(ସତ୍ୟପାଠ ବ୍ୟୁରୋ) ଭୁବନେଶ୍ୱର: ଦୀର୍ଘ ଦିନ ଧରି କଂଗ୍ରେସ ପାର୍ଟିରେ ନେତୃତ୍ୱ ପରିବର୍ତ୍ତନ ନେଇ ଦାବି ଉଠି ଆସୁଛି। କିନ୍ତୁ ଦଳ ଏପର୍ଯ୍ୟନ୍ତ ସଭାପତି ନିର୍ବାଚନକୁ ସ୍ଥଗିତ ରଖିଛି। ତେବେ ୨୦୨୪ ଲୋକସଭା ନିର୍ବାଚନ ପର୍ଯ୍ୟନ୍ତ, କଂଗ୍ରେସ ସଭାପତି ପଦବୀରେ କୌଣସି ପରିବର୍ତ୍ତନ ହେବାର ଦେଖାଯାଉ ନାହିଁ। ତେବେ ଦଳରେ ଅସନ୍ତୋଷ ପ୍ରକାଶ କରୁଥିବା ନେତାମାନଙ୍କୁ ସଂଗଠନରେ ଗୁରୁତ୍ୱପୂର୍ଣ୍ଣ ଦାୟିତ୍ବ ଦିଆଯାଇପାରେ ବୋଲି ସୂଚନା ମିଳିଛି । ସୂତ୍ରରୁ ମିଳିଥିବା ସୂଚନା ମୁତାବକ , କଂଗ୍ରେସର ଅନ୍ତରୀଣ ସଭାପତି ସୋନିଆ ଗାନ୍ଧି ଆସନ୍ତା ୨୦୨୪ ନିର୍ବାଚନ ପର୍ଯ୍ୟନ୍ତ ଦଳର ଅନ୍ତରୀଣ ସଭାପତି ପଦ ବଜାୟ ରଖିବେ । ଏଥିସହ ସଂଗଠନର ପ୍ରମୁଖ ପଦବୀରେ ଯୁବ ଚେହେରାକୁ ନିଯୁକ୍ତ କରିଯିବାର ସମ୍ଭାବନା ରହିଛି।
ଟାଇମ୍ସ ନାଓ ସୂତ୍ରରୁ ପ୍ରକାଶ କରିଛି ଯେ ସୋନିଆ ଗାନ୍ଧୀ ଆସନ୍ତା ଲୋକସଭା ନିର୍ବାଚନ ପର୍ଯ୍ୟନ୍ତ କଂଗ୍ରେସ ସଭାପତି ହୋଇ ରହିବେ ଏବଂ ରାହୁଲ ଗାନ୍ଧୀ ଶୀର୍ଷ ସ୍ତରରେ ନିଷ୍ପତ୍ତି ନେବେ। ଆଗାମୀ ୨୦୨୪ ସାଧାରଣ ନିର୍ବାଚନକୁ ଧ୍ୟାନରେ ରଖି କଂଗ୍ରେସ ଦଳ ଏକ ବଡ ସାଙ୍ଗଠନିକ ପରିବର୍ତ୍ତନ କରିବାକୁ ଯୋଜନା କରୁଛି ଯେଉଁଥିରେ ଯୁବ କଂଗ୍ରେସ ନେତା ତଥା ଗାନ୍ଧି ପରିବାରର ବିଶ୍ବସ୍ତ ଲୋକମାନଙ୍କୁ ପ୍ରମୁଖ ଭୂମିକା ରହିବ ।
ସୂତ୍ରରୁ ମିଳିଥିବା ସୂଚନା ଅନୁଯାୟୀ , ଦଳ ଚାରିଜଣ ୪ ଜଣ ଓ୍ବାର୍କିଂ ପ୍ରେସିଡେଣ୍ଟ ବା କାର୍ଯ୍ୟକାରୀ ସଭାପତି ନିଯୁକ୍ତ କରିବ , ଯେଉଁମାନେ ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀଙ୍କୁ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେବାରେ ସାହାଯ୍ୟ କରିବେ। କଂଗ୍ରେସରେ କାର୍ଯ୍ଯକାରୀ ସଭାପତି ପଦ ପାଇଁ ଗୁଲାମ ନବୀ ଆଜାଦ, ସଚିନ ପାଇଲଟ,ମୁକୁଲ ଓ୍ବାସନିକ, କୁମାରୀ ଶୈଳଜା ଓ ରମେଶ ଚେନିତାଲା ପ୍ରମୁଖ ଆଗରେ ଅଛନ୍ତି । ଉଲ୍ଲେଖନୀୟ କଥା ହେଉଛି ଗୁଲାମ ନବୀ ଆଜାଦ ଜି -23 ସମୂହ ନେତା, ଯିଏକି ସୋନିଆ ଗାନ୍ଧୀଙ୍କୁ ସଂଗଠନରେ ପରିବର୍ତ୍ତନ ଆଣିବାକୁ ଚିଠି ଲେଖିଥିଲେ । ଅପରପକ୍ଷରେ ସଚିନ ପାଇଲଟ ମଧ୍ୟ ଅସନ୍ତୋଷ ଥିବା କୁହାଯାଉଛି ।
ତେବେ କଂଗ୍ରେସର ନେତୃତ୍ୱ ପରିବର୍ତ୍ତନରେ ପ୍ରିୟଙ୍କା ଗାନ୍ଧୀ କେଉଁ ଭୂମିକା ଗ୍ରହଣ କରିବେ ସେ ସମ୍ପର୍କରେ କୌଣସି ସୂଚନା ନାହିଁ। ବର୍ତ୍ତମାନ କଂଗ୍ରେସର ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଉତ୍ତରପ୍ରଦେଶରେ କଂଗ୍ରେସର ନେତୃତ୍ୱ ନେଉଛନ୍ତି ଏବଂ ଆସନ୍ତା ବର୍ଷ ହେବାକୁ ଥିବା ନିର୍ବାଚନ ପାଇଁ ସେ ପ୍ରସ୍ତୁତି ଚଳାଇଛନ୍ତି ।
ସୋନିଆ ଗାନ୍ଧୀ କଂଗ୍ରେସର ଅନ୍ତରୀଣ ସଭାପତି ଭାବରେ ଦାୟିତ୍ଵ ଗ୍ରହଣ କରିବାର ଦୁଇ ବର୍ଷରୁ ଅଧିକ ସମୟ ବିତିଗଲାଣି ଏବଂ ସେହି ଦିନଠାରୁ କଂଗ୍ରେସ ଦଳ ସଭାପତି ପଦ ପାଇଁ ନିର୍ବାଚନ ସ୍ଥଗିତ ରଖିଛି। ପୂର୍ବରୁ ଖବର ଆସିଥିଲା ଯେ ରାହୁଲ ଗାନ୍ଧୀ ଦଳର ସଭାପତି ପଦ ଗ୍ରହଣ କରିବାକୁ ରାଜି ହୋଇଛନ୍ତି। ତେବେ ମେ ୨୦୨୧ ରେ ଦେଶର କରୋନା ସ୍ଥିତିକୁ ଦୃଷ୍ଟିରେ ରଖି କଂଗ୍ରେସ ଦଳର ସଭାପତି ନିର୍ବାଚନକୁ ସ୍ଥଗିତ ରଖିଥିଲା।
ସୂତ୍ରରୁ ପ୍ରକାଶ ଯେ ରାହୁଲ ଗାନ୍ଧୀ ଦଳର ସଂଗଠନକୁ ସମ୍ପୂର୍ଣ୍ଣ ରୂପେ ବଦଳାଇବାକୁ ଚାହୁଁଛନ୍ତି। ୨୦୧୯ ଲୋକସଭା ନିର୍ବାଚନରେ ଦଳର ଖରାପ ପ୍ରଦର୍ଶନ ପରେ ରାହୁଲ ଗାନ୍ଧୀ କଂଗ୍ରେସ ସଭାପତି ପଦରୁ ଇସ୍ତଫା ଦେବା ପରଠାରୁ ପୂର୍ଣ୍ଣକାଳୀନ ସଭାପତିର ଦାବି ହୋଇ ଆସୁଛି। କେବଳ ଏତିକି ନୁହେଁ ରାଜସ୍ଥାନ, ପଞ୍ଜାବ, ଛତିଶଗଡ, କେରଳ ଏବଂ କର୍ଣ୍ଣାଟକରେ ମଧ୍ୟ ଦଳୀୟ କନ୍ଦଳ ଜାରି ରହିଛି । ପଞ୍ଜାବରେ କ୍ୟାପଟେନ ବନାମ ସିଦ୍ଧୁ ଦେଖିବାକୁ ମିଳୁଥିବାବେଳେ ରାଜସ୍ଥାନରେ ପାଇଲଟ୍ ବନାମ ଗେହେଲୋଟ୍ ଦେଖିବାକୁ ମିଳିଥିଲା।
