ଭୁବନେଶ୍ବର: ରାଜ୍ୟ କଂଗ୍ରେସ ମଧ୍ୟରେ ଅନ୍ତ କନ୍ଦଳ ଓ ପିସିସି ସଭାପତି ପରିବର୍ତ୍ତନ ନେଇ ଚର୍ଚ୍ଚା ମଧ୍ୟରେ ଦିଲ୍ଲୀ ଗଲେ ବିଧାୟକ । ବାରମ୍ବାର ନିର୍ବାଚନରେ ବିଫଳତା ପରେ ପୁରା ସାଂଗଠନକି ପରିବର୍ତ୍ତନ ପାଇଁ ରାଜ୍ୟ କଂଗ୍ରେସ ଅଣ୍ଟା ଭିଡ଼ିଚି । ଦଳକୁ ସୁଦୃଢ କରିବା ପାଇଁ ଆଗକୁ ବଢ଼ିଛି ।
ତେବେ ଏହି ସବୁ ମଧ୍ୟରେ କିଏ ହେବେ ପରବର୍ତ୍ତୀ ପିସିସି ସଭାପତି ସେ ନେଇ ଚର୍ଚ୍ଚା ଲାଗି ରହିଛି । ଏହାରି ଭିତରେ ଦିଲ୍ଲୀରୁ ଆସିଛି ଡାକରା । ରାହୁଲ ଗାନ୍ଧୀଙ୍କ କାର୍ଯ୍ୟାଳୟରୁ ଫୋନ ଯୋଗେ ଡାକରା ଆସିବା ପରେ ଦିଲ୍ଲୀ ଯାଉଛନ୍ତି କିଛି କଂଗ୍ରେସ ବିଧାୟକ ।
ବିଧାୟକ ସଂଗଠନ ସୁଦୃଢ଼ ହେବ, ତୃଣମୂଳ ସ୍ତରରୁ ସାଙ୍ଗଠନିକ ଘର ସଜଡ଼ା ଆରମ୍ଭ ହେବ । ଦଳୀୟ ଆମୂଳଚୂଳ ପରିବର୍ତ୍ତନ ହେବ । ଏକ ଟାଣୁଆ ନେତୃତ୍ବ ଓଡିଶା କଂଗ୍ରେସ ପାଇବ । ଏ ନେଇ ରାହୁଲ ଗାନ୍ଧୀଙ୍କ କାର୍ଯ୍ୟାଳୟରୁ ଫୋନ ଯୋଗେ ଡାକରା ଆସିଥିଲା । 18 ଜଣ ନେତାଙ୍କୁ ଦିଲ୍ଲୀରୁ ଡାକରା ଆସିଛି । ବିଧାୟକ, ପିସିସି ବରିଷ୍ଠ କର୍ମକର୍ତ୍ତା, ପୂର୍ବତନ ପିସିସି ସଭାପତିମାନେ ଦିଲ୍ଲୀ ଯାଇ କଂଗ୍ରେସ ମୁଖ୍ୟ ରାହୁଲ ଗାନ୍ଧୀଙ୍କ ସହ ଆଲୋଚନା କରିବେ । ଖାଲି ନୂଆ ପିସିସି ସଭାପତି ରାଜ୍ୟକୁ ମିଳିବ ତା ନୁହେଁ ବିଧାୟକ ଦଳ ନେତା ମଧ୍ୟ ପରିବର୍ତ୍ତନ ହେବାର ସମ୍ଭାବନା ରହିଛି । କାରଣ ନରସିଂହ ମିଶ୍ର ପୂର୍ଵରୁ ଇସ୍ତଫା ଦେଇଛନ୍ତି ।ସେପଟେ କିଛି ଦିନ ପୂର୍ବରୁ କଂଗ୍ରେସ ରାଜ୍ୟ ପ୍ରଭାରୀ ଓଡିଶା ଗସ୍ତରେ ଆସି ସମସ୍ତ ବିଧାୟକ, ପୂର୍ବତନ ସଭାପତି, ଜିଲ୍ଲା ସଭାପତି ଓ ଅନ୍ୟାନ୍ୟ ନେତାଙ୍କ ସହ ସିଧାସଳଖ ଆଲୋଚନା କରିଥିଲେ । କଂଗ୍ରେସ ଭବନ ରେ ଏହି ଆଲୋଚନା ପର୍ଯ୍ୟାଲୋଚନା ହୋଇଥିବା ବେଳେ ଦଳର ସମସ୍ତ ବରିଷ୍ଠ, କନିଷ୍ଠ ନେତାଙ୍କ ସମେତ ସମସ୍ତ ଛାମୁଆ ସଂଗଠନର ମୁଖିଆ ମଧ୍ୟ ସାମିଲ ହୋଇଥିଲେ।
ପ୍ରଭାରୀ ଚେଲ୍ଲା କୁମାର ଓ ସହ ପ୍ରଭାରୀ ରୁଦ୍ର ରାଜୁ ଦଳର ସମସ୍ତ ବିଧାୟକଙ୍କ ସହ ୱାନ ଟୁ ୱାନ ଆଲୋଚନା କରିଥିଲେ । ବୈଠକ ପରେ ଖୁବଶୀଘ୍ର ପିସିସି ସଭାପତି ଘୋଷଣା ହୋଇପାରେ ବୋଲି କହିଥିଲେ ପ୍ରଭାରୀ ।
