ଭୁବନେଶ୍ୱର,୨୫/୧(ସତ୍ୟପାଠ ବ୍ୟୁରୋ): ଗୁଜରାଟ ଦଙ୍ଗାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ନିର୍ମିତ ବିବିସର ବିବାଦୀୟ ଡକ୍ୟୁମେଣ୍ଟାରିକୁ ବିରୋଧ କରିବା ଦିନକ ପରେ କଂଗ୍ରେସ ଛାଡ଼ିଲେ ବରିଷ୍ଠ କଂଗ୍ରେସ ନେତା ଏ.କେ ଆଣ୍ଟୋନିଙ୍କ ପୁଅ ଅନୀଲ ଆଣ୍ଟୋନି। ସେ କଂଗ୍ରସର ସମସ୍ତ ପଦରୁ ଇସ୍ତଫା ଦେଇଛନ୍ତି। ଏନେଇ ସେ ଟ୍ୱିଟ୍ କରି ସୂଚନା ଦେଇଛନ୍ତି।
ଟ୍ୱିଟ୍ କରି ଅନୀଲ ଲେଖିଛନ୍ତି ଯେ, “ମୁଁ ଭାରତୀୟ ଜାତୀୟ କଂଗ୍ରସ ଓ କେରଳରେ ଦଳର ସମସ୍ତ ଦାୟିତ୍ୱରୁ ଇସ୍ତଫା ଦେଉଛି।ବାକ୍ ସ୍ୱାଧୀନତା ପାଇଁ ଲଢ଼େଇ କରୁଥିବା ଲୋକଙ୍କର ଟ୍ୱିଟ୍କୁ ଫେରାଇ ନେବାକୁ କହିବା ଅସହିଷ୍ଣୁତା। ମୁଁ ଏପରି କରିବାକୁ ମନା କରିଦେଲି।”
ସୂଚନାଯୋଗ୍ୟ ଯେ, ବିବିସି ଡକ୍ୟୁମେଣ୍ଟାରୀକୁ ନେଇ କଂଗ୍ରେସ ଓ ଅନ୍ୟାନ୍ୟ ବିରୋଧୀ ଦଳ ମାନେ ମୋଦୀ ବିରୋଧୀ ମନୋଭାବ ପୋଷଣ କରିଥିବା ବେଳେ ଅନୀଲ କିନ୍ତୁ ଭିନ୍ନ ଆଭିମୁଖ୍ୟ ଆପଣାଇଥିଲେ। ବିସିବିକୁ ବିରୋଧ କରି ସେ ଏକ ଟ୍ୱିଟ୍ କରିଥିଲେ। ଯେଉଁଥିରେ ସେ ଲେଖିଥିଲେ ଯେ ଭାରତୀୟ ସଂସ୍ଥାମାନଙ୍କର ବିବିସି ରିପୋର୍ଟିଂକୁ ଏମିତି ଗୁରୁତ୍ୱ ଦେବା ବହୁତ ଭୟଙ୍କର କଥା। ଏଭଳି ଡକ୍ୟୁମେଣ୍ଟାରି ଭୟଙ୍କର ଉଦାହରଣ ସୃଷ୍ଟି କରିବ। ଯାହା ଆମ ଦେଶର ସ୍ୱାମୀତ୍ୱକୁ ହାନି ପହଞ୍ଚାଇବ। ସେ ଆହୁରି କହିଥିଲେ ଯେ ତାଙ୍କର ବିଜେପି ସହ ମତଭେଦ ଏବେ ବି ଦୃଢ଼ ରହିଛି। ହେଲେ ଏଭଳି ଘଟଣାଗୁଡ଼ିକ ଦେଖାଇବା ଭୟଙ୍କର ଉଦାହରଣ ସୃଷ୍ଟି କରିବ।
ଅନ୍ୟପଟେ ଦିଲ୍ଲୀର ଜବାହରଲାଲ ନେହରୁ ବିଶ୍ୱବିଦ୍ୟାଳୟ (ଜେଏନୟୁ)ରେ ଏହି ଡକ୍ୟୁମେଣ୍ଟାର ସ୍କ୍ରିନିଂକୁ ନେଇ ଦୁଇ ଛାତ୍ରଗୋଷ୍ଠୀ ମଧ୍ୟରେ ହଙ୍ଗାମା ଦେଖିବାକୁ ମିଳିଛି।ପ୍ରଧାନମନ୍ତ୍ରୀ ମୋଦୀଙ୍କ ଉପରେ ବିବିସି ଦ୍ୱାରା ପ୍ରସ୍ତୁତ ହୋଇଥିବା ବିବାଦୀୟ ଡକ୍ୟୁମେଣ୍ଟାରୀ ଗତକାଲି ରାତି ୯ଟାରେ ଜେଏନୟୁରେ ସ୍କ୍ରିନିଂ ହେବାର ଥିଲା।କିନ୍ତୁ ଏହାର ଅଧଘଣ୍ଟାଏ ଆଗରୁ ବିଦ୍ୟୁତ ସେବା ବନ୍ଦ ହୋଇଯାଇଥିଲା।ପାଓ୍ୱାର କଟ୍ ହେବାଯୋଗୁଁ ଜେଏନୟୁ ଛାତ୍ର ସଂଘ ଏବଂ ଏବିଭିପିଛାତ୍ରଙ୍କ ମଧ୍ୟରେ ପଥର ଫିଙ୍ଗିବା ଘଟଣା ଘଟିଛି। ବର୍ତ୍ତମାନ ବିଶ୍ଵବିଦ୍ୟାଳୟ ପରିସରରେ ଅଶନ୍ତୋଷ ଲାଗି ରହିଛି।
