(ସତ୍ୟପାଠ ବ୍ୟୁରୋ) ଭୁବନେଶ୍ୱର: ପଞ୍ଜାବରେ କଂଗ୍ରେସ କନ୍ଦଳ ଥମିବାର ନାଁ ନେଉନାହିଁ। ଆସନ୍ତା ବର୍ଷ ହେବାକୁ ଥିବା ବିଧାନସଭା ନିର୍ବାଚନ ପୂର୍ବରୁ ପଞ୍ଜାବ କଂଗ୍ରେସର ଦଳୀୟ କଳହ ଏବେ ଚିନ୍ତାର କାରଣ ପାଲଟିଛି । ସିଦ୍ଧୁଙ୍କୁ ପଞ୍ଜାବ କଂଗ୍ରେସ ମୁଖ୍ୟ କରାଯିବାର ଖବର ପ୍ରକାଶ ପାଇବା ପରେ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ ଅସନ୍ତୋଷ ପ୍ରକାଶ କରିଛନ୍ତି। ଏଥିପାଇଁ ସେ ସୋନିଆ ଗାନ୍ଧୀଙ୍କୁ ଚିଠି ଲେଖିଛନ୍ତି।
ପଞ୍ଜାବ ମୁଖ୍ୟମନ୍ତ୍ରୀ ଅମରିନ୍ଦର ସିଂ କଂଗ୍ରେସ ସଭାପତି ସୋନିଆ ଗାନ୍ଧୀଙ୍କୁ ଚିଠି ଲେଖି ନବଜୋତ ସିଂ ସିଦ୍ଧୁଙ୍କୁ ପଞ୍ଜାବ କଂଗ୍ରେସ ମୁଖ୍ୟ ଭାବେ ନିଯୁକ୍ତ କରିବାକୁ ବିରୋଧ କରିଛନ୍ତି। କଂଗ୍ରେସ ସୂତ୍ରରୁ ମିଳିଥିବା ସୂଚନା ମୁତାବକ ପଞ୍ଜାବ ମୁଖ୍ୟମନ୍ତ୍ରୀ ସିଦ୍ଧୁଙ୍କୁ ପଦନ୍ନୋତି ଦିଆଯିବାର ସମ୍ଭାବନା ଉପରେ କହିଛନ୍ତି ଯେ , ଯଦି ପାର୍ଟିର ପୁରୁଖା ନେତାଙ୍କୁ ଅଣଦେଖା କରାଯାଏ ତେବେ ଆଗାମୀ ବିଧାନସଭା ନିର୍ବାଚନରେ ଦଳର ପ୍ରଦର୍ଶନ ଖରାପ ହେବ।
ସିଦ୍ଧୁଙ୍କ ଘରେ ସମର୍ଥକଙ୍କ ଭିଡ
ଅପରପକ୍ଷରେ ଶୁକ୍ରବାର ଦିନ ନବଜୋତ ସିଂ ସିଦ୍ଧୁ ସୋନିଆ ଗାନ୍ଧୀଙ୍କୁ ଭେଟିଥିଲେ, ଯାହା ପରେ ସନ୍ଧ୍ୟାରେ ପଟିଆଲାସ୍ଥିତ ତାଙ୍କ ବାସଭବନ ବାହାରେ ସମର୍ଥକଙ୍କ ଭିଡ ଜମିଥିଲା ଏବଂ ଲୋକମାନେ ତାଙ୍କ ପତ୍ନୀଙ୍କୁ ପୁଷ୍ପଗୁଚ୍ଛ ଦେଉଥିଲେ। ଏହା ପରେ ସିଦ୍ଧୁ ପଞ୍ଜାବ କଂଗ୍ରେସର କମାଣ୍ଡ ପାଇବାକୁ ନିଷ୍ପତ୍ତି ନିଆଯାଇଛି ବୋଲି କୁହାଯାଉଥିଲା। ତେବେ ଏପର୍ଯ୍ୟନ୍ତ ସିଦ୍ଧୁଙ୍କୁ କଂଗ୍ରେସର ମୁଖ୍ୟ କରିବା ପାଇଁ କୌଣସି ଆନୁଷ୍ଠାନିକ ଘୋଷଣା କରାଯାଇ ନାହିଁ କିମ୍ବା କୌଣସି ବଡ ନେତା ଏ ବାବଦରେ ବିବୃତ୍ତି ଦେଇନାହାଁନ୍ତି।
ମନୀଷ ତେୱାରୀଙ୍କ ଟ୍ୱିଟ୍
ଏହା ମଧ୍ୟରେ ଦଳର ବରିଷ୍ଠ ନେତା ମନୀଷ ତିୱାରୀ ପଞ୍ଜାବ ୟୁନିଟ୍ ର ସଭାପତି ପଦ ପାଇଁ ପୂର୍ବତନ ମନ୍ତ୍ରୀ ନବଜୋତ ସିଂ ସିଦ୍ଧୁଙ୍କ ନାମ ଉପରେ ହେଉଥିବା ଆଲୋଚନା ମଧ୍ୟରେ ଶୁକ୍ରବାର ଦିନ ରାଜ୍ୟର ଜନସଂଖ୍ୟାର ଧାର୍ମିକ ଏବଂ ସାମାଜିକ ପରିସଂଖ୍ୟାନ ଉପସ୍ଥାପନ କରି ଏହାକୁ ପରୋକ୍ଷରେ ଆଲୋଚନା କରିଥିଲେ। ହିନ୍ଦୁ ସମ୍ପ୍ରଦାୟର ଜଣେ ନେତାଙ୍କୁ ଏହି ପୋଷ୍ଟ ଦିଆଯିବା ଉଚିତ୍ ବୋଲି ସେ କହିଛନ୍ତି । ପଞ୍ଜାବ କଂଗ୍ରେସ ନେତା ପୱନ ଦିୱାନ ମଧ୍ୟ କହିଛନ୍ତି ଯେ ହିନ୍ଦୁ ସମ୍ପ୍ରଦାୟର ଜଣେ ନେତା ରାଜ୍ୟ ସଭାପତି ପଦରେ ରହିବା ଉଚିତ।
