ଭୁବନେଶ୍ୱର(ସତ୍ୟପାଠ ବ୍ୟୁରୋ): କୋଟିପତି ଯୋଗାଣ ବିଭାଗ ଅଧିକାରୀଙ୍କୁ ଭିଜିଲାନ୍ସ ଗିରଫ କରିଛି । ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ବୁଧବାର ରତ୍ନାକରଙ୍କ ଘରେ ଚଢ଼ାଉ କରିଥିଲା ଭିଜିଲାନ୍ସ। ତାଙ୍କର ମୋଟ ୬ କୋଟି ୭୩ ଲକ୍ଷ ଟଙ୍କାର ସମ୍ପତ୍ତି ଠାବ ହୋଇଛି। ତା’ ମଧ୍ୟରେ ରହିଛି ଏକାଧିକ ଘର। ସେପଟେ କଟକର ସ୍ବତନ୍ତ୍ର ଭିଜିଲାନ୍ସ କୋର୍ଟଙ୍କ ନିର୍ଦେଶକ୍ରମେ ବୁଧବାର ଦିନ ଶ୍ରୀ ସେଠୀଙ୍କ କଟକ ଓ ନୂଆପଡ଼ା ବାସଭବନ ସମେତ ୬ଟି ସ୍ଥାନରେ ଏକକାଳୀନ ଚଢ଼ଉ ହୋଇଥିଲା। ଟକ ମଧୁପାଟଣା ବାଲିସାହିରେ ତାଙ୍କର ଏକ ଦୁଇ ମହଲା କୋଠା ଓ ଏକ ତିନି ମହଲା ବିଶିଷ୍ଟ କଲ୍ୟାଣ ମଣ୍ଡପ ରହିଛି।
ଏହା ସହିତ କଟକ ଚାଉଳିଆଗଞ୍ଜରେ ତାଙ୍କର ୪ ମହଲା ବିଶିଷ୍ଟ ଏକ ଘର ରହିଛି। ଚୌଦ୍ୱାର ଓରଣ୍ଡାରେ ତାଙ୍କର ୩ ଏକରର ଜମି ମଧ୍ୟ ଥିବା ଚଢ଼ାଉ ବେଳେ ସାମ୍ନାକୁ ଆସିଛି। ସେହିପରି ରତ୍ନାକରଙ୍କ ଠାରୁ ୧ କୋଟି ୧୭ ଲକ୍ଷ ଟଙ୍କାର ବୀମା, ପ୍ରାୟ ୯୦ ଲକ୍ଷ ଟଙ୍କାର ବ୍ୟାଙ୍କ ଡିପୋଜିଟ୍, ଅଧ କିଲୋଗ୍ରାମ ସୁନା ଅଳଙ୍କାର ଓ ଅଢ଼େଇ କିଲୋଗ୍ରାମ ରୁପା ଅଳଙ୍କାର ଜବତ କରିଛି ଭିଜିଲାନ୍ସ। ଏହି ଚଢ଼ଉରେ ୬ ଜଣ ଭିଜିଲାନ୍ସ ଡିଏସ୍ପି ଓ ୧୨ ଜଣ ଇନ୍ସପେକ୍ଟରଙ୍କ ସହିତ ଅନ୍ୟ କର୍ମଚାରୀ ସାମିଲ ହୋଇଥିଲେ। ଚଢ଼ାଉ ପରେ ଶ୍ରୀ ସେଠୀଙ୍କୁ ନୂଆପଡ଼ା ଭିଜିଲାନ୍ସ ଅଫିସକୁ ନେଇ ସେଠାରେ ଜେରା କରାଯାଇଥିଲା। ଏହାପରେ ଭବାନୀପାଟଣା ଭିଜିଲାନ୍ସ କୋର୍ଟରେ ହାଜର କରାଯାଇଥିଲା। ଏହାପରେ ତାଙ୍କୁ ଭବାନୀପାଟଣାଠାରେ ଅଟକ ରଖାଯାଇଥିବା ଜଣାପଡ଼ିଛି।
