ନୂଆଦିଲ୍ଲୀ: ବିବାଦରେ ଅଧୀର ରଞ୍ଜନ ଚୌଧୁରୀ । ରାଷ୍ଟ୍ରପତି ଦ୍ରୋପଦୀ ମୁର୍ମୁଙ୍କ ସମ୍ପର୍କରେ ବିବାଦୀୟ ବୟାନ ଦେଇ ବିବାଦ ମଧ୍ୟରେ ଛନ୍ଦି ହୋଇଥିବା ଅଧୀର ରଞ୍ଜନ ଚୌଧୁରୀଙ୍କ ପାଇଁ ଅଡ଼ୁଆ ବଢ଼ିବାରେ ଲାଗିଛି । ଏହି ମାମଲାରେ ରାଜନୈତିକ ଉଷ୍ମତା ବଢିବାରେ ଲାଗିଛି ।
ବିବାଦୀୟ ମନ୍ତବ୍ୟ ଦେଇଥିବା କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ ଏହା ତାଙ୍କ ଭୁଲ ବୋଲି ସ୍ବୀକାର କରିବା ସହ ଏଥିରେ ପାର୍ଟି ହାଇକମାଣ୍ଡ ସୋନିଆ ଗାନ୍ଧୀଙ୍କୁ ଟଣା ନଯାଉ ବୋଲି କହିଛନ୍ତି ।
ବିବାଦ ଚରମ ସୀମାରେ ପହଞ୍ଚିିବା ପରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ଅଧୀର କହିଛନ୍ତି, ‘‘ଏହା ମୋର ଉଦ୍ଦେଶ୍ୟମୂଳକ ଟିପ୍ପଣୀ ନୁହେଁ ବରଂ, ଭୁଲବଶତଃ ମୁହଁରୁ ବାହାରି ଯାଇଛି । ମୁଁ ମୋ ଭୁଲ ସ୍ବୀକାର ମଧ୍ୟ କରୁଛି । ତେବେ ଯଦି ଏହା ରାଷ୍ଟ୍ରପତିଙ୍କୁ ଆଘାତ ଦେଇଥାଏ, ତେବେ ମୁଁ ବ୍ୟକ୍ତିଗତ ଭାବେ ତାଙ୍କୁ ଭେଟି କ୍ଷମା ମାଗିବି । ରାଷ୍ଟ୍ରପତିଙ୍କୁ ଭେଟିବା ପାଇଁ ମୁଁ ମଧ୍ୟ ସମୟ ମାଗିଛି । ଆସନ୍ତା ଦିନେ କି ଦୁଇ ଦିନ ମଧ୍ୟରେ ରାଷ୍ଟ୍ରପତି ସମୟ ମଧ୍ୟ ଦେଇପାରନ୍ତି । ତେବେ ସେ ରାଷ୍ଟ୍ରପତିଙ୍କୁ କ୍ଷମା ମାଗିବା ପାଇଁ ପ୍ରସ୍ତୁତ କିନ୍ତୁ ଏହି ପାଖଣ୍ଡିମାନଙ୍କୁ କ୍ଷମା ମାଗିବାର ଆବଶ୍ୟକତା ନାହିଁ ।’’
ନିଜର ବିବାଦୀୟ ମନ୍ତବ୍ୟକୁ ନେଇ ବିବାଦ ସତ୍ତ୍ବେ ମଧ୍ୟ ବିଜେପିକୁ ମଧ୍ୟ ଟାର୍ଗେଟ କରିବାକୁ ପଛାଇ ନାହାନ୍ତି ଅଧୀର । ଏହି ସଦନରେ ବିଜେପି ସଦସ୍ୟମାନେ ଏକାଧିକ ମହିଳାଙ୍କୁ ଦୁର୍ବ୍ୟବହାର କରିଛନ୍ତି । କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ, ସାଂସଦ ରେଣୁକା ଚୌଧୁରୀ, ସାଂସଦ ଶଶୀ ଥରରୁଙ୍କୁ ପତ୍ନୀଙ୍କ ସମ୍ପର୍କରେ ବିଜେପି କିପରି ମନ୍ତବ୍ୟ ରଖିଥିଲା ବୋଲି ଅଧୀର ରଞ୍ଜନ ପ୍ରଶ୍ନ କରିଛନ୍ତି ।
ସେହିପରି ବିଜେପି କେବଳ ଆଦିବାସୀ କାର୍ଡ ଖେଳିବାକୁ ଚାହୁଁଛି । ଦେଶର ଆଦିବାସୀ ସମ୍ପ୍ରଦାୟ ନରେନ୍ଦ୍ର ମୋଦିଙ୍କ ଶାସନରେ ସର୍ବାଧିକ କ୍ଷତିଗ୍ରସ୍ତ ହୋଇଛନ୍ତି ବୋଲି ମଧ୍ୟ ଅଧୀର ଅଭିଯୋଗ କରିଛନ୍ତି ।
