ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଦେଶର ସମସ୍ତ ରାଜ୍ୟରେ ୨୦୨୪ ସୁଦ୍ଧା ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ)ର ଶାଖା କାର୍ଯ୍ୟାଳୟ ସ୍ଥାପନ ହେବ। ନବ ରାୟପୁରର ଅଟଳ ନଗର ଅଞ୍ଚଳରେ ଏନଆଇଏର ରାୟପୁର ଶାଖା କାର୍ଯ୍ୟାଳୟ ଭବନର ଉଦଘାଟନୀ ଉତ୍ସବରେ କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହା ଏହା କହିଛନ୍ତି। ଆଗାମୀ ଦିନରେ ଦେଶରେ ଏନଆଇଏ ତୃତୀୟ ଆତଙ୍କବାଦ ନିରୋଧୀ ନେଟୱର୍କରେ ପରିଣତ ହେବ ବୋଲି ସେ କହିଛନ୍ତି। ଏହି ଅବସରରେ ସେ କହିଛନ୍ତି ଯେ ବାମପନ୍ଥୀ ଉଗ୍ରବାଦର ମୁକାବିଲା କ୍ଷେତ୍ରରେ ସରକାର ସଫଳ ହୋଇଛନ୍ତି।
ଶ୍ରୀ ଶାହା କହିଛନ୍ତି ଯେ, ୨୦୧୪ ପରେ ଏପର୍ଯ୍ୟନ୍ତ ୭୭ % ହିଂସା ହ୍ରାସ ପାଇଥିବା ବେଳେ ଏଥି ଜନିତ ମୃତ୍ୟୁ ସଂଖ୍ୟାରେ ୮୭ % ହ୍ରାସ ପାଇଛି। ୨୦୧୪ରେ ୧୧୩ଟି ଜିଲ୍ଲା ବାମପନ୍ଥୀ ଉଗ୍ରବାଦର ଶିକାର ଥିବା ବେଳେ ଏବେ ମାତ୍ର ୪୬ଟି ଜିଲ୍ଲା ବାମପନ୍ଥୀ ଉଗ୍ରବାଦର ଶିକାର ହେଉଥିବା ସେ କହିଛନ୍ତି। ଧାରା ୩୧୭ ଉଛେଦ ହେବା ପରେ ଜାମ୍ମୁ କାଶ୍ମୀରରେ ଶାନ୍ତିର ବାତାବରଣ ସ୍ଥାପନ ହୋଇଥିବା ଶ୍ରୀ ଶାହା କହିଛନ୍ତି।
ସେ କହିଛନ୍ତି, ଏନଆଇଏ ବର୍ତ୍ତମାନ ଆନ୍ତର୍ଜାତୀୟ ସ୍ତରରେ ଏକ ମୁଖ୍ୟ ଅନୁସନ୍ଧାନକାରୀ ସଂସ୍ଥା ଭାବରେ ସ୍ୱୀକୃତି ପାଇଛି। ଅଳ୍ପ କିଛି ଅବନତି ପରେ ଏଜେନ୍ସି ଏହାର ସମସ୍ତ ଲକ୍ଷ୍ୟ ହାସଲ କରିବାରେ ସଫଳ ହୋଇଛି ବୋଲି ସେ କହିଛନ୍ତି।
ସେ କହିଛନ୍ତି, ସୀମାପାର ଅପରାଧକୁ ସଫଳତାର ସହ ମୁକାବିଲା କରିବା ରାଜ୍ୟ ତଥା କେନ୍ଦ୍ରର ସାମୂହିକ ଦାୟିତ୍ୱ ଅଟେ। ୨୦୧୯ ପରେ ଜାମ୍ମୁ କାଶ୍ମୀରକୁ ୫୭ ହଜାର କୋଟି ଟଙ୍କା ବିନିଯୋଗ ଆସିଛି। ଏନଜିଓ ବିରୋଧରେ ଦୃଢ଼ ପଦକ୍ଷେପ ଗ୍ରହଣ କରାଯାଇଛି ଯାହା ଭାରତର ଅଭିବୃଦ୍ଧିରେ ବାଧା ସୃଷ୍ଟି କରୁଛି।
ଆତଙ୍କବାଦ ତଥା ଆନୁସଙ୍ଗିକ ଅପରାଧ ପାଇଁ ମୋଦୀ ସରକାରଙ୍କ ଶୂନ୍ୟ ସହନଶୀଳତା ନୀତି ରହିଛି ବୋଲି ଦାବି କରି ଶାହା କହିଛନ୍ତି ଯେ ଆତଙ୍କବାଦୀ ଅନୁସନ୍ଧାନରେ ଉତ୍ତମ ସମନ୍ୱୟ ରକ୍ଷା କରିବାକୁ ଏନଆଇଏ ଏହାର ବିଦେଶୀ ପ୍ରତିପକ୍ଷଙ୍କ ସହ ସମ୍ପର୍କ ସ୍ଥାପନ ଦିଗରେ କାର୍ଯ୍ୟ କରୁଛି।
