ଭୁବନେଶ୍ୱର, ୧୮/୧(ସତ୍ୟପାଠ ବ୍ୟୁରୋ): ରାଜଧାନୀ ଭୁବନେଶ୍ବରରେ ଚାଞ୍ଚଲ୍ୟ । ପଟିଆ ରେଳ ଷ୍ଟେସନ ନିକଟରେ ଦୁଇ ନାବାଳିକାଙ୍କୁ ପ୍ରଥମେ ଅପହରଣ ପରେ ହାତ ଗୋଡ ବାନ୍ଧି ରାତିସାରା ଗଣଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି । ଦୁଷ୍କର୍ମର ଶିକାର ହୋଇଥିବା ପୀଡିତାଙ୍କ ମଧ୍ୟରୁ ଜଣଙ୍କର ବୟସ ୧୨ ବର୍ଷ ଓ ଅନ୍ୟ ଜଣଙ୍କର ୧୪ ବର୍ଷ ବୋଲି ସୂଚନା ମିଳିଛି । ହକି ବିଶ୍ବକପ୍ ପାଇଁ ରଙ୍ଗୀନ ଆଲୋକମାଳାରେ ସଜେଇ ହୋଇଥିବା ରାଜଧାନୀରେ ଏଭଳି ଅତ୍ୟନ୍ତ ଲଜ୍ଜାଜନକ ଘଟଣା ଘଟିବା ଏବେ ଚାରିଆଡେ ଆଲୋଡନ ଖେଳାଇଛି । ସେପଟେ ଏହି ଘଟଣାରେ ମୁଖ୍ୟ ଅଭିଯୁକ୍ତକୁ ଗିରଫ କରିଛି ପୋଲିସ।
ଗଣଦୁଷ୍କର୍ମ ପରେ ଦୁଇ ପୀଡିତା ଅଭିଯୁକ୍ତଙ୍କ କବଳରୁ ଖସି ଆସି ପରିବାର ଲୋକଙ୍କୁ ଜଣାଇବା ପରେ ଏନେଇ ଥାନାରେ ଅଭିଯୋଗ ହୋଇଛି । ଏହାସହିତ ସ୍ଥାନୀୟ ଏସିପି ଓ ଇନଫୋସିଟି ଥାନା ସହାୟତାରେ ଦୁଇ ନାବାଳିକାଙ୍କୁ ଉଦ୍ଧାର କରାଯାଇ ସେମାନଙ୍କୁ ଚାଇଲ୍ଡ ଲାଇନକୁ ହସ୍ତାନ୍ତର କରାଯାଇଛି । ଏହି ଦୁଷ୍କର୍ମ ଘଟଣାରେ ମୁଖ୍ୟ ଅଭିଯୁକ୍ତ କୃଷ୍ଣଚନ୍ଦ୍ର ମଲ୍ଲିକ(୨୩) ଓରଫ କାହ୍ନାକୁ ପୋଲିସ ଗିରଫ କରିଛି । ଅଭିଯୁକ୍ତ କଟକ ବାଙ୍କି ପଦନପୁର ଅଞ୍ଚଳର ବୋଲି ଜଣାପଡିଛି । ସେପଟେ ଅନ୍ୟ ଅଭିଯୁକ୍ତମାନଙ୍କୁ ଧରିବାକୁ ଛାନଭିନ୍ ଜାରି ରହିଛି ।
ପୀଡିତାଙ୍କ ପରିବାର ଲୋକଙ୍କ ଅଭିଯୋଗ ଅନୁଯାୟୀ, ସନ୍ଧ୍ୟା ସମୟରେ ଦୁଇ ନାବାଳିକା ପଟିଆ ରେଳ ଷ୍ଟେସନ କଡ଼ରେ ବୁଲୁଥିଲେ । ଏହି ସମୟରେ ସେଠାରେ ଥିବା କିଛି ଅସାମାଜିକ ଯୁବକ ସେମାନଙ୍କୁ ଅପହରଣ କରି ରେଳ ଓଭରବ୍ରିଜ ପାଖକୁ ନେଇଯାଇଥିଲେ । ସେଠାରେ ଅଭିଯୁକ୍ତମାନେ ଦୁଇ ନାବାଳିକାଙ୍କୁ ଗୋଡ ହାତ ବାନ୍ଧି ରାତିସାରା ଦୁଷ୍କର୍ମ କରିଥିଲେ । ଏପରିକି ଦୁଷ୍କର୍ମ ପରେ ଏକଥା କାହାକୁ ଜଣାଇଲେ ସେମାନେ ଦୁହିଁଙ୍କୁ ଛାଡିବେନି ବୋଲି ଧମକ ଦେଇଥିଲେ ।
ସକାଳେ ଦୁଇ ପୀଡିତା ସେଠାରୁ ଖସି ଆସି ଏ ସମ୍ପର୍କରେ ପରିବାର ଲୋକଙ୍କୁ ଜଣାଇଥିଲେ । ଏନେଇ ପରିବାର ଲୋକେ ସେହି ଯୁବକମାନଙ୍କୁ ପଚରାଉଚରା କରିବାରୁ ଓଲଟା ସେମାନେ କିଛି ଟଙ୍କା ଦେଇ ମୁହଁ ବନ୍ଦ ରଖିବାକୁ ଧମକାଇ ଥିଲେ । ଏନେଇ ପରିବାର ଲୋକେ ଚାଇଲ୍ଡ ଲାଇନକୁ ଜଣାଇବା ପରେ ଥାନାରେ ଅଭିଯୋଗ କରିଥିଲେ । ଘଟଣାଟି ପଟିଆ ରେଳ ଲାଇନ ପାଖରେ ଘଟିଥିବାରୁ ଏନେଇ ଜିଆରପି ଥାନାରେ ଅଭିଯୋଗ ହୋଇଛି । ଆଜି ଦୁଇ ପୀଡିତାଙ୍କ ବୟାନ ରେକର୍ଡ କରାଯିବା ସହ ଡାକ୍ତରୀ ମାଇନା ହେବ ବୋଲି ଜଣାପଡିଛି । ବର୍ତ୍ତମାନ ପୋଲିସ ଅନ୍ୟ ଅଭିଯୁକ୍ତମାନଙ୍କୁ ଖୋଜାଖୋଜି ଚଳାଇଛି ।
