ଭୁବନେଶ୍ୱର(ସତ୍ୟପାଠ ବ୍ୟୁରୋ): ଆପ୍ ଛାଡ଼ିଲେ ରାଘବ ଚଢ଼ା । ଯାହାକୁ ନେଇ ସାରା ଦେଶରେ ଚର୍ଚ୍ଚା ଜୋର୍ ଧରିଛି । ତେବେ ରାଜ୍ୟସଭା ସାଂସଦ ରାଘବ ଚଢ଼ା, ଅଶୋକ ମିତ୍ତଲ ଏବଂ ସନ୍ଦୀପ ପାଠକ ଆପ୍ରୁ ଇସ୍ତଫା ଦେଇଛନ୍ତି । ଏହା ସହ ସେମାନେ ବିଜେପିରେ ଯୋଗ ଦେଇଥିବା ଜଣାପଡ଼ିଛି । ସନ୍ଦୀପ ପାଠକ ଏବଂ ଅଶୋକ ମିତ୍ତଲଙ୍କ ସହ ଏକ ସାମ୍ବାଦିକ ସମ୍ମିଳନୀରେ ରାଘବ ଚଢା କହିଛନ୍ତି, ରାଜ୍ୟସଭାରେ ଆପର ଦୁଇ ତୃତୀୟାଂଶ ସଦସ୍ୟ ଭାରତର ସାମ୍ବିଧାନିକ ବ୍ୟବସ୍ଥା ଅନୁସାରେ ବିଜେପିରେ ଯୋଗ ଦେବାକୁ ସ୍ଥିର କରିଛୁ । ଏହା ସହ ରାଘବ ଚଢା କହିଛନ୍ତି ଯେ, ଆମ ଆଦମୀ ପାର୍ଟି ଦେଶ ପାଇଁ ନୁହେଁ, ବ୍ୟକ୍ତିଗତ ସ୍ୱାର୍ଥ ପାଇଁ କାମ କରୁଛି। ଦୁର୍ନୀତି ଦୂର କରିବା ନାଁରେ ଗଠିତ ଏହି ଦଳ ଦୁର୍ନୀତିଗ୍ରସ୍ତ ବ୍ୟକ୍ତିଙ୍କ ହାତରେ ଅଛି। ଆମ୍ ଆଦମୀ ପାର୍ଟିର ଦୁଇ-ତୃତୀୟାଂଶ ସାଂସଦ ବିଜେପିରେ ଯୋଗ ଦେଉଛନ୍ତି। ସେ କହିଛନ୍ତି, ‘ମୁଁ ମୋ ରକ୍ତ ଏବଂ ଝାଳ ଦେଇ ଆମ୍ ଆଦମୀ ପାର୍ଟି ପାଇଁ କାମ କରିଛି । ମୁଁ ଘୋଷଣା କରୁଛି ଯେ, ଆମ୍ ଆଦମୀ ପାର୍ଟି ଛାଡିଛି। ମୁଁ ଏହି ଦଳର ପ୍ରତିଷ୍ଠାତା ସଦସ୍ୟ ଥିଲି। ହୁଏତ ମୋ ଅପେକ୍ଷା ଏହି ଦଳକୁ କେହି ଭଲ ଭାବରେ ଜାଣିପାରିବେ ନାହିଁ। ଏବେ ଆମ୍ ଆଦମୀ ପାର୍ଟି ଆଉ ପୁରୁଣା ଦଳ ନୁହେଁ। ମୁଁ ଗୋଟିଏ ବର୍ଷ ପାଇଁ ଦଳୀୟ କାର୍ଯ୍ୟକଳାପରୁ ଦୂରେଇ ରହିଥିଲି କାରଣ, ମୁଁ ସେମାନଙ୍କ ଅପରାଧ ସହିତ ନଥିଲି ବୋଲି କହିଛନ୍ତି । ସେପଟେ ସନ୍ଦୀପ ପାଠକ କହିଛନ୍ତି, ‘ମୁଁ କେବେ ଭାବି ନଥିଲି ଯେ, ମୋ ଜୀବନରେ ଏହି ପରିସ୍ଥିତି ସୃଷ୍ଟି ହେବ ଏବଂ ଏହା ଘଟିଛି। ଆଜି, ମୁଁ ଆମ ଆଦମୀ ପାର୍ଟି ସହିତ ସମ୍ପର୍କ ଛିନ୍ନ କରୁଛି। ମୁଁ ଏକ କୃଷକ ପରିବାରରୁ ଆସିଛି । ମୁଁ କେବଳ ଗୋଟିଏ ଉଦ୍ଦେଶ୍ୟ ନେଇ ରାଜନୀତିରେ ପ୍ରବେଶ କରିଛି: ଦେଶ ପାଇଁ କିଛି ବଡ଼ କରିବି। ଦେଶ ସେବା କରିବା ଲକ୍ଷ୍ୟରେ ମୁଁ ଆମ ଆଦମୀ ପାର୍ଟିରେ ଯୋଗ ଦେଇଥିଲି । ମୁଁ ସବୁବେଳେ ଅରବିନ୍ଦ କେଜ୍ରିୱାଲଙ୍କୁ ପ୍ରଥମ ସ୍ଥାନ ଦେଇଥାଏ। ମୁଁ ଏପର୍ଯ୍ୟନ୍ତ ଯାହା ନିଷ୍ପତ୍ତି ନେଇଛି, ମୁଁ ଦଳ ସହିତ ଏହାକୁ ମୋର ସର୍ବୋଚ୍ଚ ପ୍ରାଥମିକତା ଭାବରେ ନେଇଛି। ମୁଁ ସମ୍ପୂର୍ଣ୍ଣ ସଚ୍ଚୋଟତାର ସହିତ କାମ କରିଛି। ଦେଶରେ ରାଜନୈତିକ ଦଳ ରହିବା ଉଚିତ। ମୋର ପଥ ଆଜିଠାରୁ ଭିନ୍ନ ବୋଲି କହିଛନ୍ତି । ନିକଟରେ ରାଘବ ଚଢାଙ୍କ ସ୍ଥାନରେ ଅଶୋକ ମିତ୍ତଲଙ୍କୁ ରାଜ୍ୟସଭାରେ AAPର ଉପନେତା ନିଯୁକ୍ତ କରାଯାଇଥିଲା। ଏବେ, ଅଶୋକ ମିତ୍ତଲ ଏବଂ ରାଘବ ଚଢ଼ା ଆପ୍ ଛାଡ଼ିଛନ୍ତି ।
