ମନୀଷ ସିସୋଦିଆଙ୍କ ଘରେ ସିବିଆଇ ଚଢାଉ ପ୍ରସଙ୍ଗରେ କେଜ୍ରିୱାଲଙ୍କ ପ୍ରତିକ୍ରିୟା; “ସିବିଆଇକୁ ସ୍ବାଗତ, ଆମେ ସମ୍ପୂର୍ଣ୍ଣ ସହଯୋଗ କରିବୁ”

ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଦିଲ୍ଲୀ ସରକାରଙ୍କର ଅବକାରୀ ନୀତିକୁ ନେଇ ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ଘରେ ସିବିଆଇ ଚଢାଉ କରିଛି। ଅବକାରୀ ନୀତିକୁ ନେଇ ଦିଲ୍ଲୀ-ଏନସିଆରରେ ୨୧ଟି ସ୍ଥାନ ଉପରେ ସିବିଆଇ ପକ୍ଷରୁ ଚଢାଉ କରିଯାଇଛି। ଏହି ଚଢାଉ ନେଇ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଟୁଇଟ୍‌ କରିଛନ୍ତି। କେଜ୍ରିୱାଲ କହିଛନ୍ତି,ଯେଉଁ ଦିନ ଆମେରିକାର ସବୁଠୁ ବଡ଼ ଖବରକାଗଜର ପ୍ରଥମ ପୃଷ୍ଠାରେ ଦିଲ୍ଲୀ ଶିକ୍ଷା ମଡେଲକୁ ପ୍ରଶଂସା କରାଯାଇଥିଲା ଏବଂ ମନୀଷ ସିସୋଡିଆଙ୍କ ଫଟୋ ଛପା ଯାଇଥିଲା, ସେହି ଦିନ କେନ୍ଦ୍ର ମନୀଷଙ୍କ ଘରକୁ ସିବିଆଇ ପଠାଇଥିଲା, ସିବିଆଇକୁ ସ୍ବାଗତ। ଆମେ ତାଙ୍କୁ ସମ୍ପୂର୍ଣ୍ଣ ସହଯୋଗ କରିବୁ। ଅତୀତରେ ମଧ୍ୟ ଅନେକ ଯାଞ୍ଚ/ ଚଢାଉ ହୋଇଛି। କିଛି ମିଳି ନାହିଁ ଆଉ ଏବେ ମଧ୍ୟ କିଛି ମିଳିବ ନାହିଁ।

କେଜ୍ରିୱାଲ ଅନ୍ୟ ଏକ ଟୁଇଟରେ କହିଛନ୍ତି, ସମଗ୍ର ବିଶ୍ୱ ଦିଲ୍ଲୀର ଶିକ୍ଷା ଏବଂ ସ୍ବାସ୍ଥ୍ୟ ମଡେଲକୁ ପ୍ରଶଂସା କରୁଛି। ମାତ୍ର କେନ୍ଦ୍ର ସରକାର ଏହାକୁ ବନ୍ଦ କରିବାକୁ ଚାହୁଁଛନ୍ତି। ସେଥିପାଇଁ ଦିଲ୍ଲୀର ସ୍ବାସ୍ଥ୍ୟ ଓ ଶିକ୍ଷା ମନ୍ତ୍ରୀଙ୍କ ଘରେ ଚଢାଉ ଓ ଗିରଫ ହେଉଛି। ସ୍ବାଧୀନତାର ୭୫ ବର୍ଷ ମଧ୍ୟରେ ଯିଏ ଦେଶରେ ଭଲ କାମ କରିବାକୁ ଚେଷ୍ଟା କରେ, ତାଙ୍କୁ ରୋକିବାକୁ ଚେଷ୍ଟା କରାଯାଏ। ସେଥିପାଇଁ ଭାରତ ପଛରେ ରହିଯାଇଛି। ମାତ୍ର ଆମେ ଦିଲ୍ଲୀର ଭଲ କାମ ବନ୍ଦ ହେବାକୁ ଦେବୁ ନାହିଁ।

ଏହି ଚଢାଉ ସମ୍ପର୍କରେ ସୂଚନା ଦେଇ ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ଟୁଇଟ୍‌ କରି କହିଛନ୍ତି ଯେ, ସିବିଆଇ ଆସିଛି, ସ୍ବାଗତଯୋଗ୍ୟ। ଆମେ ସଚ୍ଚୋଟ। ଲକ୍ଷ ଲକ୍ଷ ପିଲାଙ୍କ ଭବିଷ୍ୟତ ତିଆରି କରୁଛୁ। ଏହା ଅତ୍ୟନ୍ତ ଦୁର୍ଭାଗ୍ୟଜନକ ଯେ ଯେଉଁମାନେ ଆମ ଦେଶରେ ଭଲ କାମ କରନ୍ତି ସେମାନେ ଏହିପରି ହଇରାଣ ହରକତ ହେଉଛନ୍ତି। ସେଥିପାଇଁ ଆମ ଦେଶ ଏପର୍ଯ୍ୟନ୍ତ ଏକ ନମ୍ବର ହୋଇପାରି ନାହିଁ।

ସୂଚନାଯୋଗ୍ୟ, କିଛି ଦିନ ପୂର୍ବେ ଦିଲ୍ଲୀ ସରକାରଙ୍କ ଅବକାରୀ ନୀତି ୨୦୨୧-୨୨ କାର୍ଯ୍ୟକାରୀ ହେବାରେ ଅନିୟମିତା ପ୍ରକାଶ ପାଇଥିଲା। ଏହି ଘଟଣାରେ ଦିଲ୍ଲୀ ଉପରାଜ୍ୟପାଳ ତତ୍କାଳୀନ ଦିଲ୍ଲୀ ଅବକାରୀ କମିସନର ଆରବ ଗୋପି କ୍ରୀଷ୍ଣ ଏବଂ ଉପ ଅବକାରୀ କମିଶନର ଆନନ୍ଦ କୁମାର ତିୱାରୀଙ୍କ ସମେତ ୧୧ ଜଣ ନିଲମ୍ବନ ହୋଇଛନ୍ତି। ଅବକାରୀ ନୀତି କାର୍ଯ୍ୟକାରୀ କରିବାରେ ଉକ୍ତ ଅଧିକାରୀମାନେ ତ୍ରୁଟି କରିବାରୁ ଦିଲ୍ଲୀ ଉପରାଜ୍ୟପାଳ ସେମାନଙ୍କୁ ନିଲମ୍ବନ କରିଛନ୍ତି।

Related Posts