ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଜାମ୍ମୁ-କାଶ୍ମୀର କଂଗ୍ରେସରେ ମାହୋଲ ସରଗରମ ହୋଇ ଯାଇଛି। କଂଗ୍ରେସର ବରିଷ୍ଠ ନେତା ଗୁଲାମ ନବି ଆଜାଦଙ୍କୁ ଜାମ୍ମୁ-କାଶ୍ମୀର ପ୍ରଚାର ଅଭିଯାନ କମିଟିର ଅଧ୍ୟକ୍ଷ ନିଯୁକ୍ତ କରାଯାଇଥିଲା। ମାତ୍ର ଏହାର କିଛି ଘଣ୍ଟା ନଯାଉଣୁ ସେ ନିଜ ପଦରୁ ଇସ୍ତଫା ଦେଇଛନ୍ତି। ତେବେ ପଦ ମିଳିବାର କିଛି ଘଣ୍ଟା ପରେ ଗୁଲାମ ନବି ଆଜାଦ ଇସ୍ତଫା କାହିଁକି ଦେଲେ ତାର କାରଣ ଜଣା ପଡିନି। ଏହାକୁ ନେଇ ରାଜନୀତି ସରଗରମ ହୋଇ ଉଠିଛି।
ସୂଚନା ଅନୁଯାୟୀ, ମଙ୍ଗଳବାର କଂଗ୍ରେସ ଜାମ୍ମୁ-କାଶ୍ମୀର ସଂଗଠନରେ ବଡ ପରିବର୍ତ୍ତନ କରିଥିଲା। ସଂଗଠନକୁ ଆହୁରି ସୁଦୃଢ କରିବା ପାଇଁ ଅନେକ ନୂତନ ନିଯୁକ୍ତି କରାଯାଇଥିଲା। ପାର୍ଟିର ବରିଷ୍ଠ ନେତା ଗୁଲାମ ନବି ଆଜାଦଙ୍କୁ ପ୍ରଚାର ଅଭିଯାନ କମିଟିର ଅଧ୍ୟକ୍ଷ ଏବଂ ତାରିକ ହାମିଦ କରାଙ୍କୁ ଉପାଧ୍ୟକ୍ଷ ଭାବେ ନିଯୁକ୍ତି କରାଯାଇଥିଲା। ଆଜାଦଙ୍କୁ ରାଜନୈତିକ ମାମଲା କମିଟି ଏବଂ ସମନ୍ଵୟ କମିଟିର ମଧ୍ୟ ମୁଖ୍ୟ ଭାବେ ନିଯୁକ୍ତ କରାଯାଇଥିଲା।ମାତ୍ର କିଛି ଘଣ୍ଟା ପରେ ଗୁଲାମ ନବି ଆଜାଦ ନିଜ ପଦରୁ ଇସ୍ତଫା ଦେଇଛନ୍ତି। ନୂତନ ଦାୟିତ୍ଵ ମିଳିବା ପୂର୍ବରୁ ସେ ରାଜ୍ୟ କଂଗ୍ରେସ ସଭାପତି ପଦରୁ ଇସ୍ତଫା ଦେଇଥିଲେ। ଏହା ପରେ ପାର୍ଟି ନିଜ ସଂଗଠନରେ ଅନେକ ବଡ ପରିବର୍ତ୍ତନ କରିଥିଲା।
