ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଭାଷଣ ପରେ ପଦକ୍ଷେପ ଗ୍ରହଣ କଲେ ସୁପ୍ରିମକୋର୍ଟ । ଖୁବ ଶୀଘ୍ର ଜେଲ୍ ରୁ ମୁକୁଳିବେ ସାମାନ୍ୟ ଅପରାଧ ପାଇଁ ଦଣ୍ଡ ସମୟ ସରିଯାଇଥିବା ଗରୀବ କଏଦୀ । ଜାମିନ ହେବା ପରେ ମଧ୍ୟ ଛୋଟମୋଟ କଏଦୀ ଜେଲ୍ ଜୀବନ କାଟୁଥିବା ନେଇ ଗତ ୨୬ ତାରିଖରେ ସମ୍ବିଧାନ ଦିବସ ଅବସରରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ନିଜ ଭାଷଣରେ କହିଥିଲେ । ସେହି କଏଦୀଙ୍କ ବିଷୟରେ ନିଷ୍ପତ୍ତି ନେବାକୁ ଉପସ୍ଥିତ ବିଚାରପତି ମାନଙ୍କୁ ନିବେଦନ କରିଥିଲେ ରାଷ୍ଟ୍ରପତି ।
ଏହାପରେ ସୁପ୍ରିମକୋର୍ଟ ଏପରି ଗରିବ କଏଦୀମାନଙ୍କ ରିପୋର୍ଟ ଦେବା ପାଇଁ ଦେଶ ସାରା ସମସ୍ତ ଜେଲ୍ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ଦେଶରେ ଜାତୀୟ ଆଇନ୍ ସେବା ପ୍ରାଧୀକରଣ ବା ଏନଏଏଲଏସଏ କୁ ତ୍ୱରିତ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି ।ଫଳରେ ଦଣ୍ଡ ଅବଧି ପରେ ବି ଜେଲ୍ ଜୀବନରେ ଥିବା କଏଦୀଙ୍କୁ ତୁରନ୍ତ ମୁକ୍ତ କରାଯାଇପାରିବ ।
ରାଷ୍ଟ୍ରପତି ଦ୍ରୌପଦୀ ମୁର୍ମୁ ୨୬ତାରିଖ ସମ୍ୱିଧାନ ଦିବସ ଅଭିଭାଷଣରେ ସୁପ୍ରିମକୋର୍ଟରେ ଝାଡଖଣ୍ଡ ବ୍ୟତୀତ ଓଡ଼ିଶାରେ ଗରୀବ ଆଦିବାସୀଙ୍କ ଦୁର୍ଦ୍ଦଶା ନେଇ ଚିନ୍ତାପ୍ରକଟ କରିଥିଲେ । ଗରୀବ କଏଦୀଙ୍କ ପାଖରେ ଜାମିନ୍ ରାଶି ଦେବାକୁ ଟଙ୍କା ନଥାଏ । ତେଣୁ ସେମାନେ ଛୋଟକାଟିଆ ଅଭିଯୋଗରେ ବି ଦଣ୍ଡ ସରିବା ପରେ ମଧ୍ୟ ଜେଲରେ ରହିବାକୁ ବାଧ୍ୟ ହେଉଛନ୍ତି ବୋଲି ରାଷ୍ଟ୍ରପତି କହିଥିଲେ ।
ସମ୍ୱିଧାନ ଦିବସ ପାଇଁ ରାଷ୍ଟ୍ରପତିଙ୍କୁ ଇଂରାଜୀରେ ଭାଷଣ ଲେଖି ଦିଆଯାଇଥିଲେ ସୁଦ୍ଧା ସେ ହିନ୍ଦୀରେ ଗରୀବ ଆଦିବାସୀ କଏଦୀଙ୍କ ସମସ୍ୟାକୁ ପ୍ରାଞ୍ଜଳ ଭାବେ ବଖାଣିଥଇଲେ । ସେ କହିଥିଲେ ଯେ, ଗମ୍ଭୀର ଅପରାଧ ଘଟାଇଥିବା କଏଦୀ ମୁକୁଳିଯାଉଛନ୍ତି । ହେଲେ ସାମାନ୍ୟ ଅପରାଧରେ ବି ଗରୀବ କଏଦୀ ଜେଲରୁ ମୁକୁଳିବା ପାଇଁ ବର୍ଷ ବର୍ଷ ବିତିଯାଉଛି । ରାଷ୍ଟ୍ରପତିଙ୍କ ଭାଷଣକୁ ଗୁରୁତ୍ୱ ସହିତ ନେଇ ସୁପ୍ରିମକୋର୍ଟ ଏପରି କଏଦୀଙ୍କ ରିପୋର୍ଟ ସମସ୍ତ ଜେଲରୁ ମଗାଇଛନ୍ତି ।
ସୁପ୍ରିମକୋର୍ଟ ମାଗିଥିବା ତଥ୍ୟ
- ୧୫ ଦିନ ମଧ୍ୟରେ ରିପୋର୍ଟ ଦେବେ ଜେଲ ଅଧିକାରୀ
- ଜେଲ ଅଧିକାରୀ କଏଦୀଙ୍କ ନାମ ଜଣାଇବେ
- କେଉଁ ଅପରାଧରେ ଜେଲରେ ଅଛନ୍ତିି ଜଣାଇବାକୁ ନିର୍ଦ୍ଦେଶ
- କେବେ କଏଦୀଙ୍କୁ ମିଳିଥିଲା ଜାମିନ୍ ତାରିଖ ଜଣାଇବେ
- ଜାମିନ୍ ର କେଉଁ ସର୍ତ୍ତ ପୂରଣ କରିନାହାନ୍ତି କଏଦୀ
- ଜାମିନ୍ ମିଳିବା ପରେ କେତେ ଦିନ ହେବ ଜେଲରେ ଅଛନ୍ତି
- କେତେ ଦିନ ହେବ ଜେଲରେ ରହିଛନ୍ତି କଏଦୀ ଜଣାଇବେ
