(ସତ୍ୟପାଠ ବ୍ୟୁରୋ) ଭୁବନେଶ୍ୱର : ଟୋକିଓ ଅଲିମ୍ପିକ୍ସରେ ଭାରତୀୟ ହକି ଦଳ ଚମତ୍କାର ପ୍ରଦର୍ଶନ କରିଛି। ଏହା ପରେ ଚାରିଆଡୁ ତାଙ୍କୁ ସମ୍ବର୍ଦ୍ଧନା ଦିଆଯାଉଛି। ଏବେ ଅଲମ୍ପିକରେ କାଂସ୍ୟ ପଦକ ବିଜେତା ଭାରତୀୟ ହକି ଖେଳାଳିଙ୍କ ନାମାନୁସାରେ ରବିବାର ଦିନ ପଞ୍ଜାବ ପ୍ରାୟ ୧୦ଟି ସରକାରୀ ସ୍କୁଲ୍ର ପୁନଃନାମକରଣ କରିଛି। ପଞ୍ଜାବ ଶିକ୍ଷା ମନ୍ତ୍ରୀ ବିଜୟ ଇନ୍ଦର ସିଙ୍ଗଲା ରବିବାର କହିଛନ୍ତି ଯେ ରାଜ୍ୟରୁ ଅଲିମ୍ପିକ ପଦକ ବିଜେତା ହକି ଦଳର ଖେଳାଳିଙ୍କ ନାମାନୁସାରେ ରାଜ୍ୟ ସରକାର ଦଶଟି ବିଦ୍ୟାଳୟର ନାମ ପରିବର୍ତ୍ତନ କରିଛନ୍ତି।
ସିଙ୍ଗଲା କହିଛନ୍ତି ଯେ ଟୋକିଓ ଅଲିମ୍ପିକ୍ସରେ ବ୍ରୋଞ୍ଜ ପଦକ ଜିତିଥିବା ଭାରତୀୟ ପୁରୁଷ ହକି ଦଳ ଦଳରେ ଅଂଶଗ୍ରହଣ କରିଥିବା ପଞ୍ଜାବର ବିଭିନ୍ନ ଖେଳାଳିଙ୍କ ନାମ ପରେ ମୁଖ୍ୟମନ୍ତ୍ରୀ ଅମରିନ୍ଦର ସିଂ ବିଦ୍ୟାଳୟର ନାମ ପରିବର୍ତ୍ତନ ପାଇଁ ନିର୍ଦ୍ଦେଶ ଦେଇଛନ୍ତି।
ମନ୍ତ୍ରୀ କହିଛନ୍ତି ଯେ , ଭାରତୀୟ ହକି ଦଳର ଅଧିନାୟକ ମନପ୍ରୀତ୍ ସିଂହଙ୍କ ନାମାନୁସାରେ, ଜଳନ୍ଧର ସ୍ଥିତ ମିଥାପୁର ‘ଗଭର୍ଣ୍ଣମେଣ୍ଟ୍ ସିନିଅର୍ ସେକେଣ୍ଡାରି ସ୍କୁଲ୍’କୁ ପୁନଃନାମିତ କରାଯାଇଛି। ବର୍ତ୍ତମାନ ସେ ସ୍କୁଲ୍ର ନାଁ ହେବ ‘ଅଲିମ୍ପିଆନ୍ ମନ୍ପ୍ରୀତ୍ ସିଂହ ଗଭର୍ଣ୍ଣମେଣ୍ଟ୍ ସିନିଅର୍ ସେକେଣ୍ଡାରି ସ୍କୁଲ୍’। ସେହିପରି ଅମୃତସରର ତିମ୍ମୋୱାଲ୍ରେ ଥିବା ‘ଗଭର୍ଣ୍ଣମେଣ୍ଟ୍ ସିନିଅର୍ ସେକେଣ୍ଡାରି ସ୍କୁଲ୍’କୁ ଉପଅଧିନାୟକ ହରମନ୍ପ୍ରୀତ୍ ସିଂହଙ୍କ ନାମାନୁସାରେ ପୁନଃନାମିତ କରାଯାଇଛି। ସୂଚନାଯୋଗ୍ୟ ଯେ ସେ ଟୋକିଓ ଅଲିମ୍ପିକ୍ ହକି କ୍ରୀଡ଼ାରେ ଭାରତ ପକ୍ଷରୁ ସର୍ବାଧିକ ୬ଟି ଗୋଲ୍ ଦେଇଥିଲେ। ସେ କହିଛନ୍ତି ଯେ ଏହି ବିଦ୍ୟାଳୟ ବର୍ତ୍ତମାନ ଅଲିମ୍ପିଆନ୍ ହରମନ୍ପ୍ରୀତ୍ ସିଂ ଜିଏସ୍ଏସ୍ଏସ୍, ଟିମୋୱାଲ୍ ନାମରେ ପରିଚିତ ହେବ।
ଅପରପକ୍ଷରେ , ଅମୃତସରର ଅଟ୍ଟାରି ‘ଗଭର୍ଣ୍ଣମେଣ୍ଟ୍ ସିନିଅର୍ ସେକେଣ୍ଡାରି ସ୍କୁଲ୍’କୁ ଶାମଶେର୍ ସିଂହ, ଫରିଦକୋଟସ୍ଥିତ ଗଭର୍ଣ୍ଣମେଣ୍ଟ୍ ମିଡଲ୍ ସ୍କୁଲ୍କୁ (ଗର୍ଲସ୍ ବେସିକ୍) ରୁପିନ୍ଦରପାଲ୍ ସିଂହ, ଜଳନ୍ଧରର କୁଶରୋପୁର ‘ଗଭର୍ଣ୍ଣମେଣ୍ଟ୍ ମିଡଲ୍ ସ୍କୁଲ୍’କୁ ହାର୍ଦ୍ଦିକ ସିଂହ, ଅମୃତସରସ୍ଥିତ ଖଲାଇହରା ଗଭର୍ଣ୍ଣମେଣ୍ଟ୍ ପ୍ରାଇମେରି ସ୍କୁଲ୍କୁ ଗୁରଜନ୍ତ ସିଂହଙ୍କ ନାମରେ ପୁନଃନାମିତ କରାଯାଇଛି।
ଏହାଛଡ଼ା, ଗୁରଦାସପୁର ଅନ୍ତର୍ଗତ ଚହଲ କଲାଣ ସରକାରୀ ଉଚ୍ଚ ବିଦ୍ୟାଳୟକୁ ସିମରଣଜିତ୍ ସିଂହଙ୍କ ନାମାନୁସାରେ ନାମିତ କରାଯାଇଛି। ଶିକ୍ଷାମନ୍ତ୍ରୀ କହିଛନ୍ତି, ଭାରତୀୟ କ୍ରୀଡ଼ା କ୍ଷେତ୍ରକୁ ପଞ୍ଜାବର ସ୍ବର୍ଣ୍ଣିମ ଅବଦାନ ରହିଛି। ହରିୟାଣା ପରେ ପଞ୍ଜାବ ଅଲିମ୍ପିକ୍ କ୍ରୀଡ଼ାକୁ ୨୦ଜଣ ଖେଳାଳି ପଠାଇ ଦେଶର ଦ୍ବିତୀୟ ସ୍ଥାନରେ ରହିଛି। ଉଲ୍ଲେଖଯୋଗ୍ୟ, ଭାରତୀୟ ପୁରୁଷ ହକି ଦଳ ୪୧ ବର୍ଷ ପରେ ଅଲିମ୍ପିକ ପଦକ ଜିତି ଇତିହାସ ସୃଷ୍ଟି କରିଥିଲେ। ଟୋକିଓ ଅଲିମ୍ପିକ୍ସରେ ପ୍ଲେ-ଅଫ୍ ମ୍ୟାଚ୍ରେ ବ୍ରୋଞ୍ଜ ଜିତିବା ପାଇଁ ଏକ ସଂକଳ୍ପବଦ୍ଧ ଭାରତୀୟ ଦଳ ଏକ ଭାଗ୍ୟଶାଳୀ ଜର୍ମାନୀକୁ ୫-୪ ରେ ପରାସ୍ତ କରିଥିଲା ।
