ନୂଆଦିଲ୍ଲୀ: ଦେଶବ୍ୟାପୀ ପେପର ଲିକ୍ ବିବାଦ ଏବଂ ଛାତ୍ରଛାତ୍ରୀଙ୍କ ବିକ୍ଷୋଭ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁବାର ବିଳମ୍ବିତ ରାତିରେ ଏକ ଭିଡିଓ ବାର୍ତ୍ତା ଜାରି କରି ପେପର ଲିକ୍କୁ “ଅତ୍ୟନ୍ତ ଗୁରୁତର ପ୍ରସଙ୍ଗ” ବୋଲି ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ, ପେପର ଲିକ୍ ରୋକିବା ଓ ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ପାଇଁ ସରକାର ଗତ ଦୁଇ ମାସ ଧରି ଅନେକ ପଦକ୍ଷେପ ନେଇଛନ୍ତି। ସେହିପରି ପେପର ଲିକ୍ ମାମଲାର ଶୀଘ୍ର ବିଚାର ପାଇଁ ଫାଷ୍ଟ-ଟ୍ରାକ୍ କୋର୍ଟ ଗଠନ ସହ କଡ଼ା ଦଣ୍ଡବିଧାନ ଥିବା ଏକ ନୂଆ ବିଲ୍ ସଂସଦରେ ଆଗତ କରାଯିବ ବୋଲି ମଧ୍ୟ ସୂଚନା ଦେଇଛନ୍ତି।
ଏହାପୂର୍ବରୁ ସେହି ଦିନ ପ୍ରଥମ ଥର ପାଇଁ ଚାଲିଥିବା ଛାତ୍ର ଆନ୍ଦୋଳନ ସମ୍ପର୍କରେ ପ୍ରଧାନମନ୍ତ୍ରୀ ମତ ରଖିଥିଲେ। ସେ କହିଥିଲେ ଯେ, ପେପର ଲିକ୍ ମାମଲାରେ ଶୀଘ୍ର ନ୍ୟାୟ ନିଶ୍ଚିତ କରିବା ପାଇଁ ଫାଷ୍ଟ-ଟ୍ରାକ୍ କୋର୍ଟ ଗଠନ କରାଯିବ। ପରେ ମଧ୍ୟରାତ୍ରିରେ ପ୍ରକାଶିତ ଭିଡିଓରେ ସେ କହିଥିଲେ ଯେ, ଏ ସମ୍ପର୍କିତ ବିଲ୍ର ଖସଡ଼ା ତାଙ୍କ ପାଖରେ ପହଞ୍ଚିଛି ଏବଂ ଏହାକୁ କ୍ୟାବିନେଟରେ ଆଲୋଚନା କରାଯାଇ ପରବର୍ତ୍ତୀ ସପ୍ତାହରେ ସଂସଦରେ ଉପସ୍ଥାପନ କରିବାକୁ ସରକାର ଉଦ୍ୟମ କରିବ।
ଭିଡିଓ ବାର୍ତ୍ତାରେ ମୋଦି କହିଛନ୍ତି, “ପେପର ଲିକ୍ କୌଣସି ସାଧାରଣ ଘଟଣା ନୁହେଁ। ଏହା ଲକ୍ଷ ଲକ୍ଷ ଛାତ୍ରଛାତ୍ରୀ ଏବଂ ସେମାନଙ୍କ ପରିବାର ପାଇଁ ଅତ୍ୟନ୍ତ ଯନ୍ତ୍ରଣାଦାୟକ। ଗତ ଦୁଇ ମାସ ଧରି ସରକାର ଏହା ବିରୋଧରେ ଲଗାତାର ପଦକ୍ଷେପ ନେଇଛି। ଦୋଷୀମାନଙ୍କୁ ଗିରଫ କରାଯାଇଛି ଏବଂ ସେମାନେ ବର୍ତ୍ତମାନ କାରାଗାରରେ ଅଛନ୍ତି।”
https://x.com/i/status/2080357811662492096
ସେ କହିଛନ୍ତି ଯେ, NEET-UG ପରୀକ୍ଷା ବାତିଲ ପରେ ସରକାର ଅତି କମ୍ ସମୟ ମଧ୍ୟରେ ପୁନଃ ପରୀକ୍ଷା କରାଇଥିଲା ଏବଂ କିଛି ଦିନ ପୂର୍ବରୁ ଫଳାଫଳ ମଧ୍ୟ ପ୍ରକାଶ ପାଇଛି। ତଥାପି ସରକାର ଏଥିରେ ସନ୍ତୁଷ୍ଟ ନୁହେଁ ବୋଲି ସେ କହି ଫାଷ୍ଟ-ଟ୍ରାକ୍ କୋର୍ଟ ଗଠନ ପାଇଁ ନିର୍ଦ୍ଦେଶ ଦେଇଥିବା କଥା ଜଣାଇଛନ୍ତି।
ତେବେ ଗୋଟିଏ ଦିନରେ ଦିଆଯାଇଥିବା ଦୁଇଟି ବୟାନରେ କେଉଁଠି ମଧ୍ୟ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି ସମ୍ପର୍କରେ କୌଣସି ଉଲ୍ଲେଖ କରାଯାଇନଥିଲା। ଦିଲ୍ଲୀର ଜନ୍ତର ମନ୍ତର ସମେତ ଦେଶର ବିଭିନ୍ନ ସ୍ଥାନରେ ଚାଲିଥିବା ଛାତ୍ର ଆନ୍ଦୋଳନର ପ୍ରମୁଖ ଦାବି ହେଉଛି କେନ୍ଦ୍ର ଶିକ୍ଷାମନ୍ତ୍ରୀଙ୍କ ଇସ୍ତଫା।
ଆନ୍ଦୋଳନକାରୀମାନଙ୍କ କହିବା ଅନୁସାରେ, ପେପର ଲିକ୍ ଘଟଣାର ନୈତିକ ଦାୟିତ୍ୱ ଶିକ୍ଷା ମନ୍ତ୍ରଣାଳୟର ଥିବାରୁ ଧର୍ମେନ୍ଦ୍ର ପ୍ରଧାନଙ୍କୁ ପଦ ଛାଡ଼ିବା ଉଚିତ। ଦିଲ୍ଲୀ ପୁଲିସର କାର୍ଯ୍ୟାନୁଷ୍ଠାନ ପରେ ଆନ୍ଦୋଳନ ଆହୁରି ତୀବ୍ର ହୋଇଥିବା ବେଳେ ବିରୋଧୀ ଦଳମାନେ ମଧ୍ୟ ଏହି ଦାବିକୁ ସମର୍ଥନ କରୁଛନ୍ତି।
ଏପଟେ ଗୁରୁବାର କେନ୍ଦ୍ର ସରକାର ସଚିବ ସ୍ତରରେ ବଡ଼ ଧରଣର ଅଦଳବଦଳ କରିଛନ୍ତି। ଉଚ୍ଚ ଶିକ୍ଷା ବିଭାଗର ସଚିବ ବିନୀତ ଜୋଶୀଙ୍କ ସ୍ଥାନରେ ରାଜସ୍ଥାନ କ୍ୟାଡରର ୧୯୯୪ ବ୍ୟାଚ୍ ଆଇଏଏସ୍ ଅଧିକାରୀ ନରେଶ ପାଲ ଗଙ୍ଗୱାରଙ୍କୁ ନିଯୁକ୍ତ କରାଯାଇଛି। ଗଙ୍ଗୱାର ଏହା ପୂର୍ବରୁ ପଶୁପାଳନ ଓ ଡେୟାରି ବିଭାଗର ସଚିବ ଥିଲେ। ବିନୀତ ଜୋଶୀଙ୍କୁ ପଞ୍ଚାୟତିରାଜ ମନ୍ତ୍ରଣାଳୟର ସଚିବ ଭାବେ ବଦଳି କରାଯାଇଛି।
ତେବେ ଏହି ଅଦଳବଦଳକୁ ନେଇ ମଧ୍ୟ ପ୍ରଶ୍ନ ଉଠୁଛି। କାରଣ ଆନ୍ଦୋଳନକାରୀମାନଙ୍କ ମୁଖ୍ୟ ଦାବି ହେଉଛି ଶିକ୍ଷାମନ୍ତ୍ରୀଙ୍କ ଇସ୍ତଫା, କୌଣସି ଅମଲାତାନ୍ତ୍ରିକ ପରିବର୍ତ୍ତନ ନୁହେଁ।
ଅନ୍ୟପଟେ ବିରୋଧୀ ଦଳମାନେ ସଂସଦ ଭିତରେ ଓ ବାହାରେ ସରକାର ଉପରେ ଚାପ ବଢ଼ାଇଛନ୍ତି। ଲୋକସଭା ବିରୋଧୀ ଦଳନେତା ରାହୁଲ ଗାନ୍ଧୀ ଓ INDIA ମେଣ୍ଟର ସାଂସଦମାନେ ଗାନ୍ଧୀ ସ୍ମୃତି ପରିଦର୍ଶନ କରି ଅହିଂସାର ବାର୍ତ୍ତା ଦେଇଥିଲେ। ସଂସଦରେ ମଧ୍ୟ ବିରୋଧୀ ଦଳ କହିଛି ଯେ, ଧର୍ମେନ୍ଦ୍ର ପ୍ରଧାନଙ୍କୁ ପଦରୁ ହଟାଇବା ପର୍ଯ୍ୟନ୍ତ ସରକାରଙ୍କ ପ୍ରସ୍ତାବିତ ଆଲୋଚନାକୁ ସେମାନେ ଗ୍ରହଣ କରିବେ ନାହିଁ।
ମୋଦିଙ୍କ ମଧ୍ୟରାତ୍ରି ଭିଡିଓ ପରେ ରାହୁଲ ଗାନ୍ଧୀ ସୋସିଆଲ ମିଡିଆରେ ପ୍ରତିକ୍ରିୟା ଦେଇ କହିଛନ୍ତି ଯେ, ଛାତ୍ରଛାତ୍ରୀଙ୍କ ମୁଖ୍ୟ ଦାବି ହେଉଛି ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା। ସେ କହିଛନ୍ତି, “ଛାତ୍ରଛାତ୍ରୀଙ୍କ ବୁଦ୍ଧିମତାକୁ ଅପମାନ କରନ୍ତୁ ନାହିଁ। ପ୍ରଥମେ ଧର୍ମେନ୍ଦ୍ର ପ୍ରଧାନଙ୍କୁ ବର୍ଖାସ୍ତ କରନ୍ତୁ, ଛାତ୍ରଙ୍କ ଉପରେ ବଳପ୍ରୟୋଗ କରିଥିବା ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଅନ୍ତୁ ଏବଂ ସରକାର କ୍ଷମା ପ୍ରାର୍ଥନା କରନ୍ତୁ।”
ଏହି ପ୍ରସଙ୍ଗରେ ସରକାର ପେପର ଲିକ୍ ବିରୋଧରେ ନୂଆ ଆଇନ ଆଣିବାର ପ୍ରସ୍ତୁତି କରୁଥିବା ବେଳେ, ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି ଓ ଛାତ୍ର ଆନ୍ଦୋଳନ ଏବେ ମଧ୍ୟ ଜାରି ରହିଛି।
