ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଦିଲ୍ଲୀର ଉନ୍ନତି ପାଇଁ ଏବେ ମୋଦୀଜୀଙ୍କ ଆଶୀର୍ବାଦ ଦରକାର। ଦିଲ୍ଲୀ ନଗର ନିଗମ (ଏମସିଡି) ନିର୍ବାଚନ ଜିତିବା ପରେ ଏଭଳି କହିଲେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ। ଦିଲ୍ଲୀ ନଗର ନିଗମ ନିର୍ବାଚନରେ ବିପୁଳ ଭୋଟ ପାଇ ବିଜୟୀ ହେବା ପରେ ଆପ୍ କର୍ମୀଙ୍କୁ ସମ୍ବୋଧିତ କରିଥିଲେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ।
ସେ କହିଥିଲେ ଯେ, ସର୍ବପ୍ରଥମେ ମୁଁ ଦିଲ୍ଲୀବାସୀଙ୍କୁ ଏତେ ବଡ଼ ବିଜୟ ପାଇଁ ଅଭିନନ୍ଦନ ଜଣାଇବାକୁ ଚାହୁଁଛି। ଦିଲ୍ଲୀର ଲୋକଙ୍କୁ ଧନ୍ୟବାଦ ଯେ ସେମାନେ ତାଙ୍କ ପୁଅ ଏବଂ ଭାଇଙ୍କୁ ନଗର ନିଗମର ଦାୟିତ୍ବ ଦେବା ପାଇଁ ଯଥେଷ୍ଟ ଯୋଗ୍ୟ ବୋଲି ଭାବି ଭୋଟ ଦେଲେ। ବିଦ୍ୟାଳୟ ଠିକ୍ କରିବା ପାଇଁ ଆମେ ଦିନରାତି କଠିନ ପରିଶ୍ରମ କରିଥିଲୁ। ଲକ୍ଷ ଲକ୍ଷ ପିଲାଙ୍କ ଭବିଷ୍ୟତ ତିଆରି କଲୁ। ଲୋକମାନେ ଡାକ୍ତରଖାନାର ଦାୟିତ୍ବ ଦେଇଥିଲେ, ଆମେ ତାହା ମଧ୍ୟ କରିଛୁ। ଆମେ ଲୋକଙ୍କୁ ମାଗଣା ବିଦ୍ୟୁତ୍ ଦେଇଥିଲୁ। ଦିଲ୍ଲୀର ଲୋକମାନେ ଆଜି ଏକ ବଡ ବାର୍ତ୍ତା ଦେଇଛନ୍ତି ଯେ, ସମସ୍ତଙ୍କୁ ସକରାତ୍ମକ ରାଜନୀତି କରିବା ଉଚିତ। ଆମେ ଦୁର୍ବ୍ୟବହାର କରୁନାହୁଁ କି ଗଣ୍ଡଗୋଳ କରୁନାହୁଁ। ଏବେ ଲୋକମାନେ ଦୁର୍ନୀତି ଶେଷ କରିବାର ଦାୟିତ୍ବ ଆମକୁ ଦେଇଛନ୍ତି। ମୁଁ ଦିନରାତି ଏକ କରି ଏହି କାର୍ଯ୍ୟ ସମାପ୍ତ କରିବି।
ସେ ଆହୁରି ମଧ୍ୟ କହିଥିଲେ ଯେ, ଦିଲ୍ଲୀ ସମସ୍ୟାର ସମାଧାନ ପାଇଁ ସମସ୍ତଙ୍କ ସହଯୋଗ ଆବଶ୍ୟକ। ବିଶେଷ କରି ଆମକୁ କେନ୍ଦ୍ରର ସହଯୋଗ ଆବଶ୍ୟକ। ଆଜି ଏହି ମଞ୍ଚରୁ ଦିଲ୍ଲୀ ସମସ୍ୟାର ସମାଧାନ ପାଇଁ ମୁଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆଶୀର୍ବାଦ ଚାହୁଁଛି। ଦିଲ୍ଲୀ ସମସ୍ୟାର ସମାଧାନ ପାଇଁ ଆମକୁ ପ୍ରଧାନମନ୍ତ୍ରୀ ମୋଦୀ ଏବଂ କେନ୍ଦ୍ର ସରକାରଙ୍କ ଆଶୀର୍ବାଦ ଦରକାର।
