ତେହେରାନ(ସତ୍ୟପାଠ ବ୍ୟୁରୋ): ନିଜ ନିଷ୍ପତ୍ତି ବଦଳାଇଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଇରାନ ବିରୋଧରେ ବିଶାଳ ସାମରିକ ଆକ୍ରମଣର ଚେତାବନୀ ଦେଇଥିବା ଡୋନାଲ୍ଡ ଟ୍ରମ୍ପ ହଠାତ୍ ନିଜ ନିଷ୍ପତ୍ତି ବଦଳାଇ ଦେଇଛନ୍ତି। ବଡ଼ ଆକ୍ରମଣର ସଙ୍କେତ ଦେଇଥିବା ଟ୍ରମ୍ପ, ନିଜ ଶବ୍ଦ ପରିବର୍ତ୍ତନ କରି ଇରାନ ଉପରେ ଏବେ ଆଉ କୌଣସି ନୂଆ ଆକ୍ରମଣ ନ କରିବାକୁ ନିର୍ଦ୍ଦେଶ ଦେଇଛନ୍ତି। ଏହାକୁ ନେଇ ଏବେ ବିଶ୍ୱ ରାଜନୀତିରେ ଜୋରଦାର ଚର୍ଚ୍ଚା ଚାଲିଛି। ସୂଚନା ଅନୁସାରେ, ଆମେରିକାର ସେଣ୍ଟ୍ରାଲ କମାଣ୍ଡ ମୁଖ୍ୟ ଆଡମିରାଲ ବ୍ରାଡ୍ କୁପର ରାଷ୍ଟ୍ରପତି ଟ୍ରମ୍ପଙ୍କୁ ସ୍ପଷ୍ଟ କରି କହିଥିଲେ ଯେ, ଗତ ଦୁଇ ସପ୍ତାହ ଧରି ଚାଲିଥିବା ଆକ୍ରମଣରେ ଇରାନର ଅଧିକାଂଶ ସାମରିକ ଟାର୍ଗେଟ୍ ଧ୍ୱଂସ ହୋଇସାରିଛି। ଏବେ ଆଉ ଆକ୍ରମଣ କଲେ ସାମରିକ ଦୃଷ୍ଟିରୁ ବିଶେଷ ଲାଭ ମିଳିବ ନାହିଁ । ଅବଶିଷ୍ଟ କିଛି ଟାର୍ଗେଟ୍ ଉପରେ ଆକ୍ରମଣ କରିବାକୁ ହେଲେ ପୁଣିଥରେ ବ୍ୟାପକ ଯୁଦ୍ଧ ଆରମ୍ଭ କରିବାକୁ ପଡ଼ିବ, ଯାହାର ପରିଣାମ ଆହୁରି ଭୟଙ୍କର ହୋଇପାରେ। କେବଳ ସେତିକି ନୁହେଁ, ଆମେରିକାର ଜଏଣ୍ଟ ଚିଫ୍ସ ଅଫ୍ ଷ୍ଟାଫ୍ ମଧ୍ୟ ହ୍ୱାଇଟ୍ ହାଉସକୁ ସତର୍କ କରିଥିଲେ ଯେ, ବାୟୁ ପ୍ରତିରକ୍ଷା ପାଇଁ ବ୍ୟବହୃତ ଇଣ୍ଟରସେପ୍ଟର ମିସାଇଲର ଭଣ୍ଡାର ଦ୍ରୁତ ଗତିରେ କମି ଆସୁଛି। ଏଭଳି ସ୍ଥିତିରେ ଦୀର୍ଘ ସମୟ ଧରି ସଂଘର୍ଷ ଜାରି ରହିଲେ ଆମେରିକୀୟ ସେନା ଓ ମିତ୍ର ଦେଶମାନଙ୍କ ସୁରକ୍ଷା ପ୍ରଭାବିତ ହୋଇପାରେ। ଅନ୍ୟପଟେ, ହର୍ମୁଜ୍ ଜଳପଥରେ ପୁଣି ଥରେ ଜାହାଜ ଚଳାଚଳ ସ୍ୱାଭାବିକ କରିବା ପାଇଁ ଇରାନ ଓ ଓମାନ ମଧ୍ୟରେ କୂଟନୀତିକ ଆଲୋଚନା ଚାଲିଛି। ଆମେରିକା ମଧ୍ୟ ଏହି ଆଲୋଚନାକୁ ସୁଯୋଗ ଦେବାକୁ ଚାହୁଁଛି। ଟ୍ରମ୍ପ ପ୍ରଶାସନ ସ୍ପଷ୍ଟ କରିଛି ଯେ, ସବୁ ବିକଳ୍ପ ଏବେ ବି ଖୋଲା ରହିଛି, କିନ୍ତୁ ବର୍ତ୍ତମାନ ପାଇଁ କୂଟନୀତିକ ପ୍ରୟାସକୁ ପ୍ରାଥମିକତା ଦିଆଯାଉଛି। ତେଣୁ ମଧ୍ୟପ୍ରାଚ୍ୟର ବଦଳୁଥିବା ପରିସ୍ଥିତି ଉପରେ ଏବେ ସାରା ବିଶ୍ୱର ନଜର ରହିଛି।
