(ସତ୍ୟପାଠ ବ୍ୟୁରୋ) ଭୁବନେଶ୍ୱର : ବିଜେବି କଲେଜରେ ଉତ୍ତେଜନା । ଆଜି ଦୁଇ ହଷ୍ଟେଲ ଛାତ୍ରଙ୍କ ମଧ୍ୟରେ ମୁହାଁମୁହିଁ ହୋଇଥିବାର ଖବର ମିଳିଛି। ଉଭୟ ଗୋଷ୍ଠୀ ପରସ୍ପରକୁ ମାଡ ମାରିଥିବା ସହ ହଷ୍ଟେଲରେ ଭଙ୍ଗାରୁଜା କରିଥିବାର ସୂଚନା ମିଳିଛି । ଏହି ଗଣ୍ଡଗୋଳରେ ଉଭୟ ହଷ୍ଟେଲର ୧୫ରୁ ଊର୍ଦ୍ଧ୍ୱ ଛାତ୍ର ଆହତ ହୋଇଛନ୍ତି। ଏବଂ ସେମାନଙ୍କୁ ଡାକ୍ତରଖାନରେ ଭର୍ତ୍ତି କରାଯାଇଥିବା ଜଣାପଡିଛି । ଖବର ପାଇ ଘଟଣାସ୍ଥଳରେ ବଡଗଡ ପୋଲିସ ପହଞ୍ଚି ପରିସ୍ଥିତି ଉପରେ ନଜର ରଖିଛି ।
ମିଳିଥିବା ସୂଚନା ମୁତାବକ , ଗତକାଲି କଲେଜର ଖାରବେଳ ଓ ଆମ୍ବେଦକର ହଷ୍ଟେଲ ଛାତ୍ରଙ୍କ ମଧ୍ୟରେ କୌଣସି ବ୍ୟକ୍ତିଗତ କଥାକୁ ନେଇ ଦୁଇ ଗୋଷ୍ଠୀଙ୍କ ଭିତରେ ଗଣ୍ଡଗୋଳ ହୋଇଥିଲା । ତେବେ ପୁଲିସ୍ ଉପସ୍ଥିତିରେ ସେହି ଘଟଣାର ସମାଧାନ ମଧ୍ୟ ହୋଇଥିଲା। କିନ୍ତୁ ଆଜି ସକାଳେ ଆମ୍ବେଦକର ହଷ୍ଟେଲର ୫୦ରୁ ଊର୍ଦ୍ଧ୍ୱ ଛାତ୍ର ଖାରବେଳ ହଷ୍ଟେଲକୁ ପଶି ଆସିଥିଲେ। ସେଠାକାର ବ୍ୟାପକ ଭଙ୍ଗାରୁଜ୍ଜା କରିବା ସହ ଛାତ୍ରମାନଙ୍କୁ ମାଡ ମାରିଥିବା ଅଭିଯୋଗ ହୋଇଛି।
ଖାରବେଳ ହଷ୍ଟେଲ ଜଣେ ଛାତ୍ରଙ୍କ କହିବା କଥା ହେଉଛି ଯେ , ସେମାନେ ରୁମରେ ଥିବାବେଳେ ୫୦ରୁ ଅଧିକ ଛାତ୍ର ପଶି ଆସି କବାଟ ଝରକା ଭଙ୍ଗାରୁଜା କରିବା ସହିତ ସେମାନଙ୍କୁ ବାଡ଼େଇ ଚାଲିଯାଇଥିଲେ। ବର୍ତ୍ତମାନ ସ୍ଥିତି ନିୟନ୍ତ୍ରଣ କରିବା ପାଇଁ ବିଜେବି କଲେଜ ପରିସର ପୁଲିସ ମୁତୟନ ହୋଇଛନ୍ତି।
