ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ନିଜର ବିବାଦୀୟ ବିୟାନ ପାଇଁ ଫସିଛନ୍ତି କେନ୍ଦ୍ରମନ୍ତ୍ରୀ ଗଜେନ୍ଦ୍ର ସିଂହ ଶେଖାୱତ। ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପ୍ରଶଂସା କରିବାକୁ ଯାଇ ତାଙ୍କ ଉପରେ ଲେଖାଯାଇବା ବହିକୁ ପବିତ୍ର ଭଗବତ ଗୀତା ସହ ତୁଳନା କରିଛନ୍ତି। ରାଜସ୍ଥାନର ଝୁନଝୁନ ଠାରେ ଆୟୋଜିତ ଗୋଟିଏ କାର୍ଯ୍ୟକ୍ରମରେ ‘Modi@20: Dreams Meet Delivery’ ବହିକୁ ଶ୍ରୀମଦ ଭଗବତ ଗୀତା ସହ ତୁଳନା କରିଥିଲେ କେନ୍ଦ୍ରମନ୍ତ୍ରୀ। ଏହା ପରେ ଏନେଇ ବିବାଦ ଦେଖାଦେଇଛି। ଏହି କାର୍ଯ୍ୟକ୍ରମରେ ଶେଖାୱତ କହିଛନ୍ତି, “ଆଗାମୀ ଦିନରେ Modi@20: Dreams Meet Delivery’ ମହତ୍ତ୍ୱ ଠିକ ଭଗବତ ଗୀତା ଭଳି ହେବ। ଆଗାମୀ ପିଢ଼ି ପାଇଁ ଏହି ବହିର ମହତ୍ତ୍ୱ ବହୁତ୍ ଅଧିକ ରହିବ। ଦେଶର ସର୍ବାଙ୍ଗୀନ ବିକାଶ ପାଇଁ ପ୍ରଧାନମନ୍ତ୍ରୀ ମୋଦି କରୁଥିବା ପ୍ରୟାସର ପ୍ରଭାବ ଏବେ ଦେଖିବାକୁ ମିଳିଲାଣି। Modi@20: Dreams Meet Delivery’ ବହିକୁ ପ୍ରଧାନମନ୍ତ୍ରୀଙ୍କ ଅନୁଭୂତି ଓ କାର୍ଯ୍ୟକୁ ଆଧାର କରି ପ୍ରସ୍ତୁତ କରାଯାଇଛି।”
ତେବେ ଏହି ମନ୍ତବ୍ୟର ଭିଡିଓ ଭାଇରାଲ ହେବା ପରେ କେନ୍ଦ୍ରମନ୍ତ୍ରୀଙ୍କୁ ବିଭିନ୍ନ ମହଲରେ ସମାଲୋଚନା କରାଯାଇଛି। କଂଗ୍ରେସର ରାଜସ୍ଥାନ ମୁଖ୍ୟ ଗୋବିନ୍ଦ ସିଂହ ଦୋତାସ୍ର କହିଛନ୍ତି, “ଯେଉଁମାନେ କ୍ଷମତା ପାଇଁ ନିଜର ମାନସମ୍ମାନକୁ ବିକ୍ରି କରି ଦିଅନ୍ତି, ସେମାନେ ଶ୍ରୀମଦ ଭଗବତ ଗୀତାକୁ ଅପମାନିତ କରି ଧର୍ମର ମାର୍ଗକୁ କଳଙ୍କିତ କରନ୍ତୁ ନାହିଁ। ଏହା ସନାତନ ଧର୍ମର ପବିତ୍ର ଗ୍ରନ୍ଥ। ସେମାନେ ଚାଟୁକାରିତା ର ସବୁସୀମା ଅତିକ୍ରମ କରି ଯାଇଛନ୍ତି। ଭଗବାନ କୃଷ୍ଣ ସେମାନଙ୍କୁ ସଦବୁଦ୍ଧି ଦିଅନ୍ତୁ।”
ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ଓଏସ୍ଡି ଲୋକେଶ ଶର୍ମା ମଧ୍ୟ ଟ୍ୱିଟ କରି କେନ୍ଦ୍ରମନ୍ତ୍ରୀ ଶେଖାୱତଙ୍କୁ ସମାଲୋଚନା କରିଛନ୍ତି। ସେ କହିଛନ୍ତି, “ପବିତ୍ର ସନାତନ ଗ୍ରନ୍ଥ ଭଗବତ ଗୀତାକୁ ଏପରି ଭାବେ ତୁଳନା କରିବା ଭଗବାନ ଶ୍ରୀକୃଷ୍ଣଙ୍କ ସନ୍ଦେଶ ଦେଉଥିବା ଗୀତାର ଘୋର ଅପମାନ। ଏହା ଦେଶବାସୀଙ୍କ ଭାବାବେଗକୁ ଆଘାତ ଦେବା ସହ ସମାନ। ଆପଣଙ୍କ ବୟାନରୁ ଜଣାପଡ଼ୁଛି ଯେ ଶ୍ରୀମଦ ଭଗବତ ଗୀତା ପାଇଁ ଆପଣଙ୍କ ମନରେ ସମ୍ମାନ ନାହିଁ।”
