(ସତ୍ୟପାଠ ବ୍ୟୁରୋ) ଭୁବନେଶ୍ୱର : କୋଭିଡ୍ ମହାମାରୀ ଅନିଶ୍ଚିତତା ମଧ୍ୟରେ ୟୁଜିସି ପକ୍ଷରୁ ୨୦୨୧-୨୨ ଶିକ୍ଷାବର୍ଷ ପାଇଁ ଗାଇଡଲାଇନ ଜାରି କରାଯାଇଛି। ଦେଶର ବିଭିନ୍ନ କଲେଜ ଓ ବିଶ୍ୱବିଦ୍ୟାଳୟ କରୋନା କାଳରେ କେମିତି ପାଠପଢ଼ା ଆରମ୍ଭ କରିବେ, ସେ ବିଷୟରେ ଏହି ଗାଇଡଲାଇନରେ ଉଲ୍ଲେଖ କରାଯାଇଛି। ଗାଇଡଲାଇନ ଅନୁଯାୟୀ ନୂତନ ଏକାଡେମିକ୍ ସେଶନ ଅକ୍ଟୋବର ୧ ରୁ ଆରମ୍ଭ ହେବ ଏବଂ ଆଡମିଶନ ପ୍ରକ୍ରିୟା ସେପ୍ଟେମ୍ବର ୩୦ ସୁଦ୍ଧା ଶେଷ ହେବ।
ସିବିଏସ୍ଇ, ଆଇସିଏସ୍ଇ ଏବଂ ସମସ୍ତ ରାଜ୍ୟ ବୋର୍ଡର ଫଳାଫଳ ଘୋଷଣା ହେବା ପରେ ସ୍ନାତକୋତ୍ତର ପାଠ୍ୟକ୍ରମ ପାଇଁ ଆଡମିଶନ ପ୍ରକ୍ରିୟା ଆରମ୍ଭ ହେବା ନିଶ୍ଚିତ କରିବାକୁ ବିଶ୍ୱବିଦ୍ୟାଳୟ ଏବଂ କଲେଜ ଗୁଡ଼ିକୁ ନିର୍ଦ୍ଦେଶ ଦିଆଯାଇଛି ।
UGC ପକ୍ଷରୁ ଜାରି ନିର୍ଦ୍ଦେଶାବଳୀରେ କହିଛି ଯେ ଆଶା କରାଯାଉଛି ଯେ ଜୁଲାଇ 31 ସୁଦ୍ଧା ସମସ୍ତ ସ୍କୁଲ ବୋର୍ଡ ଦ୍ୱାଦଶ ଶ୍ରେଣୀ ପରୀକ୍ଷା ପାଇଁ ଫଳାଫଳ ଘୋଷଣା କରିବ। ଯଦି ଫଳାଫଳ ଘୋଷଣାରେ କୌଣସି ବିଳମ୍ବ ହୁଏ, ତେବେ ଅକ୍ଟୋବର 18 ସୁଦ୍ଧା ନୂତନ ଏକାଡେମିକ୍ ଅଧିବେଶନ ଆରମ୍ଭ ହୋଇପାରେ ।
ଅଫଲାଇନ୍, ଅନଲାଇନ୍ କିମ୍ବା ଉଭୟ ମାଧ୍ୟମରେ ଶିକ୍ଷାଦାନ ପ୍ରକ୍ରିୟା ଜାରି ରହିବା ଉଚିତ ବୋଲି ଆୟୋଗ ସ୍ପଷ୍ଟ କରିଛନ୍ତି। ମହାମାରୀ ସମୟରେ ଅଭିଭାବକମାନେ ସମ୍ମୁଖୀନ ହେଉଥିବା ଆର୍ଥିକ ଅସୁବିଧାକୁ ଦୃଷ୍ଟିରେ ରଖି କମିଶନ ବିଶ୍ୱବିଦ୍ୟାଳୟ ଓ ଉଚ୍ଚଶିକ୍ଷା ପ୍ରତିଷ୍ଠାନଗୁଡ଼ିକୁ କହିଛନ୍ତି ଯେ ଆଡମିସନ୍ ବାତିଲ କିମ୍ବା ଛାତ୍ରଛାତ୍ରୀଙ୍କ ସ୍ଥାନାନ୍ତର କ୍ଷେତ୍ରରେ ସଂପୂର୍ଣ୍ଣ ଫିସ୍ ଫେରସ୍ତ ହେବ ।
ସେହିପରି ଶେଷବର୍ଷ ପରୀକ୍ଷା ଅଗଷ୍ଟ ୩୧ ସୁଦ୍ଧା ସାରିବାକୁ ଗାଇଡଲାଇନରେ ନିର୍ଦ୍ଦେଶ ଦିଆଯାଇଛି। ତେବେ ୟୁଜିସି ଶେଷବର୍ଷ ପରୀକ୍ଷାକୁ ଯେମିତି ହେଲେ ଆୟୋଜନ କରିବାକୁ କହିଛି। ଏହି ପରୀକ୍ଷା ଉଭୟ ଅଫଲାଇନ କିମ୍ବା ଅନଲାଇନରେ କରାଯାଇ ପାରିବ। ପରୀକ୍ଷା ବେଳେ ସମସ୍ତେ ଗାଇଡଲାଇନ ପାଳନ କରିବାକୁ ବାଧ୍ୟ।
