ନୂଆଦିଲ୍ଲୀ(ସତ୍ୟପାଠ ବ୍ୟୁରୋ): ରୁଷ ଓ ୟୁକ୍ରେନ ମଧ୍ୟରେ ଯୁଦ୍ଧ ଆଜି ଅଷ୍ଟମ ଦିନରେ ପହଞ୍ଚିଛି । ଉଭୟଙ୍କ ଯୁଦ୍ଧ ଫଳରେ ସାରା ବିଶ୍ୱ ଏହାର ପରିଣାମ ଭୋଗୁଛି । ଅର୍ଥାତ ଉଭୟଙ୍କ ପାଇଁ ବିଶ୍ୱ ଅର୍ଥନୀତିରେ ବେଶ ପ୍ରଭାବ ପଡ଼ିଛି । ଏହାର ପ୍ରଭାବରେ ଜିନିଷ ଗୁଡ଼ିକର ଦର ହୁ ହୁ ହୋଇ ବଢ଼ିବାରେ ଲାଗିଛି । ଏହା ମଧ୍ୟରେ ୟୁକ୍ରେନରେ ଫସି ରହିଥିବା ଛାତ୍ରମାନଙ୍କ ମାମଲା ସୁପ୍ରିମକୋର୍ଟରେ ପହଞ୍ଚିଛି । ତେବେ ଏନେଇ ସିଜେଆଇ ରମନା କହିଛନ୍ତି ଯେ ୟୁକ୍ରେନରେ ଆମ ଛାତ୍ରମାନଙ୍କ ଅବସ୍ଥା ଦେଖି ଅତ୍ୟନ୍ତ ଦୁଃଖିତ । କିନ୍ତୁ ଆମେ କ’ଣ କରିପାରିବା? ଆମେ ରୁଷର ରାଷ୍ଟ୍ରପତି ପୁଟିନଙ୍କୁ ଯୁଦ୍ଧ ବନ୍ଦ କରିବାକୁ କହିପାରିବା କି? ସେପଟେ କାଶ୍ମୀରର ଜଣେ ବରିଷ୍ଠ ଓକିଲ ସିଜେଆଇର ବେଞ୍ଚ ଆଗରେ ଏହି ଆବେଦନ ଉପରେ ଶୀଘ୍ର ଶୁଣାଣି କରିବାକୁ ଦାବି କରିଥିଲେ। ସେ କହିଛନ୍ତି ଯେ ୟୁକ୍ରେନ-ରୋମାନିଆ ସୀମାରେ ୨୧୩ ଜଣ ଛାତ୍ର ଅଟକି ରହିଛନ୍ତି। ଏମାନଙ୍କ ମଧ୍ୟରୁ ଅଧିକାଂଶ ଛାତ୍ରୀ ଅଟନ୍ତି । ସେମାନଙ୍କର ଟଙ୍କା ମଧ୍ୟ ସରିଯାଇଛି । ଏଭଳି ପରିସ୍ଥିତିରେ ସେମାନଙ୍କୁ ସାହାଯ୍ୟ କରିବା ଏବଂ ଫେରାଇ ଆଣିବା ପାଇଁ କେନ୍ଦ୍ରକୁ କୁହାଯିବା ଉଚିତ୍ ବୋଲି କହିଛନ୍ତି ।
ସେପଟେ ଏହାର ଜବାବରେ ସିଜେଆଇ କହିଛନ୍ତି ଯେ ଏକ ସୋସିଆଲ ମିଡିଆ ପୋଷ୍ଟରେ କୁହାଯାଇଛି ଯେ ଭାରତର ପ୍ରଧାନ ବିଚାରପତି କିଛି କରୁନାହାଁନ୍ତି। ଆମେ ମଧ୍ୟ ଛାତ୍ରମାନଙ୍କ ଅବସ୍ଥା ଦେଖି ଅତ୍ୟନ୍ତ ଦୁଃଖିତ । କିନ୍ତୁ ଆମେ କ’ଣ କରିପାରିବା? ଆମେ ରୁଷର ରାଷ୍ଟ୍ରପତି ପୁଟିନଙ୍କୁ ଯୁଦ୍ଧ ବନ୍ଦ କରିବାକୁ କହିପାରିବା କି? ଆଟର୍ଣ୍ଣି ଜେନେରାଲଙ୍କ ସହ ଅଟକି ରହିଥିବା ଛାତ୍ରଛାତ୍ରୀଙ୍କ ପ୍ରସଙ୍ଗ ଉପରେ ସୁପ୍ରିମକୋର୍ଟ ବିଚାର କରିବେ। ଏଥିସହିତ ଆଟର୍ଣ୍ଣି ଜେନେରାଲ କେ.କେ ଭେନୁଗୋପାଲ ଏହି ପ୍ରସଙ୍ଗରେ ସୁପ୍ରିମକୋର୍ଟରେ ହାଜର ହୋଇଥିଲେ। ସିଜେଆଇ ଆବେଦନକାରୀ ଛାତ୍ରଙ୍କ ବିବରଣୀ ଖୋଜିଥିଲେ । ଏହାର ସବିଶେଷ ବିବରଣୀ ଲେଖିବାକୁ ଏଜିକୁ କୁହାଯାଇଥିଲା । ସେମାନଙ୍କୁ ରୋମାନିଆ ସୀମାରୁ ସ୍ଥାନାନ୍ତର କରାଯାଉ ନାହିଁ। ସେମାନେ ୟୁକ୍ରେନ ସୀମାରେ ଅଛନ୍ତି, ସେମାନଙ୍କୁ ରୋମାନୀୟମାନଙ୍କ ନିକଟକୁ ଯିବାକୁ ଅନୁମତି ନାହିଁ । ଏଜି କହିଛନ୍ତି ଯେ ପୁଟିନଙ୍କ ସହ ପ୍ରଧାନମନ୍ତ୍ରୀ କଥା ହୋଇଛନ୍ତି। ରୋମାନିଆକୁ ଜଣେ ମନ୍ତ୍ରୀଙ୍କୁ ପଠାଯାଇଛି। ସରକାର ସବୁକିଛି କରୁଛନ୍ତି। ସେପଟେ ରୋମାନିଆରୁ ଛାତ୍ରମାନଙ୍କୁ ଉଦ୍ଧାର କରିବାକୁ କେନ୍ଦ୍ର ସରକାରଙ୍କୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି ।
