ନୂଆଦିଲ୍ଲୀ: ଇ-୨୦ ପେଟ୍ରୋଲ୍ ସୁରକ୍ଷିତ ଓ ଅର୍ଥନୈତିକ ଦୃଷ୍ଟିକୋଣରୁ ଅତ୍ୟନ୍ତ ଲାଭଦାୟକ। ଏନେଇ ସ୍ପଷ୍ଟିକରଣ ରଖିଛି ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରଣାଳୟ। ଏହାସହିତ ଏହାର ବ୍ୟବହାର ଦ୍ୱାରା ଗାଡ଼ିର ଇନସ୍ୟୁରାନ୍ସ କ୍ଲେମ୍ ପ୍ରଭାବିତ ହେବାର ଆଶଙ୍କାକୁ ସରକାର ଖାରଜ କରିଛନ୍ତି। ଏନେଇ ମନ୍ତ୍ରଣାଳୟ କହିଛି ଯେ, ଇ-୨୦ ଇନ୍ଧନ ବ୍ୟବହାର କରୁଥିବା ଗାଡ଼ିଗୁଡ଼ିକ ସେମାନଙ୍କର ବୀମା ସୁରକ୍ଷା ହରାଇବେ ବୋଲି ଯେଉଁ ଚର୍ଚ୍ଚା ହେଉଥିଲା, ତାହା ସମ୍ପୂର୍ଣ୍ଣ ଭୁଲ୍ ଏବଂ ସମ୍ପୃକ୍ତ ଅଂଶୀଦାରମାନଙ୍କ ସହ ଆଲୋଚନାପରେ ଏହି ଆଶଙ୍କା ଭିତ୍ତିହୀନ ବୋଲି ଜଣାପଡ଼ିଛି। ପେଟ୍ରୋଲରେ ଇଥାନଲ ମିଶ୍ରଣ କରିବା ଏକ ବିଶ୍ୱସ୍ତରୀୟ ସ୍ୱୀକୃତିପ୍ରାପ୍ତ ପଦ୍ଧତି, ଯାହାକୁ ଆମେରିକା, ବ୍ରାଜିଲ ଓ ଜାପାନ ପରି ଅନେକ ବିକଶିତ ଦେଶ ସଫଳତାର ସହ କାର୍ଯ୍ୟକାରୀ କରିଛନ୍ତି ଏବଂ ବ୍ରାଜିଲରେ ତ ବହୁ ବର୍ଷ ଧରି ଇ-୨୭ ପେଟ୍ରୋଲ୍ (୨୭ ପ୍ରତିଶତ ଇଥାନଲ ମିଶ୍ରଣ) ମାନକ ଭାବେ ବ୍ୟବହାର କରାଯାଉଛି। ସରକାରଙ୍କ ସୂଚନା ଅନୁଯାୟୀ, ଏହି ଇଥାନଲ ମିଶ୍ରଣ କାର୍ଯ୍ୟକ୍ରମ ଯୋଗୁଁ ଅଶୋଧିତ ତୈଳ ଆମଦାନୀ ଉପରେ ଦେଶର ନିର୍ଭରଶୀଳତା ହ୍ରାସ ପାଇଛି, ଯାହାଫଳରେ ଭାରତର ପ୍ରାୟ ୧.୪ ଲକ୍ଷ କୋଟି ଟଙ୍କାରୁ ଅଧିକ ବୈଦେଶିକ ମୁଦ୍ରା ସଞ୍ଚୟ ହୋଇପାରିଛି। ଏହି ପଦକ୍ଷେପ କେବଳ ଦେଶର ଶକ୍ତି ସୁରକ୍ଷାକୁ ବୃଦ୍ଧି କରିନାହିଁ, ବରଂ ଇଥାନଲ ଉତ୍ପାଦନ ପାଇଁ ଆବଶ୍ୟକ କୃଷିଜାତ ସାମଗ୍ରୀର ଚାହିଦା ବଢ଼ାଇ ଗ୍ରାମୀଣ ଅର୍ଥନୀତି ଓ ଚାଷୀମାନଙ୍କୁ ଆର୍ଥିକ ସ୍ଥିରତା ପ୍ରଦାନ କରିଛି। ଏହା ସହିତ କାର୍ବନ ନିର୍ଗମନ ହ୍ରାସ କରି ସ୍ୱଚ୍ଛ ପରିବହନ ଦିଗରେ ଏହା ଭାରତ ପାଇଁ ଏକ ଗୁରୁତ୍ୱପୂର୍ଣ୍ଣ ମାଧ୍ୟମ ସାଜିଛି। ବୈଜ୍ଞାନିକ ପ୍ରମାଣ ଏବଂ ନିରନ୍ତର ସମୀକ୍ଷା ଆଧାରରେ ଏହି ସମଗ୍ର କାର୍ଯ୍ୟକ୍ରମକୁ ଆଗକୁ ମଧ୍ୟ ସମ୍ପୂର୍ଣ୍ଣ ସ୍ୱଚ୍ଛ, ସୁରକ୍ଷିତ ଓ ଗ୍ରାହକ-କୈନ୍ଦ୍ରିକ ଶୈଳୀରେ ଜାରି ରଖାଯିବ ବୋଲି ମନ୍ତ୍ରଣାଳୟ ପକ୍ଷରୁ ସୂଚନା ମିଳିଛି।
