ନୂଆଦିଲ୍ଲୀ(ସତ୍ୟପାଠ ବ୍ୟୁରୋ): ଦିଲ୍ଲୀ ସୀମାରେ ପ୍ରାୟ ଗୋଟିଏ ବର୍ଷରୁ ଅଧିକ ସମୟଧରି କୃଷକମାନେ ଆନ୍ଦୋଳନ କରିଆସୁଥିଲେ । ହେଲେ ବର୍ତ୍ତମାନ ପୁଣିଥରେ କୃଷକମାନେ ଆନ୍ଦୋଳନ କରିବାକୁ ଯାଉଛନ୍ତି ବୋଲି କୃଷକନେତା ରାକେଶ ଟିକାୟତ ସ୍ପଷ୍ଟ କରିଛନ୍ତି । ତେବେ ଜାନୁୟାରୀ ୩୧ ରେ ସାରା ଦେଶରେ ଏସଡିଏମ, ଡିଏମ ଏବଂ ଡିସିଙ୍କ ସହ ଆମର ଏକ କାର୍ୟ୍ୟକ୍ରମ ରହିଛି । କାହିଁକିନା ଏମଏସପି ଗ୍ୟାରେଣ୍ଟି ଆଇନ ପ୍ରସ୍ତୁତ କରିବାକୁ ଏକ କମିଟି ଗଠନ ବିଷୟରେ ଭାରତ ସରକାର ଆଲୋଚନା କରିଛନ୍ତି ହେଲେ ଏପର୍ଯ୍ୟନ୍ତ କମିଟି ଗଠନ କରିନାହାନ୍ତି । ତେଣୁ ଜାନୁଆରୀ ୩୧ ତାରିଖରେ ସରକାରଙ୍କୁ ଏ ବିଷୟରେ ପୁଣି ମନେପକାଇ ଦବା ପାଇଁ ଆମେ ଏକାଠି ହେବାକୁ ଯାଉଛୁ ବୋଲି ରାକେଶ ଟିକାୟତ କହିଛନ୍ତି । ସେପଟେ ଜାନୁୟାରୀ ୩୧ ତାରିଖରେ ସାରା ଦେଶରେ ବିଶ୍ୱାସଘାତକତା ଦିବସ ପାଳନ କରାଯିବ ଏବଂ ଜିଲ୍ଲା ତଥା ତହସିଲ ସ୍ତରରେ ବଡ ବିରୋଧ ପ୍ରଦର୍ଶନ କରାଯିବ।
ଏହି ପ୍ରଦର୍ଶନରେ କେନ୍ଦ୍ର ସରକାରଙ୍କୁ ଏକ ସ୍ମାରକପତ୍ର ମଧ୍ୟ ପ୍ରଦାନ କରାଯିବ। ୟୁନାଇଟେଡ୍ କିସାନ୍ ମୋର୍ଚ୍ଚାର ନେତାମାନେ ଅଭିଯୋଗ କରିଛନ୍ତି ଯେ ଏହି ଆନ୍ଦୋଳନକୁ ଫେରାଇ ଆଣିବା ପାଇଁ ଏମଏସପି ପ୍ରସଙ୍ଗରେ ଏକ କମିଟି ଗଠନ କରିବାକୁ ଭାରତ ସରକାର ପ୍ରତିଶୃତି ଦେଇଛନ୍ତି। ଏହା ସହିତ ଆନ୍ଦୋଳନ ସମୟରେ ତୁରନ୍ତ ମାମଲା ପ୍ରତ୍ୟାହାର କରି ଶହୀଦଙ୍କ ପରିବାରକୁ କ୍ଷତିପୂରଣ ଦେବା ପାଇଁ ପ୍ରତିଶୃତି ଦିଆଯାଇଥିଲା। ଏହି ପ୍ରତିଜ୍ଞାଗୁଡ଼ିକ ମଧ୍ୟରୁ କୌଣସିଟି ଏପର୍ୟ୍ୟନ୍ତ ପୂରଣ ହୋଇନାହିଁ ବୋଲି ସଂଯୁକ୍ତ କିଷାନ ମୋର୍ଚ୍ଚା କହିଛି । ଅନ୍ୟପଟେ ନଭେମ୍ବର ୨୦୨୦ ମସିହାରେ, କେନ୍ଦ୍ର ସରକାରଙ୍କ ଦ୍ୱାରା ପ୍ରଣୀତ ତିନୋଟି କୃଷି ନିୟମ ବିରୁଦ୍ଧରେ ଦିଲ୍ଲୀ ସୀମାରେ କୃଷକଙ୍କ ଆନ୍ଦୋଳନ ଆରମ୍ଭ ହୋଇଥିଲା। ଏହି ସମୟରେ ସରକାର ଏବଂ କୃଷକ ସଂଗଠନ ମଧ୍ୟରେ ଅନେକ ରାଉଣ୍ଡ ଆଲୋଚନା ମଧ୍ୟ କୌଣସି ନିଷ୍କର୍ସ ବାହାରି ପାରିନଥିଲା । କିନ୍ତୁ ଗତ ବର୍ଷ ନଭେମ୍ବର ୧୯ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ତିନୋଟି ଆଇନ ପ୍ରତ୍ୟାହାର ବିଷୟରେ କହିଥିଲେ। ଏହା ପରେ କୃଷକମାନେ ଆନ୍ଦୋଳନରୁ ଓହରିଯାଇଥିଲେ ।
