ଭୁବନେଶ୍ୱର(ସତ୍ୟପାଠ ବ୍ୟୁରୋ): ଲାଉଡସ୍ପିକର ବିବାଦକୁ ନେଇ ସାରା ଦେଶରେ ଚର୍ଚ୍ଚା ଜୋର ଧରିବାରେ ଲାଗିଛି । ଏହା ମଧ୍ୟରେ ବିହାର ମୁଖ୍ୟମନ୍ତ୍ରୀ ନୀତିଶ କୁମାର ବଡ଼ ବୟାନ ଦେଇଛନ୍ତି । ତେବେ ଏକ କାର୍ୟ୍ୟକ୍ରମ ଅବସରରେ ବିହାରର ପୂର୍ଣ୍ଣିଆ ଜିଲ୍ଲାରେ ସାମ୍ବାଦିକମାନଙ୍କ ସହ ଆଲୋଚନା ବେଳେ ମୁଖ୍ୟମନ୍ତ୍ରୀ ନୀତୀଶ କୁମାର ଏହି ବିବାଦ ଉପରେ ପ୍ରତିକ୍ରିୟା ପ୍ରକାଶ କରିଥିଲେ। ମୁଖ୍ୟମନ୍ତ୍ରୀ ନୀତୀଶ କହିଥିଲେ, ‘ଆସନ୍ତୁ ଏହି ଅର୍ଥହୀନ ବିଷୟରେ କଥାବାର୍ତ୍ତା କରିବା ନାହିଁ। ଏହା ସମସ୍ତଙ୍କୁ ଜଣା ଯେ ବିହାରରେ ଆମେ କୌଣସି ପ୍ରକାରର ଧାର୍ମିକ ପ୍ରଥାରେ ହସ୍ତକ୍ଷେପ କରୁନାହୁଁ ।
ଅବଶ୍ୟ, କିଛି ଲୋକ ଭାବନ୍ତି ଯେ ଗଣ୍ଡଗୋଳ କରିବା ସେମାନଙ୍କର ବ୍ୟବସାୟ ଏବଂ ସେମାନେ ଏହାକୁ କରନ୍ତି’ ବୋଲି ନୀତୀଶ କହିଛନ୍ତି। ମୁଖ୍ୟମନ୍ତ୍ରୀ ନୀତୀଶଙ୍କ ମନ୍ତବ୍ୟ ରାଜ୍ୟରେ ଭାରତୀୟ ଜନତା ପାର୍ଟି (ବିଜେପି) ନେତାଙ୍କ ଦାବି ଉପରେ ପର୍ୟ୍ୟବେସିତ ଥିଲା। କାରଣ ବିହାରର ନୀତୀଶ ସରକାର ମଧ୍ୟ ଉତ୍ତରପ୍ରଦେଶର ଯୋଗୀ ମଡେଲ ଅନୁସରଣ କରିବାକୁ ବିଜେପି ନେତାମାନେ ଦାବୀ କରୁଥିଲେ, ଯେଉଁଠାରେ ଉଚ୍ଚ ଡେସିବଲ୍ ଧ୍ୱନି ଦ୍ୱାରା ସୃଷ୍ଟି ହୋଇଥିବା ସ୍ୱାସ୍ଥ୍ୟ ବିପଦକୁ ଦର୍ଶାଇ ନିକଟରେ ପୂଜାସ୍ଥାନରୁ ହଜାର ହଜାର ଲାଉଡସ୍ପିକର ହଟାଇ ଦିଆଯାଇଛି।
