(ସତ୍ଯପାଠ ବ୍ୟୁରୋ) ଭୁବନେଶ୍ୱର : ନିକଟରେ ଶେଷ ହୋଇଥିବା ଉତ୍ତରପ୍ରଦେଶ ପଞ୍ଚାୟତ ନିର୍ବାଚନରେ ଏକ ହିନ୍ଦୁ ବହୁଳ ସ୍ଥାନରେ ମୁସଲମାନ ପ୍ରାର୍ଥୀ ବିଜୟୀ ହୋଇଛନ୍ତି। ଅଯୋଧ୍ୟାରେ ଏକ ହିନ୍ଦୁ ପ୍ରାଧାନ୍ୟ ଗ୍ରାମରେ ଜଣେ ମୁସଲମାନ ଗ୍ରାମପ୍ରଧାନଙ୍କୁ ସ୍ଥାନୀୟ ଲୋକେ ଚୟନ କରିଛନ୍ତି । ରୁଦାଉଲି ବିଧାନସଭା ନିର୍ବାଚନମଣ୍ଡଳୀ ଅନ୍ତର୍ଗତ ମାଭାଇ ବ୍ଲକର ରାଜନପୁର ବାସିନ୍ଦା ହାଫିଜ ଅଜିମୁଦ୍ଦିନ ଖାନଙ୍କୁ ଗ୍ରାମ ମୁଖିଆ ଭାବରେ ବିଜୟୀ କରିଛନ୍ତି। ଏହି ହିନ୍ଦୁ ବହୁଳ ଗ୍ରାମରେ ହାଫିଜ ଅଜିମଙ୍କ ପରିବାର ଏକମାତ୍ର ମୁସଲମାନ ପରିବାର। ଗ୍ରାମ ପ୍ରଧାନ ପାଇଁ ହୋଇଥିବା ଏହି ନିର୍ବାଚନରେ ମୋଟ୍ ଆଠ ଜଣ ପ୍ରାର୍ଥୀ ନିର୍ବାଚନ ଲଢୁଥିବା ବେଳେ ହାଫିଜ ସେମାନଙ୍କ ମଧ୍ୟରେ ଏକମାତ୍ର ମୁସଲମାନ ପ୍ରାର୍ଥୀ ଥିଲେ। ଏହି ନିର୍ବାଚନରେ ହିନ୍ଦୁ ପ୍ରାର୍ଥୀମାନେ ଭତ୍ତା , ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ ଘର ଏବଂ ଜମି (ପାଟା) ପ୍ରତିଶ୍ରୁତି ଦେଇ ଜିତିବାକୁ ଚେଷ୍ଟା କରିଥିଲେ। କିନ୍ତୁ ଗ୍ରାମବାସୀ ହାଫିଜ ଅଜିମୁଦ୍ଦିନଙ୍କୁ ଭୋଟ୍ ଦେଇ ବିଜୟୀ କରିଥିଲେ। ଏବଂ ଅନ୍ୟ ସମସ୍ତ ପ୍ରାର୍ଥୀଙ୍କୁ ପ୍ରତ୍ୟାଖ୍ୟାନ କରିଥିଲେ। ପଞ୍ଚାୟତ ନିର୍ବାଚନରେ ଅଜିମୁଦ୍ଦିନଙ୍କ ବିଜୟୀ ହେବା ପରେ ଏବେ ଏହା ଚର୍ଚ୍ଚାର ବିଷୟ ପାଲଟିଛି। ହିନ୍ଦୁ-ମୁସଲମାନ ଏକତାକୁ ତାଙ୍କର ବିଜୟର ଶ୍ରେୟ ଦେଇ ହାଫିଜ ଅଜିମୁଦ୍ଦିନ କହିଛନ୍ତି, ମୋର ବିଜୟ କେବଳ ରାଜନପୁର ନୁହେଁ ସମଗ୍ର ଅଯୋଧ୍ୟାରେ ହିନ୍ଦୁ-ମୁସଲମାନଙ୍କ ସମ୍ପର୍କର ଏକ ଉଦାହରଣ। ଗାଁ ପାଇଁ ତାଙ୍କର ପ୍ରାଥମିକତା ତାଲିକାର ସୂଚନା ଦେଇ ଅଜିମୁଦ୍ଦିନ କହିଛନ୍ତି ,“ଗ୍ରାମ ପ୍ରଧାନ ପାଇଁ ଆସୁଥିବା ସମସ୍ତ ପାଣ୍ଠି ଗାଁର ବିକାଶ ପାଇଁ ବ୍ୟବହୃତ ହେବ। ମୌଳିକ ସୁବିଧା ବୃଦ୍ଧି କରାଯିବ ଏବଂ MNREGA ଅଧୀନରେ ଥିବା ସମସ୍ତଙ୍କୁ କାମ ଯୋଗାଇ ଦିଆଯିବ। ” ରାଜନପୁର ଗାଁର ମୂଳ ବାସିନ୍ଦା ରାଧା ଶ୍ୟାମ ଆଜିମୁଦ୍ଦିନଙ୍କ ବିଜୟରେ ଖୁସି ହୋଇ କହିଛନ୍ତି, “ଆଜିମୁଦ୍ଦିନଙ୍କ ବିଜୟ ଏହି ଗ୍ରାମ ତଥା ଅଯୋଧ୍ୟାରେ ହିନ୍ଦୁ-ମୁସଲମାନ ଏକତାର ସଙ୍କେତ ଅଟେ। ଯେଉଁ ଦିନ ଅଜିମୁଦ୍ଦିନ ତାଙ୍କ ପ୍ରାର୍ଥୀପତ୍ର ପାଇଁ ଆବେଦନ କରିଥିଲେ, ଆମ ମାନଙ୍କ ମଧ୍ୟରୁ ଅଧିକାଂଶ ତାଙ୍କୁ ଭୋଟ୍ ଦେବାକୁ ନିଷ୍ପତ୍ତି ନେଇଥିଲୁ । ” 61 ବର୍ଷୀୟ ସମ୍ପତ୍ ଲାଲ କହିଛନ୍ତି ଯେ ଆଜିମୁଦ୍ଦିନଙ୍କ ବିଜୟ ମଧ୍ୟ ନିଶ୍ଚିତ କରିଛି ଯେ ଗାଁରେ କୌଣସି ପ୍ରକାର ଜାତି ଓ ଧର୍ମକୁ ନେଇ କୌଣସି ଶତ୍ରୁତା ନାହିଁ। ସମ୍ପତ ଲାଲ କହିଛନ୍ତି ଯେ ଯେହେତୁ ହିନ୍ଦୁ ପ୍ରାର୍ଥୀମାନେ ମଧ୍ୟ ସେମାନଙ୍କ ଜାତି ଆଧାରରେ ଭୋଟ୍ ମାଗିଥିଲେ, ଅଜିମୁଦ୍ଦିନ ବ୍ୟତୀତ ଅନ୍ୟ କୌଣସି ପ୍ରାର୍ଥୀଙ୍କ ବିଜୟ ହିନ୍ଦୁ ସମ୍ପ୍ରଦାୟର ବିଭିନ୍ନ ଜାତି ମଧ୍ୟରେ ତିକ୍ତତା ସୃଷ୍ଟି କରିପାରେ। ସୂଚନାଯୋଗ୍ୟ, କୋଭିଡ ମହାମାରୀ ହେତୁ ୟୁପି ସରକାର ଗ୍ରାମ ପ୍ରଧାନ ତଥା ଜିଲା ପଞ୍ଚାୟତ ସଦସ୍ୟଙ୍କ ଶପଥ ଗ୍ରହଣ ସମାରୋହକୁ ସ୍ଥଗିତ ରଖିଛନ୍ତି। ସରକାର ଅଧ୍ୟକ୍ଷ, ଜିଲ୍ଲା ପଞ୍ଚାୟତିରାଜ ଏବଂ ବ୍ଲକ ପ୍ରମୂଖଙ୍କ ନିର୍ବାଚନକୁ ମଧ୍ୟ ସ୍ଥଗିତ ରଖିଛନ୍ତି। ନବ ନିର୍ବାଚିତ ଜିଲ୍ଲା ପଞ୍ଚାୟତ ସଦସ୍ୟମାନେ ରାଜ୍ୟର ସମସ୍ତ 75 ଟି ଜିଲ୍ଲାରେ ଜିଲ୍ଲା ପଞ୍ଚାୟତ ସଭାପତି ଚୟନ କରିଛନ୍ତି। ବର୍ତ୍ତମାନ ଏହି ନିର୍ବାଚନ ଜୁନ୍ 15 ପରେ ହେବ ବୋଲି ଆଶା କରାଯାଉଛି।
