(ସତ୍ଯପାଠ ବ୍ୟୁରୋ) ଭୁବନେଶ୍ୱର: ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ଭାବେ ମମତା ବାନାର୍ଜୀ ଶପଥ ଗ୍ରହଣ କରିବାର କିଛି ଘଣ୍ଟା ପରେ ବୁଧବାର ବିଜେପି ରାଷ୍ଟ୍ରୀୟ ସଭାପତି ଜେ.ପି ନାଡା କହିଛନ୍ତି ଯେ ଆମେ ମଧ୍ୟ ଶପଥ ନେଉଛୁ ଯେ ଆମେ ରାଜ୍ୟରେ ରାଜନୈତିକ ହିଂସାକୁ ଦୂର କରିବୁ। କୋଲକାତାରେ ଦଳୀୟ କର୍ମୀଙ୍କୁ ସମ୍ବୋଧିତ କରି ନାଡା କହିଛନ୍ତି,”ଯେଉଁମାନେ ଅନ୍ୟମାନଙ୍କୁ ସୁରକ୍ଷା ଦେବା ଉଚିତ୍, ସେମାନେ ହିଁ ଏହି ହିଂସା ପାଇଁ ଦାୟୀ ଅଟନ୍ତି। ସେମାନେ ଶପଥ ନେଇଛନ୍ତି ଗଣତନ୍ତ୍ରରେ ଏହା କରିବାର ଅଧିକାର ଅଛି। କିନ୍ତୁ ଆମେ ମଧ୍ୟ ଏକ ଶପଥ ନେଇଛୁ ଆମେ ବଙ୍ଗଳାରେ ରାଜନୈତିକ ହିଂସାକୁ ସମାପ୍ତ କରିବୁ।” ନଡ୍ଡା ମଙ୍ଗଳବାରଠାରୁ ପଶ୍ଚିମବଙ୍ଗ ଗସ୍ତରେ ଆସି ଶାସକ ଟିଏମସି ସରକାରଙ୍କ ଦ୍ୱାରା ରାଜ୍ୟରେ ଦଳୀୟ କର୍ମୀଙ୍କ ଉପରେ ହେଉଥିବା ଅତ୍ୟାଚାର ବିରୋଧରେ ବିକ୍ଷୋଭ ପ୍ରଦର୍ଶନ କରିଛନ୍ତି। ଏହାପୂର୍ବରୁ ଆଜି ମମତାଙ୍କୁ ପଶ୍ଚିମବଙ୍ଗର ରାଜ୍ୟପାଳ ଜଗଦୀପ ଧନଖଡ ଶପଥ ଗ୍ରହଣ କରାଇଥିଲେ। ଦକ୍ଷିଣ ଚବିଶ ପ୍ରଗଣାର ଗୋପାଳ ନାଗର ଅଞ୍ଚଳରେ ଟିଏମସି କର୍ମୀଙ୍କ ଦ୍ୱାରା ଅନେକ ଦୋକାନ ଏବଂ ବାସଗୃହ ଭଙ୍ଗାରୁଜା ହୋଇଥିବା ଅଭିଯୋଗ ହୋଇଛି। ଶେଫାଲୀ ଦାଶ ANI କୁ କହିଛନ୍ତି, “ମେ ୨ ରେ ଟିଏମସି ଗୁଣ୍ଡମାନେ ମୋ ଘର ଉପରେ ଆକ୍ରମଣ କରିଥିଲେ କାରଣ ମୋ ସ୍ୱାମୀ ବିଜେପିର ମତଦାନ ଏଜେଣ୍ଟ ଥିଲେ। ଏପରିକି ସେମାନେ ଆମ ସମ୍ପତ୍ତି ବିକ୍ରୟ କରି ଏହି ସ୍ଥାନ ଛାଡିଦେବାକୁ ଧମକ ଦେଇଥିଲେ।” ସୋମବାର ଦିନ ଭଟପାର ଘୋଷପା ରାସ୍ତାରେ ଥିବା ବିଜେପି କାର୍ଯ୍ୟାଳୟ ଏବଂ କିଛି ଦୋକାନରେ ଟିଏମସି କର୍ମୀଙ୍କ ଦ୍ୱାରା ଭଙ୍ଗାରୁଜା କରାଯାଇଥିଲା ଏବଂ ଏହି ଅଞ୍ଚଳରେ ଅତି କମରେ 13 ଟି ବୋମା ମାଡ ହୋଇଥିବା ଅଭିଯୋଗ ହୋଇଥିଲା। ଏହି ଅଞ୍ଚଳ ବିଜେପି ସମର୍ଥକ ବୋଲି ଜଣା ପଡିଥିବାରୁ ଏହି ଆକ୍ରମଣ ପଛରେ ଟିଏମସି ରହିଛି ବୋଲି ଦୋକାନୀମାନେ ଅଭିଯୋଗ କରିଛନ୍ତି। ତେବେ ସ୍ଥାନୀୟ ଟିଏମସି ନେତା ଏହି ଅଭିଯୋଗକୁ ଅସ୍ୱୀକାର କରି କହିଛନ୍ତି ଯେ ଏହି ଘଟଣା ପଛରେ ବିଜେପିର ଲୋକ ଅଛନ୍ତି। ପଶ୍ଚିମବଙ୍ଗ ବିଧାନସଭା ନିର୍ବାଚନରେ ମମତା ବାନାର୍ଜୀଙ୍କ ନେତୃତ୍ୱାଧୀନ ଟିଏମସି 213 ଟି ଆସନ ଜିତିଛି। ଭାରତୀୟ ଜନତା ପାର୍ଟି 77 ଟି ସିଟ୍ ହାସଲ କରିଛି। ତେବେ COVID କାରଣରୁ ପ୍ରାର୍ଥୀଙ୍କ ଦେହାନ୍ତ ହେତୁ ମୁର୍ସିଦାବାଦରେ ଦୁଇଟି ଆସନ ପାଇଁ ନିର୍ବାଚନ ସ୍ଥଗିତ ରଖାଯାଇଛି।
