ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଆମ ଆଦମୀ ପାର୍ଟି (ଆପ)ର ଜାତୀୟ ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ହରିୟାଣାର ହିସାରରେ ଏକ ସଭାରେ ‘ମେକ ଇଣ୍ଡିଆ ନଂ ୧’ ଅଭିଯାନର ଶୁଭାରମ୍ଭ କରିଛନ୍ତି। ଏହି ସଭାରେ ସେ କେତେକ ପ୍ରଶ୍ନ କରିଛନ୍ତି ଯେ, ଭାରତରେ ଦାରିଦ୍ର୍ୟତା କାହିଁକି ରହିଛି? ଭାରତର ପ୍ରତ୍ୟେକ ପିଲା କାହିଁକି ଭଲ ଶିକ୍ଷା ପାଇ ପାରିଲେ ନାହିଁ? ଆମର କ’ଣ ଅଭାବ ଅଛି? ସେ କହିଛନ୍ତି, ଆମେ ସ୍ବାଧୀନତାର ୭୫ ବର୍ଷ ପାଳନ କରୁଛୁ।ଦେଶରେ ଏହାକୁ ଅତି ଉତ୍ସାହର ସହିତ ପାଳନ କରାଯାଉଛି। କିନ୍ତୁ ସମସ୍ତଙ୍କ ମନରେ ଗୋଟିଏ ପ୍ରଶ୍ନ ଅଛି, ୭୫ ବର୍ଷ କୌଣସି ଦେଶ ପାଇଁ ଅଧିକ ସମୟ ନୁହେଁ କିନ୍ତୁ ଏହା କମ ମଧ୍ୟ ନୁହେଁ। ୧୩୦ କୋଟି ଭାରତୀୟଙ୍କ ପ୍ରଶ୍ନ ହେଉଛି ଏହି ୭୫ ବର୍ଷ ମଧ୍ୟରେ ଅନେକ ଦେଶ ଆମକୁ ଅତିକ୍ରମ କରିଛନ୍ତି। ଆମେ କାହିଁକି ପଛରେ ରହିଲୁ? ଭାରତର ଲୋକମାନେ ହେଉଛନ୍ତି ଦୁନିଆର ସବୁଠାରୁ ବୁଦ୍ଧିମାନ ଲୋକ। ବିଶ୍ୱର ପ୍ରତ୍ୟେକ ବହୁରାଷ୍ଟ୍ରୀୟ କମ୍ପାନୀରେ ଭାରତୀୟମାନେ ନିଶ୍ଚିତ ଭାବରେ ମିଳିବେ।ଯେତେବେଳେ ଭଗବାନ ପୃଥିବୀ ସୃଷ୍ଟି କରିଥିଲେ, ସେତେବେଳେ ସେ ଭାରତକୁ ସବୁକିଛି ଦେଇଥିଲେ ଏବଂ ଭାରତକୁ ସବୁଠାରୁ ସୁନ୍ଦର କରିଥିଲେ। ନଦୀ ଅଛି, ପର୍ବତ ଅଛି, ଜଡିବୁଟି ଅଛି, ସମୁଦ୍ର ଅଛି, ସବୁକିଛି ଅଛି, ତେବେ ଭାରତ କାହିଁକି ପଛରେ ପଡିଗଲା?
ସେ କହିଛନ୍ତି ଯେ ସିଙ୍ଗାପୁର ଆମର ୧୫ ବର୍ଷ ପରେ ସ୍ବାଧୀନ ହୋଇଥିଲା। କିନ୍ତୁ ଏହା ଆମଠାରୁ କିପରି ଆଗେଇ ଗଲା? ଦ୍ୱିତୀୟ ବିଶ୍ୱଯୁଦ୍ଧରେ ଜାପାନ ଧ୍ୱଂସ ହୋଇଯାଇଥିଲା କିନ୍ତୁ ଆଜି ଏହା ଆମକୁ ପଛରେ ପକାଇ ଦେଇଛି। ଦ୍ୱିତୀୟ ବିଶ୍ୱଯୁଦ୍ଧ ପରେ ଜର୍ମାନୀ ମଧ୍ୟ ସମାପ୍ତ ହୋଇଥିଲା, ଆଜି ଏହା ଆମକୁ ଅତିକ୍ରମ କରିଛି, ତେବେ ଆମେ କାହିଁକି ପଛରେ ପଡ଼ିଲୁ? ଆମର ବ୍ୟବସ୍ଥା ଖରାପ।
ଗତ ୭୫ ବର୍ଷ ମଧ୍ୟରେ, ଦେଶର ରାଜନେତା ଏବଂ ରାଜନୈତିକ ଦଳମାନେ ଏକାଠି ହୋଇ କେବଳ ରାଜନୀତି କରିଛନ୍ତି। ଯଦି ସେମାନଙ୍କ ବିଶ୍ୱାସରେ ଦେଶକୁ ଛାଡି ଦିଆଯାଏ, ତେବେ ପରବର୍ତ୍ତୀ ୭୫ ବର୍ଷ ମଧ୍ୟ ଏହିପରି ଆମେ ପଛେଇ ରହିବା। ୭୫ ବର୍ଷ ଧରି ନେତା କେବଳ ରାଜନୀତି କରିଛନ୍ତି, ତେଣୁ ଭାରତ ପଛେଇ ଗଲା । ବର୍ତ୍ତମାନ କେବଳ ଗୋଟିଏ ଆଶା ଅଛି ଯେ ଲୋକମାନେ ଏକଜୁଟ ହେବା ଜରୁରୀ। ଆମେ ଦେଶର ପ୍ରତ୍ୟେକ କୋଣକୁ ଯିବା। ପ୍ରତ୍ୟେକ ରାଜ୍ୟକୁ ଯିବା ଏବଂ ଲୋକଙ୍କୁ ଯୋଡବାକୁ ଚେଷ୍ଟା କରିବା। ଆମର ଲକ୍ଷ୍ୟ ହେଉଛି ୧୩୦ କୋଟି ଲୋକଙ୍କୁ ଯୋଡିବା। ସେଥିପାଇଁ ମୁଁ ସମସ୍ତଙ୍କୁ ନିବେଦନ କରୁଛି ଯେ ସେମାନେ ଭାଜପା, କଂଗ୍ରେସ କିମ୍ବା ଆମ ଆଦମୀ ପାର୍ଟି କିମ୍ବା ଅନ୍ୟ କୌଣସି ଦଳର ସଦସ୍ୟ ହୁଅନ୍ତୁ ପଛେ, ଆମର ଉଦ୍ଦେଶ୍ୟ ହେଉଛି ଲୋକଙ୍କୁ ଯୋଡିବା। ଯେଉଁମାନେ ଭାରତକୁ ଏକ ନମ୍ବର ଦେଖିବାକୁ ଚାହୁଁଛନ୍ତି ସେମାନେ ଏହି ‘ମେକ ଇଣ୍ଡିଆ ନଂ ୧’ ଅଭିଯାନରେ ଯୋଗ ଦିଅନ୍ତୁ। ଏହି ଅଭିଯାନରେ ଯୋଗଦେବା ପାଇଁ ଆପଣଙ୍କୁ ୯୫୧୦୦୦୧୦୦୦ ରେ ଏକ ମିସ କଲ ଦେବାକୁ ପଡିବ ବୋଲି କେଜ୍ରିୱାଲ କହିଛନ୍ତି।
