ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଷ୍ଟିଲ ଅଥରିଟି ଏଫ ଇଣ୍ଡିଆ ଲିମିଟେଡ (ସେଲ) ଓ ଏୟାରପୋର୍ଟ ଅଥରିଟି ଅଫ ଇଣ୍ଡିଆ (ଏଏଆଇ) ମଧ୍ୟରେ ଓଡିଶାର ରାଉରକେଲାରୁ ବାଣିଜ୍ୟିକ ବିମାନ ଉଡାଣ ପାଇଁ ଶୁକ୍ରବାର ନୂଆଦିଲ୍ଲୀ ଠାରେ ଏକ ଅପରେସନ ଏଣ୍ଡ ମ୍ୟାନେଜମେଣ୍ଟ (ଓ ଏଣ୍ଡ ଏମ) ବୁଝାମଣା ହୋଇଛି ।୨୦୧୮ରେ ସେଲ ଉଡାଣ ଯୋଜନା ଅନ୍ତର୍ଗତ ବାଣିଜ୍ୟିକ ଉଡାଣ ପରିଚାଳନା ପାଇଁ ନିଜ ବିମାନ ବନ୍ଦର ବ୍ୟବହାର କରିବାକୁ ବୁଝାମଣା ସ୍ୱାକ୍ଷର କରିଥିଲେ ।
ଏବେ ରାଉରକେଲାରୁ ବାଣିଜ୍ୟିକ ଉଡାଣ ଆରମ୍ଭ କରିବା ପାଇଁ ସେଲ, ରାଉରକେଲା ଷ୍ଟିଲ ପ୍ଲାଣ୍ଟ ଜରିଆରେ ଏଏଆଇ ସହିତ ‘ଓ ଏଣ୍ଡ ଏମ’ ରାଜିନାମାରେ ସ୍ୱାକ୍ଷର କରିଛି । ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଏହି ବିମାନ ବନ୍ଦରର ଉନ୍ନୟନ ପାଇଁ ବିତ୍ତୀୟ ସହାୟତା ପ୍ରଦାନ କରିଛନ୍ତି । ଓଡିଶା ସରକାର ଅନ୍ୟ ସ୍ଥାନୀୟ କ୍ଲିୟରାନ୍ସ ପ୍ରାପ୍ତିରେ ସହାୟତା ପ୍ରଦାନ କରିବା ସହ ସୁରକ୍ଷା, ଫାୟାର ଓ ଆମ୍ବୁଲାନ୍ସ ସେବା ପ୍ରଦାନ କରିବେ । ସେଲ-ରାଉରକେଲା ଷ୍ଟିଲ ପ୍ଲାଣ୍ଟ ପକ୍ଷରୁ ଏଏଆଇ, ବିମାନ ବନ୍ଦର ପରିଚାଳନା ଓ ପ୍ରବନ୍ଧନ କରିବ ।
ଏହି ବିମାନ ବନ୍ଦର ଔଦ୍ୟୋଗିକ ସହର ରାଉରକେଲା ଓ ଆଖପାଖର ସମସ୍ତ ବିମାନ ଯାତ୍ରୀଙ୍କୁ ସୁବିଧା ପ୍ରଦାନ କରିବ । ଆଗାମୀ ହକି ବିଶ୍ୱ କପ ପରିପ୍ରେକ୍ଷୀରେ ରାଉରକେଲାକୁ ବିମାନ ସେବା ଆରମ୍ଭ ହେବା ବେଶ ଗୁରୁତ୍ୱପୂର୍ଣ୍ଣ ଥିଲା । ଜାନୁୟାରୀ ୨୦୨୩ରେ ଖେଳାଯିବାକୁ ଥିବା ବିଶ୍ୱକପ ହକିରେ ସମୁଦାୟ ୪୪ଟି ମ୍ୟାଚ ରୁ ୨୦ଟି ମ୍ୟାଚ ରାଉରକେଲାରେ ଆୟୋଜିତ ହେବାକୁ ଯାଉଛି । ଏହି ବିଶ୍ୱସ୍ତରର କାର୍ଯ୍ୟକ୍ରମ ଦେଖିବାକୁ ରାଉରକେଲାକୁ ବହୁ ସଂଖ୍ୟାରେ ଲୋକ ଆସିବେ । ସେଥିପାଇଁ ଯାତାୟତ ଆବଶ୍ୟକତା ପୂରଣ ପାଇଁ ବିମାନ ସଂଯୋଗୀକରଣ ଏକ ପ୍ରମୁଖ ଭୂମିକା ରହିଛି ।
ଦେଶର ସର୍ବବୃହତ ଷ୍ଟିଲ କମ୍ପାନୀ ସେଲ ଓ ମହାରତ୍ନ କମ୍ପାନୀ, ସିପିଏସଇ ଉତ୍ପାଦନ ୟୁନିଟ ନିଜ ଆଖପାଖ ଅଞ୍ଚଳର ବିକାଶରେ ସକ୍ରିୟ ଭୂମିକା ନିର୍ବାହ କରୁଛି । ଆଞ୍ଚଳିକ ଅର୍ଥନୈତିକ ଗତିବିଧିକୁ ଆଗେଇ ନେବା ପାଇଁ ଏହା ଏକ ଜନହିତକର କାର୍ଯ୍ୟକ୍ରମ ।
