ପିଇଓ ସ୍ମିତାରାଣୀଙ୍କ ମୃତ୍ୟୁ ସହ ଜଡ଼ିତ ରଙ୍ଗଶାଳା ରକ୍ଷା ପାଇଁ ପ୍ରଶାସନର ଉଦ୍ୟମକୁ ଜୋରଦାର ଝଟ୍କା ଲାଗିଛି। ରୂପେଶ ଭଦ୍ରଙ୍କ ରଙ୍ଗଶାଳାକୁ ନଭାଙ୍ଗି ଜନହିତ କାର୍ଯ୍ୟରେ ଲଗାଇବାକୁ ଯାଜପୁର ଜିଲ୍ଲାପାଳ ରାଜସ୍ୱ ବିଭାଗକୁ ଅନୁମତି ଲୋଡ଼ିଥିଲେ। ହେଲେ ଏହାକୁ ଅଗ୍ରାହ୍ୟ କରିଦେବା ସହ ରାଜସ୍ୱ ବିଭାଗ ପରୋକ୍ଷରେ ଜିଲ୍ଲାପାଳଙ୍କ ଉପରେ ବିରକ୍ତ ମଧ୍ୟ ହୋଇଛନ୍ତି।
ଜିଲ୍ଲାପାଳଙ୍କୁ ଚିଠି କରି ରାଜସ୍ୱ ବିଭାଗ ସ୍ପଷ୍ଟ କରିଛି ଯେ ଏଭଳି ଜବରଦଖଲ ସଂପତ୍ତିର କୌଣସି ବିକଳ୍ପ ବ୍ୟବହାରର ବ୍ୟବସ୍ଥା ଆଇନ୍ରେ ନାହିଁ । ଏପରିକି ସାଧାରଣତଃ କୌଣସି ଜିଲ୍ଲାପାଳ ଏନେଇ ସ୍ପଷ୍ଟୀକରଣ ମାଗନ୍ତି ନାହିଁ ବୋଲି ବିଭାଗ ଲେଖିଛି।
ବିନା କୌଣସି ସ୍ପଷ୍ଟୀକରଣରେ ଏଭଳି ସଂପତ୍ତି ଜବରଦଖଲ ମୁକ୍ତ କରିବା ଜରୁରୀ ବୋଲି ବିଭାଗ ସ୍ପଷ୍ଟ କରିଛି। ତେବେ ଜବରଦଖଲ ହେବାକୁ ଥିବା କୋଠାରେ ସ୍ମିତାରାଣୀଙ୍କ ମୃତ୍ୟୁ ଘଟିଥିବାରୁ, ପ୍ରମାଣ ନଷ୍ଟ ହେବା ଆଶଙ୍କା ଥିବାରୁ ଏହାକୁ ଭାଙ୍ଗିବା ପୂର୍ବରୁ କୋର୍ଟ କିମ୍ବା ତଦନ୍ତକାରୀ ସଂସ୍ଥାର ପରାମର୍ଶ ନେଇ ତୁରନ୍ତ ପଦକ୍ଷେପ ନେବାକୁ ବିଭାଗ ସ୍ପଷ୍ଟ କରିଛି।
