(ସତ୍ୟପାଠ ବ୍ୟୁରୋ) ଭୁବନେଶ୍ୱର : ପଶ୍ଚିମବଙ୍ଗର ପୂର୍ବତନ ମୁଖ୍ୟ ଶାସନ ସଚିବ ଅଲପନ ବନ୍ଦୋପାଧ୍ୟାୟଙ୍କୁ ନେଇ କେନ୍ଦ୍ର ଏବଂ ବେଙ୍ଗଲ ସରକାରଙ୍କ ମଧ୍ୟରେ ବିବାଦ ଲାଗି ରହିଥିବା ବେଳେ ଶିବସେନା ଆଜି ମୋଦୀ ସରକାରଙ୍କୁ କଡା ସମାଲୋଚନା କରିଛି। ଶିବସେନା ବିଜେପିକୁ କଟାକ୍ଷ କରି କହିଛି ଯେ ବେଙ୍ଗଲକୁ ଆଜି ବି “ଅହଙ୍କାରର ଚକ୍ରବାତୀ” ର ବିପଦ ରହିଛି। କେନ୍ଦ୍ର ସରକାର ରାଜ୍ୟ ଗୁଡିକ ଉପରେ ଚାପ ପକାଉଛନ୍ତି। ପାର୍ଟି ମୁଖପାତ୍ର ‘ସାମନା’ର ଏକ ସମ୍ପାଦକୀୟରେ କହିଛନ୍ତି ଯେ କେନ୍ଦ୍ର ସରକାରଙ୍କୁ ରାଜନୈତିକ ବିଜୟ ଏବଂ ପରାଜୟ ପ୍ରତି ବ୍ୟାପକ ଦୃଷ୍ଟିଭଙ୍ଗୀ ରଖିବା ଉଚିତ କାରଣ ଏହାର ଅନୁପସ୍ଥିତି ଦେଶର ଏକତାକୁ କ୍ଷତି ପହଞ୍ଚାଇପାରେ। ଦଳ ଏହା ମଧ୍ୟ କହିଛି ଯେ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂ, ରାଜୀବ ଗାନ୍ଧୀ, ପି ଭି ନରସିଂହ ରାଓ ଏବଂ ଅଟଳ ବିହାରୀ ବାଜପେୟୀଙ୍କ କାର୍ଯ୍ୟକାଳ ସମୟରେ କେନ୍ଦ୍ର ଓ ରାଜ୍ୟ ମଧ୍ୟରେ ଏଭଳି ମୁହାଁମୁହିଁ ପରିସ୍ଥିତି ଉପୁଜିନଥିଲା । ସୂଚନାଯୋଗ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବାତ୍ୟା ୟାସ ସମୀକ୍ଷା ବୈଠକରେ ଯୋଗ ନ ଦେଇ ଥିବାରୁ ବିପର୍ଯ୍ୟୟ ପରିଚାଳନା ଆଇନ ଉଲ୍ଲଂଘନ କରିଥିବା ଅଭିଯୋଗରେ କେନ୍ଦ୍ର ଗୃହ ମନ୍ତ୍ରଣାଳୟ ବେଙ୍ଗଲର ପୂର୍ବତନ ମୁଖ୍ୟ ଶାସନ ସଚିବ ଅଲପନ ବନ୍ଦୋପାଧ୍ୟାୟଙ୍କୁ କାରଣ ଦର୍ଶାଅ ନୋଟିସ ଜାରି କରିଥିଲା। ଶିବସେନା କେନ୍ଦ୍ର ସରକାରଙ୍କୁ ଟାର୍ଗେଟ କରି କହିଛି ଯେ ” ବାତ୍ୟା ୟାସ ଆସି ଚାଲି ଯାଇଛି କିନ୍ତୁ ବଙ୍ଗୋପସାଗରରେ ଅହଂକାରର ଘୂର୍ଣ୍ଣିବଳୟ ଏବେ ବି ଜାରି ରହିଛି।
