ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଗୁଜରାଟରେ ବର୍ତ୍ତମାନ ବିଧାନସଭା ନିର୍ବାଚନ ଯୋଗୁ ବିଭିନ୍ନ ସ୍ଥାନରେ ରୋଡ୍ ଶୋ’ ଏବଂ ଜନସଭା ହେଉଛନ୍ତି। ଏହି ପରିପ୍ରେକ୍ଷୀରେ ଆଜି ଆମ୍ ଆଦ୍ମୀ ପାର୍ଟି ପ୍ରମୁଖ ଅରବିନ୍ଦ କେଜରିଓ୍ଵାଲ ଏକ ରୋଡ୍ ଶୋ’ କରୁଥିଲେ, ଯେଉଁଠି ତାଙ୍କ ଉପରକୁ ପଥର ଫିଙ୍ଗାଯାଇଛି। କେଜରିଓ୍ଵାଲ ସୁରଟରେ ରୋଡ୍ ଶୋ’ କରୁଥିଲେ।
ସୂଚନାଯୋଗ୍ୟ ଯେ, ଏହି ରୋଡ ଶୋ’କୁ ମିଡିଆ ମଧ୍ୟ କଭର କରୁଥିଲା। ଏହାରି ଭିତରେ ଏକ ପଥର କ୍ୟାମେରା ସାମ୍ନାରେ ଆସି ମାଡ଼ ହୋଇଥିଲା। ଯେତେବେଳେ ପଥରମାଡ଼ ଆରମ୍ଭ ହୋଇଥିଲା, ସେତେବେଳେ ଅରବିନ୍ଦ କେଜରିଓ୍ଵାଲ ନିଜ ଗାଡ଼ି ଭିତରକୁ ପଶି ଯାଇଥିଲେ। ପରେ ତାଙ୍କ ସୁରକ୍ଷା ନିଶ୍ଚିତ କରାଯିବା ପରେ କେଜରିଓ୍ଵାଲ ପୁଣିଥରେ ଆସି ରୋଡ୍ ଶୋ’ କରିଥିଲେ।
ସୂଚନା ମୁତାବକ, କେଜରିଓ୍ଵାଲଙ୍କ ଶୋଭାଯାତ୍ରା ଯାଉଥିବା ବେଳେ ଏକ ଗଳିରୁ ପଥର ମାଡ଼ ହୋଇଥିଲା। ଏହି ସମୟରେ କେଜରିଓ୍ଵାଲ ନିଜ ଗାଡ଼ିରେ ଛିଡ଼ା ହୋଇ ହାତ ହଲାଉଥିଲେ। ସେତେବେଳେ ହଠାତ୍ ପଥର ମାଡ଼ ହେବାକୁ ଲାଗିଥିଲା। ଏଥି ସହିତ ଆକ୍ରମଣକାରୀ ଏବଂ ଆପ୍ ସମର୍ଥକଙ୍କ ମଧ୍ୟରେ ଏକ ପ୍ରକାର ସଂଘର୍ଷମୟ ପରିସ୍ଥିତି ସୃଷ୍ଟି ହୋଇଥିଲା।
ଏହି ରୋଡ୍ ଶୋ’ ପୂର୍ବରୁ ସୁରଟର ହୀରା ବଜାରରେ ଅରବିନ୍ଦ କେଜରିଓ୍ଵାଲ ଏକ ଜନସଭାକୁ ମଧ୍ୟ ସମ୍ବୋଧିତ କରିଥିଲେ। ସେଠାରେ କେଜରିଓ୍ଵାଲ ବ୍ୟବସାୟୀମାନଙ୍କୁ ଆଇ ଲଭ୍ ୟୁ କହି ଭାଷଣ ଆରମ୍ଭ କରିଥିଲେ। ସେ କହିଥିଲେ କି, ମୋ ନଜରରେ ଜଣେ ଜଣେ ବ୍ୟବସାୟୀ ହେଉଛନ୍ତି ହୀରା। କାହାକୁ ବି ସରକାରଙ୍କଠାରୁ ନିଜର କାମ କରାଇବାରେ କୌଣସି ସମସ୍ୟା ହେବା ଉଚିତ ନୁହେଁ।
