ଭୁବନେଶ୍ୱର(ସତ୍ୟପାଠ ବ୍ୟୁରୋ): ଭାରତକୁ ଫେରିଲେ ୟେମେନରେ ଫସିଥିବା ୭ ଭାରତୀୟ ନାବିକ । ଓମାନ ସରକାରଙ୍କ ସହାୟତାରେ ଭାରତ ସରକାର ସେମାନଙ୍କୁ ସୁରକ୍ଷିତ ଭାବେ ଫେରାଇ ଆଣିବା ପାଇଁ ଅଭିଯାନ ଚଲାଇଥିଲେ। ମୁମ୍ୱାଇର ନାବିକ ମହମ୍ମଦ ମୁନୱର କହିଛନ୍ତି ଆମେ ସେଠାରେ ସାଢ଼େତିନି ମାସ ଫସି ରହିଥିଲୁ। ଭାରତ ସରକାର ଓ ପ୍ରଧାନମନ୍ତ୍ରୀ ଦ୍ୱିପାକ୍ଷିକ କଥାବାର୍ତ୍ତା କରି ଆମକୁ ଉଦ୍ଧାର କରିଛନ୍ତି ।
ସରକାର ଆମ ସହିତ ୪ଟି ଅନ୍ୟ ଦେଶର ଲୋକମାନଙ୍କୁ ମଧ୍ୟ ସେଠାରୁ ଉଦ୍ଧାର କରିଛନ୍ତି । ଲକ୍ଷ୍ନୌର ନାବିକ ମହମ୍ମଦ ଜଶୀମ ଖାନ କହିଛନ୍ତି ୟେମେନରେ ସ୍ଥିତି ଗମ୍ଭୀର ରହିଛି। ବିଦ୍ରୋହୀମାନେ ଆମ ଜାହାଜ ଓ ସେଥିରେ ଥିବା ସାମଗ୍ରୀ ଉପରେ କବ୍ଜା କରିବା ପାଇଁ ଚାହୁଁଥିଲେ। ଆମମାନଙ୍କୁ ମଧ୍ୟ ବନ୍ଦୀ କରାଯାଇଥିଲା କାରଣ ଜାହାଜରେ ଚାଳକ ଦଳ ଥିଲୁ। ଯେତେବେଳେ ସେମାନେ ଜାଣିଲେ ଆମେ ଭାରତୀୟ ବୋଲି ଆମ ସହିତ ସେମାନେ ଭଲ ବ୍ୟବହାର କରିଥିଲେ।
