କଂଗ୍ରେସରେ ମିଶିଲେ ସିପ୍ରା ମଲ୍ଲିକ; କେନ୍ଦ୍ରାପଡାରୁ ଲଢ଼ିବେ!

 

ଭୁବନେଶ୍ୱର,୧୮/୪(ସତ୍ୟପାଠ ବ୍ୟୁରୋ):  କଂଗ୍ରେସରେ ମିଶିଲେ କେନ୍ଦ୍ରାପଡାର ପୂର୍ବତନ ବିଧାୟିକା ସିପ୍ରା ମଲ୍ଲିକ । ପୂର୍ବତନ ପିସିିସି ସଭାପତି ପ୍ରସାଦ ହରିଚନ୍ଦନଙ୍କ ଉପସ୍ଥିତିରେ ସିପ୍ରା କଂଗ୍ରେସ ଦଳରେ ବିଧିବଦ୍ଧ ଭାବେ ସାମିଲ ହେଇଛନ୍ତି । ତେବେ କଂଗ୍ରେସରେ ଯୋଗ ଦେବା ପରେ ସିପ୍ରା କହିଛନ୍ତି, ଏହା ତାଙ୍କ ପାଇଁ ଏକ ବଡ ଦିନ । କଂଗ୍ରେସ ଦଳରେ ଏହା ତାଙ୍କର ନୂତନ ଆରମ୍ଭ, ଏଥିପାଇଁ ସେ ଖୁସି ଥିବା କହିଛନ୍ତି ।

ଆଜି ସକାଳେ ସେ ବିଜେଡିରୁ ଇସ୍ତଫା ଦେଇଥିଲେ ଏବଂ କଂଗ୍ରେସରେ ସାମିଲ ହୋଇଛନ୍ତି। ସିପ୍ରାଙ୍କ ବାପା କଂଗ୍ରେସ ଦଳର ସଦସ୍ୟ ଥିଲେ,ଏବେ ସେ କଂଗ୍ରେସ ଦଳକୁ ଫେରିଥିବାରୁ ଅତ୍ୟନ୍ତ ଖୁସି ବୋଲି କହିଛନ୍ତି  ସିପ୍ରା। ତେବେ କଂଗ୍ରେସରୁ ଟିକେଟ୍ ପାଇବା ନେଇ ସେ କୌଣସି ଆଲୋଚନା କରିନାହାଁନ୍ତି । କିନ୍ତୁ କେନ୍ଦ୍ରାପଡାରୁ ଲଢିବାକୁ ସେ ଆଶାବାଦୀ ଥିବା କହିଛନ୍ତି । ଯଦି ଦଳ ତାଙ୍କୁ ସେ ସୁଯୋଗ ଦିଏ, ତେବେ ସେ ନିଶ୍ଚୟ ନିର୍ବାଚନ ଲଢିବେ ନଚେତ୍ ଦଳ ଯାହା ବି ଦାୟିତ୍ୱ ଦେବ ତାକୁ ସୂଚାରୁ ରୂପେ ତୁଲାଇବି ବୋଲି କହିଛନ୍ତି ସିପ୍ରା ।

ସୂଚନାଯୋଗ୍ୟ ଯେ, ୨୦୦୯ ମସିହାରେ ସିପ୍ରା ମଲ୍ଲିକ ବିଜେଡି ଟିକେଟରୁ କେନ୍ଦ୍ରାପଡାର ବିଧାୟିକା ନିର୍ବାଚିତ ହେଇଥିଲେ । ହେଲେ ୨୦୧୪ ଆଉ ୨୦୧୯ରେ କିନ୍ତୁ ତାଙ୍କୁ ଟିକେଟ୍ ମିଳିନଥିଲା । ତେବେ ଏଥର ସେ ପୁଣିଥରେ କେନ୍ଦ୍ରାପଡାରୁ ଟିକେଟ୍ ଆଶାୟୀ ଥିଲେ, ହେଲେ ଗଣେଶ୍ୱର ବେହେରା କଂଗ୍ରେସ ଛାଡି ବିଜେଡିରେ ସାମିଲ ହେବା ପରେ, ତାଙ୍କୁ ବିଜେଡି କେନ୍ଦ୍ରାପଡାରୁ ପ୍ରାର୍ଥୀ କରିପାରେ ବୋଲି ଚର୍ଚ୍ଚା ହେଉଛି । ତେଣୁ ଏହି ସବୁ ଚର୍ଚ୍ଚା ଭିତରେ ସିପ୍ରା ମଲ୍ଲିକ ବିଜେଡି ଛାଡି କଂଗ୍ରେସରେ ସାମିଲ ହେଇଛନ୍ତି । ଆଉ ଚର୍ଚ୍ଚା ହେଉଛି କଂଗ୍ରେସ ତାଙ୍କୁ କେନ୍ଦ୍ରାପଡା ଟିକେଟ୍ ମଧ୍ୟ ଦେଇପାରେ ।

Related Posts