ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଗୁଜରାଟ ବିଧାନସଭା ନିର୍ବାଚନ ପାଇଁ ପ୍ରଥମ ପର୍ଯ୍ୟାୟ ଭୋଟ ଗ୍ରହଣକୁ ଆଉ ଦିନ କେଇଟା ବାକି ରହିଲା । ଏହା ପୂର୍ବରୁ କଂଗ୍ରେସ ଓ ଆମ୍ ଆଦମୀ ପାର୍ଟି ଗୁଜରାଟବାସୀଙ୍କ ପାଇଁ ପ୍ରତିଶ୍ରୁତିର ପାହାଡ ଠିଆ କରିଦେଇଥିବା ବେଳେ ଦୀର୍ଘ ୨୭ ବର୍ଷ ହେବ ଗୁଜରାଟ ଶାସନରେ ଥିବା ବିଜେପି ଆଜି ତାର ସଂକଳ୍ପପତ୍ର ବା ଇସ୍ତାହାର ଘୋଷଣା କରିଛନ୍ତି ।
ଏହି କ୍ରମରେ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡା କହିଛନ୍ତି କି ରାଜ୍ୟରେ ପୁଣିଥରେ ବିଜେପି ସରକାର ଗଠନ କଲେ ସର୍ବପ୍ରଥମେ ଜାତୀୟ ସମ୍ପତ୍ତି ନଷ୍ଟ କରୁଥିବା ଲୋକଙ୍କ ପାଇଁ କଠୋର ଦଣ୍ଡବିଧାନର ଆଇନ ଅଣାଯିବ । ସେପଟେ ଗୁଜରାଟକୁ ଏକ ନିବେଶ ସ୍ଥଳୀ କରିବା ପାଇଁ ଯାହା ଯାହା ପଦକ୍ଷେପ ଆବଶ୍ୟକ ତାହା ସରକାରକୁ ଆସିଲେ ତୁରନ୍ତ ପୁରଣ କରାଯିବ ବୋଲି ସେ କହିଛନ୍ତି । ଏହି ସଭାରେ ଉପସ୍ଥିତ ଥିବା ବିଜେପିର ଅନ୍ୟତମ ନେତା ସିଆର ପାଟିଲ କହିଛନ୍ତି କି ଏହି ସଂକଳ୍ପପତ୍ର ପ୍ରସ୍ତୁତ କରିବାକୁ ଗୁଜରାଟର ୧ କୋଟି ଲୋକଙ୍କର ମତ ନିଆଯାଇଛି ।
ସେପଟେ କଂଗ୍ରେସ ତାର ଘୋଷଣା ପତ୍ରରେ ସରକାରକୁ ଆସିଲେ ୧୦ ଲକ୍ଷ ସରକାରୀ ନିଯୁକ୍ତି ଦିଆଯିବ ବୋଲି ପ୍ରତିଶ୍ରୁତି ଦେଇଥିବା ବେଳେ ଆଜି ବିଜେପି ତାର ଘୋଷଣାପତ୍ରରେ ଏହାକୁ ୨୦ ଲକ୍ଷ କରିଛି । ସେପଟେ ଆମ୍ ଆଦମୀ ପାର୍ଟି ମହିଳାମାନଙ୍କ ପାଇଁ ମାସିକ ପେନସନ ଯୋଜନା ଘୋଷଣା କରିଥିବା ବେଳେ ବିଜେପି କହିଛି ସରକାରକୁ ପୁଣି ଫେରିଲେ ୧ ଲକ୍ଷ ମହିଳାଙ୍କୁ ରୋଜଗାର ପ୍ରଦାନ କରାଯିବ । ଏହାସହ ବିଜେପି ତାର ଘୋଷଣାପତ୍ରରେ ଫୁଡ ପାର୍କ ଓ ଜଳସେଚନ ପାଇଁ ୨୫ ହଜାର କୋଟି ଟଙ୍କା ବିନିଯୋଗର ପ୍ରତିଶ୍ରୁତି ଦେଇଛି । ଏହାସହ ସରକାରକୁ ଆସିଲେ ୟୁନିଫର୍ମ ସିଭିଲ କୋଡ (ୟୁସିସି) ଲାଗୁ କରିବା ସହିତ। ରାଜ୍ୟରେ ଏମ୍ସ ଭଳି ଉଚ୍ଚକୋଟୀର ୨ଟି ହସ୍ପିଟାଲ କରିବାକୁ ପ୍ରତିଶ୍ରୁତି ଦେଇଛି ଦଳ। ଏହାସହିତ ଛାତ୍ର ଛାତ୍ରୀମାନଙ୍କୁ ସରକାରଙ୍କ ତରଫରୁ ମାଗଣା ସ୍କୁଟି ପ୍ରଦାନ ସହ ଆତଙ୍କବାଦୀ ଆକ୍ରମଣ ଓ ଆତଙ୍କବାଦକୁ ସହାୟତା କରୁଥିବା ସଂଗଠନ ଉପରେ ନୂଆ କଟକଣା ଲଗାଯିବ ବୋଲି ବିଜେପି ଆଜି ଗୁଜରାଟ ଭୋଟରମାନଙ୍କୁ ପ୍ରତିଶ୍ରୁତି ଦେଇଛି ।
