ଚରଣ ସିଂହ ମିନା ବନାମ ସନ୍ତୋଷ କୁମାର ସିଂହ

0 41,355

(ସତ୍ୟପାଠ ବ୍ୟୁରୋ) ଭୁବନେଶ୍ବର: ଡବଲ ମର୍ଡର ମିଷ୍ଟ୍ରୀକୁ ଛତିଶଗଡ଼ ପୋଲିସ ଯେଭଳି ଭାବେ ତଦନ୍ତ କଲା ଏବଂ ମୁଖ୍ୟ ଅଭିଯୁକ୍ତ ପୂର୍ବ ବିଜେଡି ନେତା ଅନୁପ ସାଏଙ୍କର ସମ୍ପୃକ୍ତିର ଟିକ୍‌ନିଖି ତଥ୍ୟ ପ୍ରମାଣକୁ ଯୋଗାଡ଼ କରିବାରେ ସଫଳ ହେଲା ତାହା ଏବେ ଉଭୟ ରାଜ୍ୟରେ ଚର୍ଚ୍ଚର ବିଷୟ ପାଲଟିଛି  । ଗତକାଲି ରାୟଗଡ଼ ଏସ୍‌ପିଙ୍କର ସାମ୍ବାଦିକ ସମ୍ମିଳନୀ ଦେଖିବା ପରେ ଛତିଶଗଡ଼ ଅପେକ୍ଷା ଓଡ଼ିଶାର ଲୋକେ ରାୟଗଡ଼ ପୋଲିସର କାର୍ଯ୍ୟକୁ ବେଶୀ ପ୍ରଶଂସା କରୁଛନ୍ତି । ଅନେକଙ୍କର କହିବା କଥା ଯଦି ଘଟଣା ରାୟଗଡ଼ ଜିଲ୍ଲାରେ ହୋଇନଥାନ୍ତା ଏବଂ ଛତିଶଗଡ଼ ପୋଲିସ ପରିବର୍ତ୍ତେ ଓଡ଼ିଶା ପୋଲିସ ତଦନ୍ତ କରିଥାନ୍ତା ତା’ ହେଲେ ଅନୁପ ସାଏ ଆଜି ନିଶରେ ଘିଅ ମାରି ପଣ୍ୟାଗାର ନିଗମ କାର୍ଯ୍ୟାଳୟର ଆରାମ ଚେୟାରରେ ବସିଥାନ୍ତେ ।

 

ରାୟଗଡ଼ ପୋଲିସ 2ଟି ଅଚିହ୍ନା ଶବ ଯାହାଙ୍କର ମୁହଁ ଉପରେ ଗାଡ଼ି ଚଢ଼ାଇ ସମ୍ପୂର୍ଣ୍ଣ ବିକୃତ କରିଦିଆଯାଇଥିଲା ଏଭଳି ମାମଲାକୁ ହାତକୁ ନେଲା 3 ବର୍ଷ 9 ମାସ ଧରି ତଦନ୍ତ ଚଲାଇଲା, 6ଟି ରାଜ୍ୟ ବୁଲିଲା, 700 ଲୋକଙ୍କୁ ପଚରାଉଚରା କରି ତଥ୍ୟ ପ୍ରମାଣ ଆଦାୟ କଲା । ଶେଷରେ ଜଣେ ପୂର୍ବ ବିଧାୟକ, ବାହୁବଳି ଏକ ସରକାରୀ ନିଗମର ଅଧ୍ୟକ୍ଷ ଏବଂ ପଶ୍ଚିମ ଓଡ଼ିଶାର ନବୀନ ବାବୁଙ୍କର ଜଣେ ଅନୁଗତ ଖାସ୍‌ ଅନୁପ ସାଏ ଭଳି ଲୋକଙ୍କୁ ହାତକଡ଼ି ଲଗାଇଦେଲା । ଠିକ୍‌ ଏହି ପରିପ୍ରେକ୍ଷିରେ ଓଡ଼ିଶା ପୋଲିସର ଦକ୍ଷତା ଛତିଶଗଡ଼ ପୋଲିସ ସହ ତୁଳନା କରିବା ଆରମ୍ଭ କରିଦେଇଛନ୍ତି ।
କେଇ ମାସ ତଳେ ଯାଜପୁର ଜିଲ୍ଲା ଧର୍ମଶାଳା ବ୍ଲକ ହରିଦାସପୁର ପିଇଓ ସ୍ମିତାରାଣୀ ବିଶ୍ବାଳ ଆତ୍ମହତ୍ୟା (ହତ୍ୟାକାଣ୍ଡ) କଥା ବିଚାରକୁ ନିଆଯାଇପାରେ । ଅନୁପ ସାଏଙ୍କ ଭଳି ଅଭିଯୁକ୍ତ ରୁପେଶ ଭଦ୍ରା ଏବଂ ତାଙ୍କ ପରିବାର ଶାସକ ବିଜୁ ଜନତା ଦଳର ଟାଣୁଆ ନେତା ।  ହଠାତ ସ୍କିତାରାଣୀ ବିଶ୍ବାଳଙ୍କ ରହସ୍ୟମୟ ମୃତ୍ୟୁ ଏବଂ ତା’ ପରେ ତଦନ୍ତକାରୀ ଯାଜପୁର ଜିଲ୍ଲା ଏସ୍‌ପିଙ୍କ କାର୍ଯ୍ୟକଳାପ । କଳ୍ପନା ଦାଶ କ୍ଷେତ୍ରରେ ମୃତଦେହ ଚିହ୍ନିବା ଅବସ୍ଥାରେ ନଥିଲା । ଯଦି ଓଡ଼ିଶା ପୋଲିସ ହୋଇଥାନ୍ତା ତେବେ ୟୁଡି କେସ୍‌ଟିଏ କେସ୍‌ କରି ବସିପଡ଼ିଥାନ୍ତା । କିନ୍ତୁ ଛତିଶଗଡ଼ ପୋଲିସ ପୁରା ମୂଳ ଯାଏ ଗଲା ।

ଗୋଟିଏ ପଟେ ରାୟଗଡ଼ ଜିଲ୍ଲା ଏସ୍‌ପି ସନ୍ତୋଷ ସିଂହ ଘଟଣାର ମୂଳ ଯାଏ ଗଲେ ଏବଂ ପୂରା ଘଟଣାକୁ ଆରପାର୍ କରିଦେଲେ । ଅନ୍ୟପଟେ ସ୍ମିତାରାଣୀ ମାମଲାରେ ଯାଜପୁର ଏସ୍‌ପି ଚରଣ ସିଂହ ମିନାଙ୍କର ତଦନ୍ତର ତରିକା ଦେଖିବା କଥା । ଯିଏ ମୁଖ୍ୟ ଅଭିଯୁକ୍ତ, ସେ ଖସିବା ପାଇଁ ଗୋଟିଏ କାହାଣୀ ରଚିଲା ଆଉ ଏସ୍‌ପି ମହୋଦୟଙ୍କୁ ଶୁଣାଇଲା । ଚରଣ ସିଂହ ମିନା ଅଭିଯୁକ୍ତ ଭଦ୍ରାର କାହାଣୀ ଶୁଣିଲେ ଆଉ ତାକୁ ଏତେ ବିଶ୍ବାସଯୋଗ୍ୟ ମଣିଲେ ଯେ ଗଣମାଧ୍ୟମ ସାମ୍ନାରେ ଆସି କହିଲେ ଯେ ରୁପେଶ ଭଦ୍ରା ଏବଂ ସ୍ମିତାରାଣୀ ବିଶ୍ବାଳଙ୍କ ମଧ୍ୟରେ ଅନୈତିକ ସମ୍ପର୍କ ଥିଲା । ସ୍ମିତାରାଣୀ କୁଆଡ଼େ ବିବାହ କରିବାକୁ ଯିଦ୍‌ ଧରୁଥିଲେ ଓ ରୁପେଶ ରାଜି ନହେବାରୁ ସେ କୁଆଡ଼େ ଆତ୍ମହତ୍ୟା କଲେ । ଚରଣ ସିଂହ ମିନା ରୁପେଶର କାହାଣୀକୁ ବିଶ୍ବାସ କରିଗଲେ  ଆଉ ତଦନ୍ତକୁ ସେଇଠି ଅଟକାଇ ଦେଲେ । ବିରୋଧୀ ରାଜନୈତିକ ଦଳ ଏବଂ ସ୍ମିତାରାଣୀଙ୍କ ପରିବାର ଲୋକଙ୍କ ଅଭିଯୋଗ ଥିଲା ଯେ ଆତ୍ମହତ୍ୟା ନୁହେଁ ତାଙ୍କୁ ହତ୍ୟା କରାଯାଇଛି । ସମସ୍ତଙ୍କର ଆଶା ଥିଲା ଯେ ଅତନ୍ତପକ୍ଷେ ଯାଜପୁର ପୋଲିସ ଅଭିଯୁକ୍ତର କାହାଣୀକୁ ବିଶ୍ବାସ କରିବ ପାହିଁ ଏବଂ ହତ୍ୟାକାଣ୍ଡ ଦୃଷ୍ଟି କୋଣରୁ ତଦନ୍ତ କରିବ । ସେ ଅନୁସାରେ କଲ୍‌ ରେକର୍ଡ ଯାଞ୍ଚ କରିଥାନ୍ତା, ରଙ୍ଗଶାଳାର ସିସିଟିଭି ଫୁଟେଜ୍‌ ଜବତ କରିଥାନ୍ତା, ଗାଡ଼ି କେଉଁଠୁ ଆସିଥିଲା, ରଙ୍ଗଶାଳା କେଉଁମାନେ ଥିଲେ ସେକଥା ପଚାରି ବୁଝିବା କଥା । । କିନ୍ତୁ ତାହା କରିବା ପରିବର୍ତ୍ତେ ଅଭିଯୁକ୍ତର କାହାଣୀ ବିଶ୍ବାସ କଲା ଯାଜପୁର ପୋଲିସ । ଗୁରୁତ୍ବପୂର୍ଣ୍ଣ କଥା ହେଲା ମୃତ୍ୟୁର 20 ମିନିଟ୍‌ ଆଗରୁ ସ୍ମିତାରାଣୀ ତାଙ୍କ ଝିଅଙ୍କୁ ଫୋନ କରି କଥା ହେଉଛନ୍ତି, ଆଉ କହୁଛନ୍ତି ଯେ ମୁଁ ଘରକୁ ଯାଉଛି ବୋଲି କହିଥିଲେ । ତେଣୁ ଏକଥା ବିଶ୍ବାସଯୋଗ୍ୟ ନୁହେଁ ଯେ ସ୍ମିତାରାଣୀ ଆତ୍ମହତ୍ୟା କରିଛନ୍ତି । କିନ୍ତୁ ଦୁର୍ଭାଗ୍ୟର କଥା ଯାଜପୁର ପୋଲିସ ଅଭିଯୁକ୍ତର କାହାଣୀକୁ ବିଶ୍ବାସ କଲା ସ୍ମିତାରାଣୀଙ୍କ ପରିବାର କିମ୍ବା ବିରୋଧୀ ଦଳର ଅଭିଯୋଗକୁ ନୁହେଁ । କେବଳ ସ୍ମିତାରାଣୀ ଘଟଣା ନୁହେଁ ପିପିଲିର ବେବିନା ଘଟଣା ହେଉ କି ଟିକିରି ଶିକ୍ଷୟିତ୍ରୀ ଇତିଶ୍ରୀ ଘଟଣା ହେଉ ଯେଉଁ ଯେଉଁ ମାମଲାରେ ବିଜେଡି ନେତାଙ୍କ କଥା ଉଠିଛି ସେଠି ଏହିଭଳି କାହାଣୀ କରି ତଦନ୍ତକୁ ଅନ୍ଧାର ଭିତରକୁ ଠେଲି ଦିଆଯାଉଛି ।

Leave A Reply

Your email address will not be published.