ସାମ୍ନାରେ ସିଦ୍ଧାର୍ଥ, ବିଜେଡି ନେତାଙ୍କ ହାତରେ ରିମୋର୍ଟ !

0 4,531

ସତ୍ୟପାଠ ବ୍ୟୁରୋ : ଆତ୍ମହତ୍ୟା କରିଥିବା କାଫେ କଫି ଡେର ପୂର୍ବତନ ମାଲିକ ଭିଜି ସିଦ୍ଧାର୍ଥଙ୍କ କମ୍ପାନୀ ସିକଲ ଲଜିଷ୍ଟିକ୍ ଲିମିଟେଡ୍ ର ଭରତପୁର କୋଇଲାଖଣିରେ ବ୍ୟବସାୟର ଚେର ବାହାରିବା ପରେ ଏବେ ଅନେକ କଥା ସନ୍ଦେହ ଘେରରେ । ଭଲ ସ୍ଥିତିରେ ନଥିବା ଏବଂ କମ୍ପାନୀର ପରିଚାଳନା ଓ ଆର୍ଥିକ ସ୍ଥିତି ଏତେ ଠିକ୍ ନଥିବା ସତ୍ୱେ ଓଡିଶାରେ କମ୍ପାନୀର ବ୍ୟବସାୟ କିଏ ବୁଝୁଥିଲେ ତାକୁ ନେଇ ଉଠିଛି ପ୍ରଶ୍ନ ? ଶାସକ ବିଜୁ ଜନତା ଦଳର କେଉଁ ନେତା ବା ବିଧାୟକ ଏହି ବ୍ୟବସାୟର ମାମଲତକାର ଥିଲେ ତାକୁ ନେଇ ଚର୍ଚ୍ଚା ଆରମ୍ଭ ହୋଇଛି । କେବଳ ସେତିକି ନୁହେଁ ଅନୁଗୁଳ ଓ ଝାରସୁଗୁଡା କୋଇଲା ଖଣିରେ କେଉଁ ବ୍ୟୁରୋକ୍ରାଟ ଓ ବିଜେଡିର ନେତା-ମନ୍ତ୍ରୀଙ୍କ ସମ୍ପର୍କୀୟଙ୍କର ଗାଡି ଲାଗିଛି ତାହା ବି ଏବେ ପ୍ରଶ୍ନଘେରରେ । ଯେହେତୁ ସିକଲ ଲଜିଷ୍ଟିକ ମାର୍ଫତରେ ଭରତପୁର ଖଣିରେ କାମ ହେଉଥିଲା, ତେଣୁ ଭରତପୁର ଘଟଣାରେ ମାମଲା ଆଗକୁ କିଛି ନଯାଉ, ସେଦିଗରେ ସ୍ଥାନୀୟ ନେତା, ଜିଲ୍ଲା ପ୍ରଶାସନ ଓ ରାଜ୍ୟ ପ୍ରଶାସନ ସମସ୍ତେ ଅତି ସତର୍କତାର ସହ ରଫାଦଫା କରିବାକୁ ଉଦ୍ୟମ କରୁଥିବା ଆଲୋଚନା ହେଉଛି ।

ଓଡିଶାରେ ତିନିଟି କୋଇଲା ଖଣିରେ ୧୦୩୬ କୋଟି ଟଙ୍କାର କାରବାର ପାଇଁ ଚୁକ୍ତି କରିଥିଲା ସିଦ୍ଧାର୍ଥଙ୍କ ମାଲିକାନାରେ ଥିବା କମ୍ପାନୀ ସିକାଲ ଲଜିଷ୍ଟିକ୍ ଲିମିଟେଡ୍ । ଯେଉଁଥିରେ ଥିଲା ଭରତପୁର କୋଇଲା ଖଣି । ଯେଉଁ ଖଣିରେ ଅତଡା ଖସି ୧୦ରୁ ଉଦ୍ଧ୍ୱର୍ ଆହତ ହୋଇଥିବା ବେଳେ ୪ଜଣଙ୍କ ମୃତ୍ୟୁ ହୋଇଥିବା ଖବର ବାବଦରେ ସମସ୍ତେ ଅବଗତ । କମ୍ପାନୀ ୱେବସାଇଟରେ ଥିବା ସୂଚନା ଅନୁସାରେ, ଓଡିଶାର ଝାରସୁଗୁଡାରେ ଲାଜକୁରା କୋଇଲା ଖଣି ଏବଂ ଅନୁଗୁଳର ହିଙ୍ଗୁଳା ଓ ଭରତପୁର କୋଇଲା ଖଣିରେ ଟ୍ରାନ୍ସପୋର୍ଟ ବ୍ୟବସାୟ କରୁଥିଲା ସିଦ୍ଧାର୍ଥଙ୍କ କମ୍ପାନୀ ସିକାଲ ଲଜିଷ୍ଟିକ୍ ଲିମିଟେଡ୍ । ଲାଜକୁରାରେ ୩୮୫କୋଟି, ହିଙ୍ଗୁଳାରେ ୩୬୩କୋଟି ଓ ଭରତପୁରରେ ୨୮୮ କୋଟି ଟଙ୍କାର କଣ୍ଟ୍ରାକ୍ଟ ପାଇଥିଲା କମ୍ପାନୀ ।

କୁହାଯାଉଛି, ଭଲ ସ୍ଥିତିରେ ନଥିବା ଏହି କମ୍ପାନୀ ପାଇଁ ଅନୁଗୁଳ ଖଣିରେ ମାମଲତକାର ସାଜିଥିଲେ ଜଣେ ବିଜେଡି ବିଧାୟକ । ତାଙ୍କରି ମାର୍ଫତରେ ହିଁ ସିଦ୍ଧାର୍ଥଙ୍କ ସିକାଲ ଲଜିଷ୍ଟିକ୍ ର ଚେର ପୋତାଯାଇଥିଲା କୋଇଲା ଖଣିରେ । ସେହି ବାହୁ ବଳୀ ବିଧାୟକଙ୍କ ଛତ୍ରଛାୟା ତଳେ ଚାଲିଥିଲା ବ୍ୟବସାୟ । ସିଦ୍ଧାର୍ଥ ନିଜେ କିଛି ବୁଝୁ ନଥିବା ବେଳେ ସନ୍ଦେହରେ ଥିବା ବିଧାୟକ ହିଁ କୋଇଲା ଖଣିର ଲାଭକ୍ଷତି ସବୁ ବୁଝୁଥିଲେ । କାହା କାହା ଗାଡି ଟ୍ରାନ୍ସପୋର୍ଟରେ ଲାଗିବ ତାହା ବି ସେ ହିଁ ବୁଝୁଥିଲେ । ଏପରିକି ଓଡିଶାର କିଛି ପ୍ରଶାସକ ଓ ନେତା-ମନ୍ତ୍ରୀଙ୍କ ଖାସ୍ ସମ୍ପର୍କୀୟଙ୍କ ଗାଡି ବି ଲାଗିଛି ଏହି ସିକାଲ ଲଜିଷ୍ଟିକ ଟ୍ରାନ୍ସପୋର୍ଟରେ । ତେବେ ସିଦ୍ଧାର୍ଥ ରହସ୍ୟଜନକ ଭାବେ ନିଖୋଜ ହେବା ଓ ନଦୀ କୂଳରୁ ତାଙ୍କ ମୃତଦେହ ମିଳିବା ପରେ ଅନେକ ଦିଗକୁ ନେଇ ତଦନ୍ତ କରୁଥିବା ପୁଲିସ ବି ଏହି ସୁରାକ ପାଇଥିବା ଚର୍ଚ୍ଚା ହେଉଛି ।

୨୦୧୭ରେ ଭରତପୁର ଖଣି ପାଇଁ ଏମସିଏଲ କଣ୍ଟ୍ରାକ୍ଟ ଦେଇଥିଲା ସିକଲ ଲିଜିଷ୍ଟିକକୁ । ଜୁଲାଇ ୨୩ ତାରିଖ ରାତି ୧୧ଟା ବେଳେ ଭରତପୁର ପୋଖରିଆ କୋଇଲା ଖାଦାନର କୃତ୍ରିମ ପାହାଡ ତଥା ଓବିଡମ୍ପ ଧସିପଡିଥିଲା । ଏହି କୋଇଲା ମିଶ୍ରିତ ମାଟିତଳେ ୪ଜଣ ଠିକା ଶ୍ରମିକ ପୋତି ହୋଇଯାଇଥିବା ଜଣାପଡିଥିଲା । ତେବେ ପ୍ରଥମେ ତିନିଜଣଙ୍କ ଶବ ମିଳିଥିବା ବେଳେ ପରେ ଜଣଙ୍କର କଟାହାତ ଓ ଖଣ୍ଡବିଖଣ୍ଡିତ ଶରୀର କିଛି ଅଂଶ ମିଳିଥିଲା । କିନ୍ତୁ ତାହା କାହାର ଜଣାପଡିଲା ନାହିଁ । ଏପରିକି ଖଣିରେ ନିୟୋଜିତ ସିକ୍ୟୁରିଟି ଗାର୍ଡ ରମେଶ ଦାସଙ୍କର କୌଣସି ଖୋଜ ଖବର ମିଳିନାହିଁ ।

ସନ୍ଦେହ ଘନୀଭୁତ ହେବାର କାରଣ :

ପ୍ରଥମତଃ ସେ ଅଂଚଳର ଲୋକେ ଜାଣିଛନ୍ତି କେଉଁ ନେତା ଓ କାହାର ଲୋକ ଏହାକୁ ଚଲାଉଥିଲେ । ଅନେକ ସ୍ଥାନୀୟ ଲୋକଙ୍କ କହିବା କଥା ଖଣିରେ ୪ଜଣ ନୁହଁନ୍ତି ବରଂ ଅଧିକ ଶ୍ରମି ମାଟିତଳେ ଫସି ରହିଛନ୍ତି । ବାହାର ରାଜ୍ୟର ଅନେକ ମହିଳା ସେମାନଙ୍କ ସମ୍ପର୍କୀୟଙ୍କୁ ଖୋଜାଖୋଜି କରୁଥିଲେ ବି ସେମାନଙ୍କ ପତ୍ତା ମିଳିନଥିବା ଅଭିଯୋଗ ହୋଇଛି । କୋଇଲା ମିଶ୍ରିତ ମାଟି ଭିତରେ ବହୁ ହାଇୱା ଟ୍ରକ, ସର୍ଫେସମାଇନର, ପେଲୋଡର ମେସିନ ଆଦି ପୋତି ହୋଇ ରହିଛି ।
ଦ୍ୱିତୀୟରେ ଏଯାଏଁ ଏହି ଘଟଣାରେ ସେଭଳି ଆଖିଦୃଶିଆ ପଦକ୍ଷେପ ନିଆଯାଇନି । ସ୍ଥାନୀୟ ପ୍ରଶାସନ ଠାରୁ ନେଇ ରାଜ୍ୟ ସରକାର ଯାଏ ସମସ୍ତେ ନୀରବ । ସ୍ଥାନୀୟ ବିଜେଡି ନେତା ବି ଚୁପ । ଆଉ ୭ଦିନ ଧରି ଆନ୍ଦୋଳନ କରୁଥିବା ବିଜେପି ବି ବିନା ସମାଧାନରେ ଆନ୍ଦୋଳନରୁ ଓହରି ଯାଇଛି । ତେଣୁ ଲୋକେ କାହାରିକୁ ବିଶ୍ୱାସ କରି ପାରୁ ନାହାଁନ୍ତି । ବଡକଥା ହେଉଛି, ରାଜ୍ୟ ସରକାର ଏଯାଏ ଏ ଘଟଣାର ଉଚ୍ଚସ୍ତରୀୟ ତଦନ୍ତ ନିର୍ଦ୍ଦେଶ ଦେଇ ନାହାଁନ୍ତି । କେବଳ ମୃତକଙ୍କ ପରିବାରକୁ କ୍ଷତିପୁରଣ ଘୋଷଣା କରି ନିଜ କାମ ସାରି ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ଏମସିଏଲ ବି ଠୋସ ପଦକ୍ଷେପ ନେଇନି । କେବଳ ଖଣିର ମ୍ୟାନେଜର ଭିକେ ସିଂଙ୍କୁ ସସପେଣ୍ଡ କରାଯାଇଛି । ଘଟଣାର ୬ ଦିନ ପରେ ଖଣି ପରିଦର୍ଶନରେ ଆସିଥିବା ସିଏମଡି ବି ଅଧିକ କିଛି କହି ନାହାଁନ୍ତି । ସ୍ଥାନୀୟ ଲୋକଙ୍କ କହିବା କଥା ଖଣିରେ ଅନେକ ଶ୍ରମିକ କାମରେ ଲାଗିଥିଲେ ତେଣୁ ମାଟିତଳେ ଅନ୍ୟୁନ ୩୦ରୁ ଉଦ୍ଧ୍ୱର୍ ଶ୍ରମିକ ଫସି ରହିଛନ୍ତି । ଖଣିରେ ଶ୍ରମିକଙ୍କ ସୁରକ୍ଷାକୁ ଅଣଦେଖା କରାଯାଇଥିବା ସ୍ପଷ୍ଟ ଜଣାପଡୁଛି । ୨୦୧୩ରେ ବି ଏହି ଭରତପୁର ପୋଖରିଆ କୋଇଲା ଖଣିରେ ଦୁର୍ଘଟଣା ଘଟି ଜଣଙ୍କର ଜୀବନ ଯାଇଥିଲା ।

ସମସ୍ତଙ୍କ ନିରବତା ଭିନ୍ନ କିଛି ଇଙ୍ଗିତ କରୁଥିବା ସନ୍ଦେହ କରାଯାଉଛି । କୁହାଯାଉଛି ଖଣି କଥା ଜଣେ ବିଜେଡି ବିଧାୟକ ବୁଝୁଥିବାରୁ ଏମସିଏଲ ଓ ଜିଲ୍ଲା ପ୍ରଶାସନ ଚୁପ ରହିଛନ୍ତି । ରାଜ୍ୟ ସରକାରଙ୍କ ପାଖରେ ପ୍ରକୃତ ଖବର ପହଂଚା ଯାଉନାହିଁ । ଏପରିକି ଏ ସମ୍ପର୍କିତ ସେମିତି କିଛି ରିପୋର୍ଟ ବି ସାମ୍ନାକୁ ଆସୁନାହିଁ । ତେଣୁ ଉପଯୁକ୍ତ ତଦନ୍ତ ନହେଲେ ସବୁକଥା ସେଇ କୋଇଲା ଅତଡା ତଳେ ଚାପି ହୋଇ ରହିଯିବା ଛଡା ଅନ୍ୟ ଉପାୟ ନାହିଁ…

Leave A Reply

Your email address will not be published.