ନୂଆଦିଲ୍ଲୀ, (ସତ୍ୟପାଠବ୍ୟୁରୋ): ବିଶ୍ବ ମଞ୍ଚରେ ସାଣିତ ହେଲା ଭାରତର ସ୍ବର। ଜାତିସଂଘରେ ଭାରତ ଦୃଢ଼ ଦାବି ରଖିଥିବାବେଳେ ସୁରକ୍ଷା ପରିଷଦର ଅଧିକ ସଂସ୍କାର ଜରୁରୀ ବୋଲି ନିଜ ମତ ରଖିଛି। ମିଳିତ ଜାତିସଂଘ ସୁରକ୍ଷା ପରିଷଦ (ୟୁଏନଏସସି)ରେ ସଂସ୍କାର ପାଇଁ ପୁଣି ସମର୍ଥନ ଦୋହରାଇଛି ଭାରତ। ୟୁଏନଏସସିର କାର୍ଯ୍ୟକାରିତା ଉପରେ ବାର୍ଷିକ ଖୋଲା ବିତର୍କରେ ଭାରତ କହିଛି ଯେ, ସୁରକ୍ଷା ପରିଷଦର ସଂସ୍କାରର ଆବଶ୍ୟକତା ପୂର୍ବ ଅପେକ୍ଷା ସ୍ପଷ୍ଟ ଏବଂ ଅଧିକ ଜରୁରୀ। ଜାତିସଂଘରେ ଭାରତର ସ୍ଥାୟୀ ମିଶନର ଚାର୍ଜ ଡି’ଆଫେୟର୍ସ, ଯୋଜନା ପଟେଲ ଅନୁରୋଧ କରିଛନ୍ତି ଯେ ୟୁଏନଏସସି ଆଜି ଏବଂ ଭବିଷ୍ୟତର ଚ୍ୟାଲେଞ୍ଜର ମୁକାବିଲା ପାଇଁ ଉପଯୁକ୍ତ ଭାବରେ ପ୍ରସ୍ତୁତ ରହୁ। ଭାରତୀୟ ରାଷ୍ଟ୍ରଦୂତ ୧୯୪୫ ମସିହାରେ ପ୍ରତିଷ୍ଠିତ ଜାତିସଂଘ ସୁରକ୍ଷା ପରିଷଦର ଗଠନରେ ପରିବର୍ତ୍ତନର ଆବଶ୍ୟକତା ଉପରେ ଗୁରୁତ୍ୱାରୋପ କରି ଉଲ୍ଲେଖ କରିଛନ୍ତି ଯେ ବିଶ୍ୱ ସମ୍ପୂର୍ଣ୍ଣ ଭାବରେ ପରିବର୍ତ୍ତନ ହୋଇଛି। ସଦସ୍ୟ ରାଷ୍ଟ୍ରର ନାଗରିକମାନେ ସୁରକ୍ଷା ପରିଷଦର ବିଶ୍ୱସନୀୟତା ଏବଂ ନିଷ୍ପତ୍ତି ଗ୍ରହଣ ଉପରେ ପ୍ରଶ୍ନ ଉଠାଇଛନ୍ତି। ୧୯୪୫ ମସିହାର ବିଶ୍ୱ ଏବେ ସମ୍ପୂର୍ଣ୍ଣ ଭିନ୍ନ। ସେବେଠାରୁ ଜାତିସଂଘର ସଦସ୍ୟତା ଚାରିଗୁଣ ବୃଦ୍ଧି ପାଇଛି। ୮୦ ବର୍ଷ ପୂର୍ବର ଏକ ବିବାଦର ଫଳାଫଳ ଏହାର ଗଠନ, କାର୍ଯ୍ୟକାରିତା, ଦୃଷ୍ଟିକୋଣ ଏବଂ କାର୍ଯ୍ୟ ପଦ୍ଧତିକୁ ସବୁଦିନ ପାଇଁ ନିର୍ଣ୍ଣୟ କରିପାରିବ ନାହିଁ। ଏଥିରେ ଶୀଘ୍ର ପରିବର୍ତ୍ତନ ହେବା ଆବଶ୍ୟକ। ଯୋଜନା ପଟେଲ ସ୍ଥାୟୀ ଏବଂ ଅସ୍ଥାୟୀ ଉଭୟ ବର୍ଗରେ ସୁରକ୍ଷା ପରିଷଦର ବିସ୍ତାର ଉପରେ ଭାରତର ମତାମତକୁ ଦୋହରାଇଛନ୍ତି। ସୁରକ୍ଷା ପରିଷଦ ସଂସ୍କାର ଉପରେ ଭାରତର ମତାମତ ସାର୍ବଜନବିଦିତ। ଆମେ ବିଶ୍ୱ ଦକ୍ଷିଣ ପାଇଁ ଅଧିକ ପ୍ରତିନିଧିତ୍ୱ ସହିତ ଉଭୟ ବର୍ଗରେ ବିସ୍ତାର ଚାହୁଁଛୁ ବୋଲି ସେ କହିଛନ୍ତି। ସେ କହିଛନ୍ତି, ୟୁଏନଏସସିର କାର୍ଯ୍ୟ ପଦ୍ଧତିରେ ସଂସ୍କାରକୁ ପୃଥକ ଭାବରେ ଆଲୋଚନା କରାଯିବା ଉଚିତ୍ ନୁହେଁ। ସଂସ୍କାର ସଦସ୍ୟତା ବର୍ଗ, ଆଞ୍ଚଳିକ ପ୍ରତିନିଧିତ୍ୱ ଏବଂ ଭିଟୋ ଭଳି ଅନ୍ୟାନ୍ୟ ପ୍ରସଙ୍ଗ ସହିତ ଜଡିତ। ସୁରକ୍ଷା ପରିଷଦର ଯେକୌଣସି ସଂସ୍କାରରେ ଏହି ପ୍ରସଙ୍ଗଗୁଡ଼ିକୁ ଏକାଠି ବିଚାର କରିବାକୁ ସେ ଆହ୍ୱାନ କରିଛନ୍ତି। ସେ ଦୁଇ ବର୍ଷ ପାଇଁ ନିର୍ବାଚିତ ଅସ୍ଥାୟୀ ସଦସ୍ୟଙ୍କୁ ମଧ୍ୟ ଡକ୍ୟୁମେଣ୍ଟ ଦେବାକୁ ଦାବି କରିଥିଲେ। ସେ କହିଥିଲେ ଯେ ଐତିହାସିକ ଡକ୍ୟୁମେଣ୍ଟ ପାଇବା କେବଳ କିଛି ଚୟନିତ ସଦସ୍ୟଙ୍କ ମଧ୍ୟରେ ସୀମିତ ରହିବା ଉଚିତ୍ ନୁହେଁ। ସେ ସୁରକ୍ଷା ପରିଷଦ ପ୍ରକ୍ରିୟାରେ ସ୍ୱଚ୍ଛତା ପାଇଁ ଆହ୍ୱାନ କରି ତାଲିକାଭୁକ୍ତ ଏବଂ ତାଲିକାଭୁକ୍ତରୁ ଦୂରର ଉଦାହରଣ ଦେଇ ସୁରକ୍ଷା ପରିଷଦ ସଂକୀର୍ଣ୍ଣ ରାଜନୈତିକ ସ୍ୱାର୍ଥ ହାସଲ ପାଇଁ ଏକ ମଞ୍ଚ ହେବା ଉଚିତ୍ ନୁହେଁ ବୋଲି କହିଛନ୍ତି।
