(ସତ୍ୟପାଠ ବ୍ୟୁରୋ) ଭୁବନେଶ୍ବର : ଦେଶରେ ତିନି କୃଷି ଆଇନ ବିରୋଧରେ ଚାଲିଥିବା କୃଷକ ଆନ୍ଦୋଳନକୁ ସମର୍ଥନ ଓ ନୂତନ କୃଷି ଆଇନକୁ ବିରୋଧ କରି ଦିଲ୍ଲୀ ବିଧାନସଭାରେ ପ୍ରସ୍ତାବ ପାରିତ କରାଯାଇଛି। ଏହି ପ୍ରସ୍ତାବ ପାରିତ କରି କୃଷି ଆଇନକୁ ରଦ୍ଦ କରିବାକୁ ଦାବି କରାଯାଇଛି।ଏହା ସହ କେନ୍ଦ୍ର ସରକାର ଚାଷୀଙ୍କ ସହ ଆଲୋଚନା ଆରମ୍ଭ କରିବାକୁ ପ୍ରସ୍ତାବରେ କୁହାଯାଇଛି।
ଏହି ପ୍ରସ୍ତାବ ଉପରେ ଆଲୋଚନା ସମୟରେ ଦିଲ୍ଲୀ ଗୃହମନ୍ତ୍ରୀ ତଥା ଆପ୍ ନେତା ସତ୍ୟେନ୍ଦ୍ର ଜୈନ ବିଧାନସଭାରେ କହିଛନ୍ତି ଯେ ଏହି ୩ କୃଷି ଆଇନ କୃଷକ ମାନଙ୍କର ବାସ୍ତବିକ ସମସ୍ୟାକୁ ଦୂର କରିବା ପରିବର୍ତ୍ତେ ନୂଆ ଆଇନ ମାଧ୍ୟମରେ ସେମାନଙ୍କୁ ସମସ୍ୟା ଭିତରକୁ ଠେଲି ଦେଉଛନ୍ତି । ଏହି ଆଇନ ବଳରେ କେବଳ କର୍ପୋରେଟ୍ ହାଉସ ମାନେ ଲାଭାନ୍ୱିତ ହେବେ।
ଜୈନ କହିଛନ୍ତି ଯେ , ୩ କୃଷି ଆଇନ ମଧ୍ୟରୁ ଗୋଟିଏରେ କୁହାଯାଇଛି ଯେ ସଂରକ୍ଷଣ କ୍ଷମତା ହଟାଇ ଦିଆଯାଇଛି। ପୂର୍ବରୁ ଏହି ବ୍ୟବସ୍ଥା ନଥିଲା। ଯଦି କୃଷକ କୌଣସି ଫସଲ ଉତ୍ପାଦନ କରେ, ତେବେ ସେ ଏହାକୁ ଷ୍ଟକ୍ କରି ରଖି ପାରୁ ଥିଲେ।ତେଣୁ ସେ କେନ୍ଦ୍ର ସରକାରଙ୍କୁ ପ୍ରଶ୍ନ କରିଛନ୍ତି ଯେ ଏହି ବ୍ୟବସ୍ଥା କାହା ସ୍ବାର୍ଥରେ ଉଠାଇ ଦିଆଯାଇଛି। ପଞ୍ଜାବ ଭିତରେ ଥିବା ଏକ କମ୍ପାନୀ ଆଇନ ଆସିବା ପୂର୍ବରୁ ଷ୍ଟୋରେଜ୍ କ୍ଷମତା ଆଇନ ପ୍ରସ୍ତୁତ କରିଥିଲା । କାରଣ ସେ ଜାଣିଥିଲେ ଯେ ଏପରି ନିୟମ ଆଗକୁ ଆସିବାକୁ ଯାଉଛି ।
ସେ କହିଛନ୍ତି ଯେ କେନ୍ଦ୍ର ସରକାର ଆଣିଥିବା ଏହି ୩ କୃଷି ଆଇନ କୃଷକଙ୍କ ସ୍ୱାର୍ଥରେ ନୁହେଁ ବରଂ ବ୍ୟବସାୟୀଙ୍କ ଲାଭ ଦୃଷ୍ଟିରୁ ସରକାର ଆଣିଛନ୍ତି। ଏହା କେବଳ ଚାଷୀଙ୍କୁ ନୁହେଁ, ସାଧାରଣ ଲୋକମାନଙ୍କୁ ମଧ୍ୟ କ୍ଷତି ପହଞ୍ଚାଇବ, କାରଣ ଏହା ଦ୍ବାରା ସମସ୍ତ ଶକ୍ତି ଅଳ୍ପ କିଛି ଲୋକଙ୍କ ହାତରେ ରହିବ ।
ବିଧାନସଭାରେ ବିଧାୟକ ଜର୍ଣ୍ଣେଲ ସିଂ କୃଷି ଆଇନକୁ ରଦ୍ଦ କରିବାକୁ ପ୍ରସ୍ତାବ ଦେଇଛନ୍ତି। ସେ କହିଛନ୍ତି ଯେ 8 ମାସ ଧରି କୃଷକମାନେ କୃଷି ଆଇନ ବିରୁଦ୍ଧରେ ଧାରଣାରେ ବସିଛନ୍ତି। 600 ରୁ ଅଧିକ ଚାଷୀଙ୍କ ମୃତ୍ୟୁ ଘଟିଛି କିନ୍ତୁ ପ୍ରଧାନମନ୍ତ୍ରୀ କୌଣସି ପ୍ରକାର ସମବେଦନା ଜଣାଇ ନାହାଁନ୍ତି। କେନ୍ଦ୍ର ସରକାର ଚାଷୀଙ୍କ ସହ କଥା ହେବା ପାଇଁ ଏହି ଗୃହ ସୁପାରିଶ କରିଛି।
ତେବେ ବିରୋଧୀ ଦଳର ନେତା ରାମଭୀର ସିଂ ବିଧୁରୀ କହିଛନ୍ତି ଯେ ନୂତନ କୃଷି ଆଇନ ଦ୍ୱାରା କୃଷକଙ୍କ ଆୟ ବୃଦ୍ଧି ପାଇବ। ଗତ ବର୍ଷ ନଭେମ୍ବର ଠାରୁ ପଞ୍ଜାବ, ହରିୟାଣା ଏବଂ ଉତ୍ତରପ୍ରଦେଶର ଅଧିକାଂଶ କୃଷକ ଦିଲ୍ଲୀ ସୀମାରେ ବିରୋଧ ପ୍ରଦର୍ଶନ କରୁଛନ୍ତି। ତିନି ନୂତନ କୃଷି ନିୟମ ସହିତ ମାଣ୍ଡି ଏବଂ ଏମଏସପି ବ୍ୟବସ୍ଥା ଏହି ଆଇନ ଦ୍ବାରା ଉଠିଯିବ ବୋଲି ସେମାନେ ଆଶଙ୍କା ପ୍ରକାଶ କରିଛନ୍ତି।
ସୂଚନା ଥାଉକି ଗତ ବର୍ଷ କେରଳ ଦେଶର ପ୍ରଥମ ରାଜ୍ୟ ଭାବେ କେନ୍ଦ୍ର ସରକାରଙ୍କ ତିନି କୃଷି ଆଇନ ବିରୋଧରେ ପ୍ରସ୍ତାବ ପାରିତ କରିଥିଲା।
