ଭୁବନେଶ୍ୱର(ସତ୍ୟପାଠ ବ୍ୟୁରୋ): ଅଗଷ୍ଟ ୧୦ ତାରିଖ ରେ ବର୍ତ୍ତମାନ ର ଉପରାଷ୍ଟ୍ରପତି ଏମ ଭେଙ୍କୟା ନାଇଡୁ ଙ୍କ ର କାର୍ଯ୍ୟକାଳ ଶେଷ ହେବାକୁ ଥିବାବେଳେ ନୂତନ ଉପରାଷ୍ଟ୍ରପତି ଅଗଷ୍ଟ ୧୧ ରେ ଶପଥ ନେବେ। ସେଥିପାଇଁ ମଙ୍ଗଳବାର ନିର୍ବାଚନ ଆୟୋଗ ଉପରାଷ୍ଟ୍ରପତି ନିର୍ବାଚନ ପାଇଁ ପ୍ରକ୍ରିୟା ଆରମ୍ଭ ହୋଇଥିବା କହିଛନ୍ତି । ନିର୍ବାଚନ ପାଇଁ ନାମାଙ୍କନ ପ୍ରକ୍ରିୟା ଆରମ୍ଭ ହୋଇଛି । ଜୁଲାଇ ୧୯ ନାମାଙ୍କନ ଦାଖଲ ର ଶେଷ ତାରିଖ । ଜୁଲାଇ ୨୦ ରେ ନାମାଙ୍କନ ପତ୍ର ଗୁଡ଼ିକ ର ସ୍କ୍ରୁଟିନି ହେବାକୁ ଥିବାବେଳେ ଜୁଲାଇ ୨୨ ରହିଛି ନାମାଙ୍କନ ପ୍ରତ୍ୟାହାର ର ଶେଷ ତାରିଖ। ଏହି ନିର୍ବାଚନରେ ବିଜେପି ନେତୃତ୍ୱାଧୀନ ନ୍ୟାସନାଲ ଡେମୋକ୍ରାଟିକ୍ ଆଲାଇନ୍ସ (ଏନଡିଏ) ର ଏକ ସ୍ପଷ୍ଟ ବହୁମତ ରହିଛି ଯେଉଁଥିରେ ମନୋନୀତ ବ୍ୟକ୍ତିଙ୍କ ସମେତ ଲୋକସଭା ଓ ରାଜ୍ୟସଭା ସଦସ୍ୟମାନେ ଭୋଟ୍ ଦେବାକୁ ଯୋଗ୍ୟ ଅଟନ୍ତି। କୌଣସି ରାଜନୈତିକ ଦଳ ଏପର୍ଯ୍ୟନ୍ତ ନିର୍ବାଚନ ପାଇଁ ନିଜ ପ୍ରାର୍ଥୀଙ୍କ ନାମ ରଖି ନାହାଁନ୍ତି।
ଉପ-ରାଷ୍ଟ୍ରପତି ନିର୍ବାଚନ ରେ ସାଂସଦ ର ଉଭୟ ଗୃହ ର ସଦୟ ମାନେ ଭୋଟ ଦେଇଥାନ୍ତି। ସଂସଦର ଉଭୟ ଗୃହର ମୋଟ 788 ସଦସ୍ୟ ଅଛନ୍ତି। ଯେହେତୁ ସମସ୍ତ ଚୟନକର୍ତ୍ତା ସଂସଦର ସଦସ୍ୟ ଅଟନ୍ତି, ତେଣୁ ପ୍ରତ୍ୟେକ ସାଂସଦଙ୍କ ଭୋଟର ମୂଲ୍ୟ ସମାନ ଜୁନ୍ ୨୯ ରେ ଜାରି ବିବୃତ୍ତିରେ ଇସି ଏହା କହିଛନ୍ତି।
ଏକକ ସ୍ଥାନାନ୍ତରଯୋଗ୍ୟ ଭୋଟ୍ ମାଧ୍ୟମରେ ଆନୁପାତିକ ପ୍ରତିନିଧିତ୍ଵ ପ୍ରଣାଳୀ ଅନୁଯାୟୀ ନିର୍ବାଚନ ଅନୁଷ୍ଠିତ ହୁଏ ଏବଂ ଗୁପ୍ତ ବାଲଟ ଦ୍ୱାରା ଭୋଟ୍ ଦିଆଯାଏ |
ଏହି ନିର୍ବାଚନ ରେ ଜଣେ ପ୍ରାର୍ଥୀ ସର୍ବାଧିକ ଚାରୋଟି ନାମାଙ୍କନପତ୍ର ଦାଖଲ କରିପାରିବେ | ନିର୍ବାଚନ ପାଇଁ ସୁରକ୍ଷା ଜମା ହେଉଛି ୧୫୦୦୦ ଟଙ୍କା। ରାଷ୍ଟ୍ରପତିଙ୍କ ନିର୍ବାଚନ ରେ ରାଜ୍ୟ ର ବିଧାୟକ ମାନେ ଇଲେକ୍ଟରାଲ କଲେଜ ରେ ଅନ୍ତର୍ଭୁକ୍ତ ଥିବାରୁ ସବୁ ରାଜ୍ୟ ମାନଙ୍କ ରେ ଭୋଟ ଗ୍ରହଣ ହୋଇଥାଏ ମାତ୍ର ଉପରାଷ୍ଟ୍ରପତି ନିର୍ବାଚନ ରେ କେବଳ ସାଂସଦ ମାନେ ଭୋଟ ଦେବାକୁ ଥିବାରୁ କେବଳ ସଂସଦ ଭବନ ରେ ହିଁ ଭୋଟ ଗ୍ରହଣ ହେବ ।
