ନୂଆଦିଲ୍ଲୀ: ଟିକାକରଣକୁ ନେଇ ଭାରତକୁ ମିଳିଛି ବିପୁଳ ସମର୍ଥନ । କରୋନା ଯୁଦ୍ଧ ରେ ଭାରତ ଇତିହାସ ସୃଷ୍ଟି କରିଛି । ତେବେ ଭରତର ଏହି ସଫଳତାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଶୁଭେଚ୍ଛା ଜଣାଇଛନ୍ତି ବିଲ ଗେଟ୍ସ । ଭାରତରେ ୨୦୦ କୋଟି ଡୋଜ୍ ଟିକାକରଣ ହୋଇସାରିଥିବା ବେଳେ ଏଥିଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଶୁଭେଚ୍ଛା ଜଣାଇଛନ୍ତି ମାଇକ୍ରୋସଫ୍ଟ କୋ-ଫାଉଣ୍ଡର ବିଲ୍ ଗେଟ୍ସ ।
ଟ୍ୱିଟ୍ କରି ବିଲ୍ ଗେଟ୍ସ ପ୍ରଧାନମନ୍ତ୍ରୀଙ୍କୁ ଶୁଭେଚ୍ଛା ଜଣାଇଛନ୍ତି । କରୋନା ଟିକାକରଣରେ ଭାରତ ବିଶ୍ୱରେ ଦ୍ୱିତୀୟ ସ୍ଥାନରେ ରହିଛି। ଭାରତ ଛଡ଼ା କେବଳ ଚୀନ୍ରେ ସର୍ବାଧିକ ଟିକାକରଣ ହୋଇଛି । ୧୬ ଜାନୁଆରୀ ୨୦୨୧ରୁ ଦେଶରେ ଭ୍ୟାକସିନେସନ୍ କାଯର୍ୟକ୍ରମ ଆରମ୍ଭ ହୋଇଥିଲା ।
୧୮ ମାସ ଧରି ଚାଲିଥିବା ଟିକାକରଣରେ ଏବେ ଯାଏଁ ୨୦୦ କୋଟି ମାର୍କକୁ ପାର କରିଛି । ଏହି ଅଭିଯାନରେ ୫ କୋଟି ୪୮ ଲକ୍ଷ ବୁଷ୍ଟର ଡୋଜ୍ ବି ରହିଛି। ପ୍ରଥମ ୧୦୦ କୋଟି ଟିକାକରଣ ୨୭୭ ଦିନରେ ହାସଲ ହୋଇଥିଲା । ତାସହ ଗୋଟିଏ ଦିନରେ ଅଢ଼େଇ କୋଟି ଟିକା ନେବା ଭଳି ବିରଳ ରେକର୍ଡ ବି ଭାରତରେ ହୋଇଛି। ଏବେ ଦେଶରେ ୧୪ ହଜାରରୁ ଅଧିକ ସେଣ୍ଟରରେ ଟିକା ନେଉଛନ୍ତି ଲୋକେ । ଏବେ ସୁଦ୍ଧା ଦେଶର ୯୬ ପ୍ରତିଶତ ଲୋକ ପ୍ରଥମ ଡୋଜ୍ ଓ ୮୭ ପ୍ରତିଶତ ଲୋକ ଦୁଇଟି ଡୋଜ୍ ଟିକା ଲଗାଇଛନ୍ତି ।
କୋଭିଡ୍-୧୯ ଟିକାକରଣ କ୍ଷେତ୍ରରେ ୨୦୦ କୋଟି ଡୋଜ୍ ଅତିକ୍ରମ କରିଯାଇଥିବାରୁ ‘ବିଶ୍ବ ସ୍ବାସ୍ଥ୍ୟ ସଙ୍ଗଠନ’ର ଦକ୍ଷିଣ-ପୂର୍ବ ଏସିଆର ଆଞ୍ଚଳିକ ନିର୍ଦେଶକ ଡାକ୍ତର ପୂନମ କ୍ଷେତ୍ରପାଳ ସିଂହ ମଧ୍ୟ ଭାରତକୁ ଅଭିନନ୍ଦନ ଜଣାଇଛନ୍ତି। ସଂକ୍ରମିତ ହେଉଥିବା ମହାମାରୀର ପ୍ରଭାବକୁ ସୀମିତ କରିବା ଲାଗି ଦେଶର ପ୍ରତିବଦ୍ଧତା ଏବଂ ଉଦ୍ୟମର ଏହା ଆହୁରି ଗୋଟାଏ ପ୍ରମାଣ ବୋଲି ସେ କହିଛନ୍ତି।
