ ଦିନରେ ପହଞ୍ଚି ଥିବା ‘ଭାରତ ଯୋଡ଼ୋ ଯାତ୍ରା’ ବିଷୟରେ ଟୁଇଟ୍ କରି କଂଗ୍ରେସ ଦଳ ଲେଖିଛି ଯେ, ପ୍ରତି ଦିନ ନୂଆ ନୂଆ ଇତିହାସ ସୃଷ୍ଟି ହେଉଛି, ପ୍ରତ୍ୟେକ ଦିନ ଦେଶରେ ଶ୍ରଦ୍ଧା କରୁଥିବା ଜନତାଙ୍କ ସଂଖ୍ୟା ବୃଦ୍ଧି ପାଉଛି। ଏଥିସହ ପୂଜା ଭଟ୍ଟ ଯାତ୍ରାରେ ଯୋଗ ଦେବାର ଫଟୋ ଓ ଭିଡିଓ ମଧ୍ୟ ପୋଷ୍ଟ୍ କରାଯାଇଛି। ଭିଡିଓରେ ଦେଖାଯାଉଛି, ଯାତ୍ରାରେ ଯୋଗ ଦେଇ ପୂଜା ରାହୁଲ୍ ଗାନ୍ଧୀଙ୍କ ସହିତ କରମର୍ଦ୍ଦନ କରୁଛନ୍ତି। ଦୁହେଁ କିଛି ଆଳାପ ମଧ୍ୟ କରୁଛନ୍ତି।
ସୂଚନାଯୋଗ୍ୟ ଯେ, ତେଲେଙ୍ଗାନାରେ ‘ଭାରତ ଯୋଡ଼ୋ ଯାତ୍ରା’ କିଛି ମାତ୍ରାରେ ‘ଷ୍ଟାର୍ ପାୱାର୍’ ସମର୍ଥନ ପାଉଛି। ଭାରତୀୟ କ୍ରିକେଟ୍ ଟିମ୍ର ପୂର୍ବତନ ଅଧିନାୟକ ତଥା ତେଲେଙ୍ଗାନା ପ୍ରଦେଶ କଂଗ୍ରେସ କମିଟିର ଅନ୍ୟତମ କାର୍ଯ୍ୟକାରୀ ସଭାପତି ମହମ୍ମଦ ଆଝାରୁଦ୍ଦିନ୍ ମଧ୍ୟ ଏହି ଯାତ୍ରାରେ ଯୋଗ ଦେଇଥିଲେ। ଦକ୍ଷିଣ ଅଭିନେତ୍ରୀ ପୂନମ୍ କୌର୍ ମଧ୍ୟ ଏଥିରେ ଯୋଗ ଦେଇ ରାହୁଲ୍ ଗାନ୍ଧୀଙ୍କ ସହିତ ଚାଲିଥିଲେ। ଅନ୍ୟପଟେ ହାଇଦ୍ରାବାଦ ବିଶ୍ଵବିଦ୍ୟାଳୟର ସ୍ୱର୍ଗୀୟ ଦଳିତ ଛାତ୍ର ରୋହିତ ବେମୁଲାଙ୍କ ମାଆ ମଧ୍ୟ ଗତକାଲି ଏହି ଯାତ୍ରାକୁ ସମର୍ଥନ କରି ରାହୁଲ ଗାନ୍ଧୀଙ୍କ ସହ ଯୋଗ ଦେଇଥିଲେ।
