ନୂଆଦିଲ୍ଲୀ,୧୩।୬: ଲେଫ୍ଟନାଣ୍ଟ ଜେନେରାଲ ଧୀରଜ୍ ସେଠଙ୍କୁ ପରବର୍ତ୍ତୀ ସେନା ମୁଖ୍ୟ ଦାୟିତ୍ବ ମିଳିଛି। ପ୍ରତିରକ୍ଷା ମନ୍ତ୍ରଣାଳୟ ଦେଶର ନୂତନ ସ୍ଥଳ ସେନାଧ୍ୟକ୍ଷ ଅର୍ଥାତ ଚିଫ୍ ଅଫ୍ ଆର୍ମି ଷ୍ଟାଫ୍ ନିଯୁକ୍ତି ନେଇ ନିର୍ଦ୍ଦେଶ ଜାରି କରିଛି। ମନ୍ତ୍ରଣାଳୟ ପକ୍ଷରୁ ଜାରି ନିର୍ଦ୍ଦେଶରେ କୁହାଯାଇଛି ଯେ, ରାଷ୍ଟ୍ରପତି ଲେଫ୍ଟନାଣ୍ଟ ଜେନେରାଲ ଧୀରଜ ସେଠ୍‌ଙ୍କୁ ଆଗାମୀ ସେନା ମୁଖ୍ୟ ନିଯୁକ୍ତି କରିବାର ମଞ୍ଜୁରୀ ଦେଇଛନ୍ତି। ଧୀରଜ୍ ସେଠ୍ ଆସନ୍ତା ୩୦ ଜୁନ୍, ୨୦୨୬ରେ କାର୍ଯ୍ୟଭାର ଗ୍ରହଣ କରିବେ। ସେ ବର୍ତ୍ତମାନ ସେନା ମୁଖ୍ୟ ଜେନେରାଲ ଉପେନ୍ଦ୍ର ଦ୍ବିବେଦୀଙ୍କ ସ୍ଥାନ ନେବେ। ସ୍ଥଳ ସେନାଧ୍ୟକ୍ଷ ଭାବରେ ତାଙ୍କର କାର୍ଯ୍ୟକାଳ ୩୧ ଅଗଷ୍ଟ ୨୦୨୮ ପର୍ଯ୍ୟନ୍ତ ରହିବ। ଲେଫ୍ଟନାଣ୍ଟ ଜେନେରାଲ ଶ୍ରୀ ସେଠ୍ ବହୁ ଗୁରୁତ୍ବପୂର୍ଣ୍ଣ ଓ ରଣନୈତିକ ପଦବୀରେ କାମ କରିସାରିଛନ୍ତି। ସେ ମହାରାଷ୍ଟ୍ରର ପୁନେ ସ୍ଥିତ ଖଡକୱାସଲା ଜାତୀୟ ପ୍ରତିରକ୍ଷା ଏକାଡେମୀ(ଏନଡିଏ)ରେ ପଢ଼ିଛନ୍ତି। ୧୯୮୬ ରେ ସଶସ୍ତ୍ର ବାହିନୀରେ କମିଶନ୍ ମିଳିଥିଲା। ସେନାରେ ୪ ଦଶକ ଧରି ତାଙ୍କର ବିଶେଷ ଅନୁଭବ ରହିଛି। ନିଜ କାର୍ଯ୍ୟକାଳରେ ସେ ବିଭିନ୍ନ ଭୂ-ଭାଗ ଓ ସଂଘର୍ଷପୂର୍ଣ୍ଣ ସ୍ଥିତିରେ କାମ କରିଛନ୍ତି। ଏଥିରେ ଆତଙ୍କବାଦୀ ବିରୋଧି ଅଭିଯାନ ମଧ୍ୟ ରହିଛି। ଏହା ସହ ଲେଫ୍ଟନାଣ୍ଟ ମରୁଭୂମି ଅଞ୍ଚଳରେ ଏକ ସଶସ୍ତ୍ର ରେଜିମେଣ୍ଟ, ବିକଶିତ ଅଞ୍ଚଳରେ ଏକ ସଶସ୍ତ୍ର ବ୍ରିଗେଡ୍ ଏବଂ ଜମ୍ମୁ ଏବଂ କାଶ୍ମୀରରେ ଆତଙ୍କବାଦ ବିରୋଧୀ ବାହିନୀର ନେତୃତ୍ୱ ନେଇଛନ୍ତି। ଲେଫ୍ଟନାଣ୍ଟ ହେବା ପରେ, ସେ ‘ସୁଦର୍ଶନ ଚକ୍ର କର୍ପସ’ର ନେତୃତ୍ୱ ନେଇଥିଲେ ଏବଂ ପରେ ଦିଲ୍ଲୀରେ ଜେନେରାଲ ଅଫିସର କମାଣ୍ଡିଂ ଭାବରେ କାର୍ଯ୍ୟ କରିଥିଲେ, ଯେଉଁଠାରେ ସେ ପ୍ରମୁଖ ଜାତୀୟ ଏବଂ ଅନ୍ତର୍ଜାତୀୟ ଅପରେସନଗୁଡ଼ିକର ନେତୃତ୍ୱ ନେଇଥିଲେ। ଲେଫ୍ଟନାଣ୍ଟ ଜେନେରାଲ ଧୀରଜ ସେଠ ଷ୍ଟ୍ରାଇକ୍ କର୍ପସର କମାଣ୍ଡର ଭାବରେ କାର୍ଯ୍ୟ କରିଛନ୍ତି, ଯାହାକି ଶତ୍ରୁ ସୀମାରେ ପଶି ଆକ୍ରମଣ କରିଥାଏ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଯେ, ପ୍ରାୟ ତିନି ଦଶନ୍ଧି ପରେ, ସରକାର ସେନାର କମାଣ୍ଡର ଭାବରେ ଜଣେ ଆର୍ମଡ କର୍ପସ (ଟ୍ୟାଙ୍କ) ଅଧିକାରୀଙ୍କୁ ନିଯୁକ୍ତ କରିଛନ୍ତି। ଶେଷ ଥର ୧୯୯୭ ରେ ଜେନେରାଲ ଶଙ୍କର ରୟ ଚୌଧୁରୀ ଏହି କର୍ପସର ଅଧିକାରୀ ଥିଲେ, ଯିଏକି ସେନାର ଦାୟିତ୍ବ ଗ୍ରହଣ କରିଥିଲେ। ଲେଫ୍ଟନାଣ୍ଟ ଜେନେରାଲ ସେଠ୍ ଆମେରିକାର କାର୍ଲିଫର୍ଣ୍ଣିଆର ମୋଣ୍ଟରୀ ସ୍ଥିତ ନାଭାଲ ପୋଷ୍ଟଗ୍ରାଜୁଏସନ୍ ସ୍କୁଲରେ ଇଣ୍ଟରନ୍ୟାସନାଲ ଡିଫେନ୍ସ ଆକ୍ୟୁସେସନ୍ ମ୍ୟାନେଜମେଣ୍ଟ କୋର୍ସ, ପ୍ୟାରିସର ମିଲିଟାରୀ କଲେଜରୁ ଡିଫେନ୍ସ ସର୍ଭିସେଜ୍ କମାଣ୍ଡ ଆଣ୍ଡ ଜେନେରାଲ ଷ୍ଟାଫ୍ କୋର୍ସ ଏବଂ ଦିଲ୍ଲୀରେ ନ୍ୟାସନାଲ ଡିଫେନ୍ସ କଲେଜରୁ ଟ୍ରେନିଂ ନେଇଛନ୍ତି। ସେ ସବୁବେଳେ ଜଣେ କୁଶଳୀ ସେନା ଅଧିକାରୀ ଭାବରେ ଭଲ ପ୍ରଦର୍ଶନ କରିଛନ୍ତି।