ପ୍ରେମ ବଢିଲା, ପ୍ରତିବାଦ କମିଲା ! ତୈଳଦର ବୃଦ୍ଧି ନେଇ ନିରବ ନବୀନ

611

ଆଗରୁ ପେଟ୍ରୋଲ ଓ ଡିଜେଲ ଦର ବଢିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଚଉଦ ପୁରୁଷ ଉଝାଳନ୍ତି ବିଜେଡିର କୁହାଳିଆ ତୁଣ୍ଡ ମାନେ । ସଂଜୟ ଦାସବର୍ମାଙ୍କ ଠାରୁ ନେଇ ଶସ୍ମିତ ପାତ୍ରଙ୍କ ଯାଏ ନନଷ୍ଟପ ସମାଲୋଚନା କରନ୍ତି ବିଜେପିକୁ । କଥା ସେତିକିରେ ସରେନି ରାଜଭବନକୁ ଘନଘନ ଦୌଡନ୍ତି ପ୍ରତିବାଦ କରିବାକୁ । ରାଜମହଲରେ ପିକେଟିଂ ହୁଏ, ପେଟ୍ରୋଲ ପମ୍ପ ସମ୍ମୁଖରେ ବିକ୍ଷୋଭ ପ୍ରଦର୍ଶନ ହୁଏ । ହେଲେ ଏଥର କେନ୍ଦ୍ର ବଜେଟ ଉପସ୍ଥାପନର ୨୪ ଘଣ୍ଟା ଭିତରେ ଅଢେଇ ଟଙ୍କା ବଢିଲା ପେଟ୍ରୋଲ ଓ ଡିଜେଲ ଦର । ତଥାପି ଶାସକ ଦଳର ପାଟି ଫିଟୁନି । ଯେମିତି ବିଜେଡି ତୁଣ୍ଡରେ କିଏ ବାନ୍ଧି ଦେଇଛି ତୁଣ୍ଡି । ଯାହାକୁ ନେଇ ଉଷ୍ମ ହୋଇଉଠିଛି ରାଜ୍ୟ ରାଜନୀତି।

ସାରା ଦେଶ ଜାଣିଛି, ଆଉ କିଛି ବଢୁ ନ ବଢୁ ଯଦି କେବଳ ତୈଳଦର ବଢିଲା ତେବେ ସାଧାରଣ ଲୋକଙ୍କ ମେରୁଦଣ୍ଡ ଉପରେ ସିଧା ମହଙ୍ଗା ମାଡ ହୁଏ । ଅତ୍ୟାବଶ୍ୟକ ସାମଗ୍ରୀର ଦର ବଢେ । ରାସନ ଠୁ ନେଇ ପରିବା ଯାଏ ସବୁର ଦର ହୁ ହୁ ହେଇ ବଢେ । ଯାହାର ସିଧା ପ୍ରଭାବ ପଡେ ଖଟିଖିଆ ମଜୁରିଆ ଓ ମଧ୍ୟବିତ୍ତଙ୍କ ଉପରେ । ବଜେଟରେ ସାଧାରଣ ଲୋକଙ୍କ ପାଇଁ ସେଭଳି କିଛି ଠୋସ ସୁବିଧା କରାଯାଇନଥିବା ବେଳେ ମହଙ୍ଗା ବୃଦ୍ଧି ପାଇଁ କିନ୍ତୁ ବ୍ୟବସ୍ଥା କରିଛନ୍ତି କେନ୍ଦ୍ର ସରକାର ।

କଥା ହେଉଛି, ଓଡିଶାକୁ ଗରୀବ ରାଜ୍ୟ ଦେଖାଇ ଫୋକସ୍ ଷ୍ଟେଟ୍ ମାନ୍ୟତା ମାଗୁଛନ୍ତି ରାଜ୍ୟ ସରକାର । ରାତି ପାହିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏନେଇ କେନ୍ଦ୍ରକୁ ଚିଠି ଲେଖି ଦାବୀ ଜଣାଉଛନ୍ତି । ହେଲେ ଗରୀବ ରାଜ୍ୟର ଗରୀବ ଲୋକଙ୍କ ସମସ୍ୟା ବେଳକୁ ମୁହଁ ଖୋଲୁ ନାହାଁନ୍ତି ନବୀନ ବାବୁ କିମ୍ବା ତାଙ୍କ ଦଳଭାଇମାନେ ।

ହୁଏତ ବଜେଟରେ ତୈଳଦର ବଢିବା ଖୁବ୍ କ୍ବଚିତ ଦେଖାଯାଏ । ଅତିରିକ୍ତ ସେସ୍ ଲଗାଇ ମୋଦି ସରକାରଙ୍କ ଦ୍ବିତୀୟ ପାଳିରେ କିନ୍ତୁ ଅତି ଚତୁରତାର ସହ ତୈଳଦର ବୃଦ୍ଧି କରାଗଲା । ଲୋକଙ୍କ ଉପରେ ଏହାର ପ୍ରଭାବ ପଡିଲେ ବି ଶାସକ ବିଜେଡି ଚୂପ ରହିବାକୁ ନେଇ ସମାଲୋଚନା କରିଛି କଂଗ୍ରେସ ।

 

ପିସିସି ମିଡିଆ ସେଲ୍ ମୁଖ୍ୟ ସତ୍ୟ ପ୍ରକାଶ ନାୟକ କହିଛନ୍ତି, ଉଭୟ କେନ୍ଦ୍ର ଓ ରାଜ୍ୟ ଲୋକଙ୍କ ସମସ୍ୟାକୁ ଦେଖିଲେ ନାହିଁ । ଜାଣିଶୁଣି ଲୋକଙ୍କ ଉପରେ ଅତିରିକ୍ତ ଚାପ ପକାଗଲା । ତଥାପି ଶାସକ ବିଜେଡି ଚୂପ ରହିବା ଅର୍ଥ ନବୀନ ବାବୁଙ୍କୁ ଲୋକଙ୍କ ସମସ୍ୟା ବଦଳରେ ନିଜର ବିଜେପି ପ୍ରିତୀକୁ ଗୁରୁତ୍ବ ଦେଲେ । ଯେଉଁଥିପାଇଁ ବଜେଟକୁ ଅନୁଶୀଳନ ନକରି ମାପିଚୁପି ଦୂରଦୃଷ୍ଟି ସମ୍ପନ୍ନ ବୋଲି ପଦିଏ କହି ଚୁପ ରହିଲେ । ଏହାହିଁ ଦର୍ଶାଉଛି, ପ୍ରେମ ବଢିଲେ ପ୍ରତିବାଦ କମିଯାଏ ।

Comments are closed.